1 Nao long taem ya we King Jeroboam Namba Tu i stap rul long Isrel,* long namba twanti seven yia blong hem, Usia, we papa blong hem King Amajia, hem i kam king blong Juda,* 2 mo long taem ya, hem i gat sikistin yia blong hem. Hem i rul fifti tu yia long kantri ya, mo hedkwota blong hem i stap long taon ya Jerusalem.* Mama blong hem Jekolia, we i woman Jerusalem. 3 Oltaem, king ya i stap folem fasin blong papa blong hem. Hem i stap mekem ol samting we Hae God i glad long hem, 4 be ol ples blong mekem wosip long ol narafala god oli stap nomo, hem tu i no spolem olgeta, nao ol man oli stap gohed blong mekem sakrefaes mo blong bonem insens* long ol ples ya.

5 Nao Hae God i mekem we king ya i kasem wan rabis sik long skin blong hem we i mekem king ya i no moa klin long fes blong hem, mo sik ya i stap long hem oltaem long laef blong hem. Hem i livim ol wok blong hem, nao i go stap hem wan long wan haos, mo pikinini blong hem Jotam i tekem ples blong hem, i stap rulum kantri ya.

6 Ol narafala samting we King Usia i mekem, ol man oli raetemdaon long buk ya we nem blong hem Ol Stori blong Laef blong ol King blong Juda. 7 ✝Mo taem hem i ded, oli berem* hem long hol long ston long haf ya blong Jerusalem we nem blong hem "Taon* blong King Deved", mo pikinini blong hem Jotam i tekem ples blong hem, i kam king.

8 Nao long taem ya we King Usia i stap rul long Juda,* long namba toti eit yia blong hem, Sekaraea we papa blong hem King Jeroboam Namba Tu, hem i kam king blong Isrel.* Hem i rul sikis manis long kantri ya, mo hedkwota blong hem i stap long taon ya Sameria.* 9 Be hem tu i stap mekem sin agens long Hae God olsem we papa blong hem mo ol olfala bubu blong hem bifo oli stap mekem. Hem i stap lidim ol man Isrel blong oli mekem sin long sem fasin ya nomo we King Jeroboam ya bifo, we papa blong hem Nebat, hem i bin mekem. 10 Nao taem King Sekaraea ya i rul, Salum, we papa blong hem Jabes, hem i mekem plan blong kilim hem, nao i kilim hem i ded long taon ya Jibleam, mo i tekem ples blong hem, i kam king.

11 Ol narafala samting we King Sekaraea i mekem, ol man oli raetemdaon long buk ya we nem blong hem Ol Stori blong Laef blong ol King blong Isrel.

12 ✝Long fasin ya, promes* we Hae God i mekem long King Jehu bifo i kamtru, we i talem se, "Sipos yu yu ded, wan pikinini blong yu bambae i tekem ples blong yu, i kam king blong Isrel, mo biaen long hem, bambae wan smol bubu blong yu i tekem, gogo kasem smol bubu blong smol bubu blong yu."

13 Nao long taem ya we King Usia i stap rul long Juda,* long namba toti naen yia blong hem, Salum, we papa blong hem Jabes, hem i kam king blong Isrel.* Hem i rul wan manis nomo long kantri ya, mo hedkwota blong hem i stap long taon ya Sameria.*

14-16 Nao taem King Salum ya i rul, Menahem, we papa blong hem Gadi, hem i aot long taon ya Tijaha, i kam long Sameria, i kilim king ya, mo i tekem ples blong hem, i kam king. Mo long taem ya we hem i aot long Tijaha i stap kam, hem i kilim ol man blong taon ya Tapua, i spolemgud taon ya, mo i spolem tu olgeta ples raonabaot long hem, from we ol man blong taon ya oli no wantem putum olgeta long han blong hem. Mo long taem ya, hem i holem ol woman blong taon ya tu we oli gat bel, i katem bel blong olgeta i open blong kilim olgeta i ded.

Ol narafala samting we King Salum i mekem, wetem plan blong hem we i mekem blong kilim King Sekaraea, ol man oli raetemdaon long buk ya we nem blong hem Ol Stori blong Laef blong ol King blong Isrel.

17 Nao long taem ya we King Usia i stap rul long Juda,* long namba toti naen yia blong hem, Menahem, we papa blong hem Gadi, hem i kam king blong Isrel.* Hem i rul ten yia long kantri ya, mo hedkwota blong hem i stap long taon ya Sameria.* 18 Be hem tu i stap mekem sin agens long Hae God oltaem long laef blong hem, gogo i ded. Hem i stap lidim ol man Isrel blong oli mekem sin long sem fasin ya nomo we King Jeroboam ya bifo, we papa blong hem Nebat, hem i bin mekem. 19 Nao long taem we hem i rul, King Tiglatpilesa blong Asiria i kam long Isrel blong mekem faet long hem, be King Menahem i promes blong givim toti fo tan silva long hem, we praes blong hem, wan taosen faef handred milian vatu,* blong hem i givhan long hem blong i save rulum ol man Isrel. 20 Nao King Menahem i girap, i go fosem olgeta rijman long Isrel blong oli givim mane long hem, we olgeta evriwan wanwan oli givim twanti faef taosen vatu long hem. Mo taem King Tiglatpilesa i holem mane ya, hem i gobak long kantri blong hem.

21 Ol narafala samting we King Menahem i mekem, ol man oli raetemdaon long buk ya we nem blong hem Ol Stori blong Laef blong ol King blong Isrel. 22 Mo taem hem i ded, oli berem* hem long hol long ston long beregraon blong ol bubu blong hem, mo pikinini blong hem Pekahia i tekem ples blong hem, i kam king.

23 Nao long taem ya we King Usia i stap rul long Juda,* long namba fifti yia blong hem, Pekahia, we papa blong hem King Menahem, hem i kam king blong Isrel.* Hem i rul tu yia long kantri ya, mo hedkwota blong hem i stap long taon ya Sameria.* 24 Be hem tu i stap mekem sin agens long Hae God. Hem i stap lidim ol man Isrel blong oli mekem sin long sem fasin ya nomo we King Jeroboam ya bifo, we papa blong hem Nebat, hem i bin mekem. 25 Nao i gat wan kapten blong ol soldia blong hem we nem blong hem Peka, mo papa blong hem Remalia, mo hem wetem fifti man Gilead oli joen blong mekem plan blong kilim hem. Olgeta oli kam kilim hem long Sameria, long haos blong hem insaed olgeta, long strong ples blong haed blong hem, mo Peka ya i tekem ples blong hem, i kam king.

26 Ol narafala samting we King Pekahia i mekem, ol man oli raetemdaon long buk ya we nem blong hem Ol Stori blong Laef blong ol King blong Isrel.

27 Nao long taem ya we King Usia i stap rul long Juda,* long namba fifti tu yia blong hem, Peka, we papa blong hem Remalia, hem i kam king blong Isrel.* Hem i rul twanti yia long kantri ya, mo hedkwota blong hem i stap long taon ya Sameria.* 28 Be hem tu i stap mekem sin agens long Hae God. Hem i stap lidim ol man Isrel blong oli mekem sin long sem fasin ya nomo we King Jeroboam ya bifo, we papa blong hem Nebat, hem i bin mekem.

29 Long taem we King Peka i stap rul, King Tiglatpilesa blong Asiria i kam mekem faet long Isrel, mo i winim ol taon ya Ion, wetem Abelbetmahaka, mo Janoa, mo Kedes, mo Hajoro, wetem olgeta vilej blong tri bigfala distrik ya Gilead, mo Galili* mo Naftali.* Hem i holem olgeta ples ya, mo i karem ol man blong ol ples ya oli go wok slef* long Asiria.

30 Nao long taem ya we King Jotam, we papa blong hem King Usia i king long Juda, long namba twanti yia blong hem, Hosea, we papa blong hem Elaha, hem i mekem plan blong kilim King Peka, nao i kilim hem i ded, mo hem i tekem ples blong hem, i kam king. 31 Ol narafala samting we King Peka i mekem, ol man oli raetemdaon long buk ya we nem blong hem Ol Stori blong Laef blong ol King blong Isrel.

32 Nao long taem ya we King Peka, we papa blong hem Remalia i stap rul long Isrel,* long namba tu yia blong hem, Jotam, we papa blong hem King Usia, hem i kam king blong Juda,* 33 mo long taem ya, hem i gat twanti faef yia blong hem. Hem i rul sikistin yia long kantri ya, mo hedkwota blong hem i stap long taon ya Jerusalem.* Mama blong hem Jerusa, we i dota blong Jadok. 34 Oltaem king ya i stap mekem ol samting we Hae God i glad long hem stret olsem we papa blong hem i bin mekem. 35 Be ol ples blong mekem wosip long ol narafala god oli stap nomo, hem tu i no spolem olgeta, nao ol man oli stap gohed blong mekem sakrefaes mo blong bonem insens* long ol ples ya. Mo doa ya blong yad blong haos* blong Hae God, long saed i go long not, king ya nao i wokem.

36,37 Long taem ya we hem i stap rul, Hae God i girap agens long ol man Juda, mo i stat sanem King Resin blong Siria mo King Peka blong Isrel wetem ol soldia blong tufala oli kam blong mekem faet long olgeta. Ol narafala samting we king ya i mekem, ol man oli raetemdaon long buk ya we nem blong hem Ol Stori blong Laef blong ol King blong Juda. 38 Mo taem hem i ded, oli berem* hem long hol long ston long beregraon blong ol king, long haf ya blong Jerusalem we nem blong hem "Taon* blong King Deved". Mo pikinini blong hem Ahas i tekem ples blong hem, i kam king.