1 Ol waestok blong King Solomon i olsem.

Pikinini we i waes, hem i stap mekem papa mo mama blong hem, tufala i glad long hem, be pikinini we i no gat hed, hem i stap mekem tufala i harem nogud nomo.

2 Ol gudgudfala samting we man i kasem long fasin blong giaman, oli no save mekem wan gudfala samting long laef blong hem, be fasin we i stret we i no gat giaman long hem, hem i save sevem laef blong hem.

3 Hae God i no save letem gudfala man i stap hanggri, mo i no save letem man nogud i kasem ol samting we i wantem.

4 Fasin blong les i save mekem man i kam pua, be hadwok i save mekem hem i kam rij.

5 Taem we kakae long garen i rere, man we i gat hed, hem i stap tekemaot kakae blong hem, be man we i stap slip long taem ya, bambae i sem bigwan from.

6 Taem man nogud i tok, tok ya blong hem i blong haedem fasin blong faet blong hem, be Hae God i stap blesem man we i stret.

7 Gudfala man, sipos hem i ded, bambae ol man oli stap tingbaot hem longtaem, from we Hae God i bin yusum hem blong blesem olgeta, be man nogud, bambae i no longtaem, ol man oli fogetem hem.

8 Man we i gat hed hem i save lesin long ol gudfala toktok we man i stap talem blong givhan long hem. Be man we i no gat hed, krangke toktok blong hem bambae i mekem hem i foldaon kwiktaem nomo.

9 Man we fasin blong hem i stret we i no gat giaman long hem, hem i save stap gud oltaem, mo laef blong hem i sef. Be man we fasin blong hem i no stret, bambae ol man oli faenemaot ol rong blong hem.

10 Man we i savegud samting nogud we narafala man i mekem, be i no wantem tok stret long hem, hem i stap statem trabol nomo. Be man we i stap tok stret long man from poen blong hem, hem i stap mekem pis.* narafala man i mekem, be i no wantem tok stret long hem, hem i stap statem trabol nomo, be man we i no gat hed, krangke toktok blong hem bambae i mekem hem i foldaon kwiktaem nomo.

11 Tok blong gudfala man i stap givim laef long man, i olsem springwota we i no save kam drae, be tok blong man nogud i blong haedem fasin blong faet blong hem nomo.

12 ✝Man we i no laekem narafala man, i agens long hem, hem i stap pulum trabol i kam, be man we i lavem narafala man, hem i save fogivim hem from ol samting nogud we hem i mekem long hem.

13 Man we i gat hed, tok blong hem i waes, be man we i no gat hed, oltaem ol man oli mas panisim hem from ol krangke fasin blong hem.

14 Man we i waes i stap lukaot olgeta save we hem i save kasem, be man we i no gat hed, taem hem i tok, trabol i stap klosap nomo.

15 Rijman, ol gudgudfala samting we hem i gat oli stap blokemgud hem blong trabol i no kam kasem hem, be puaman, hadlaef blong hem i stap spolem hem bakegen.

16 Laef, hem i olsem praes we man i kasem, from we fasin blong hem i stret, be pei blong man we i mekem sin, hemia we sin blong hem i stap kam bigwan moa.

17 Man we i stap lesin long tok we i blong stretem hem, hem i stap long rod blong laef, be man we i stap tanem baksaed long ol tok olsem, hem i lusum rod ya finis.

18 Man we i no laekem narafala man, i agens long hem, be i stap haedem samting ya long tingting blong hem, hem i man blong giaman. Mo man we i stap go talem ol tok olbaot we i spolem nem blong narafala man, hem i no gat hed.

19 Taem man i stap toktok tumas, i isi nomo blong hem i mestem tok blong hem, nao i foldaon long sin, be man we i waes, hem i save satem maot blong hem, i no tok.

20 Ol tok blong stret man i olsem silva we i klin gud, be ol tingting blong man nogud i no save givhan long man nating.

21 Ol tok blong gudfala man i stap givhan gud long plante man, be man we i no gat hed, hem i save ded long krangke fasin blong hem.

22 Sipos Hae God i stap mekem i gud long man, fasin ya bambae i mekem man ya i kam rijman, mo hem i no save mekem man ya i trabol.*

23 Man we i stap glad blong mekem ol samting nogud, hem i krangke we i bitim mak, be man we i gat hed, hem i stap glad long waestok.

24 Man we fasin blong hem i stret, i stap kasem ol samting we hem i wantem, be man nogud bambae i kasem ol samting we hem i stap fraet tumas long hem.

25 Sipos bigfala win i blu i kam, bambae i save karemaot man nogud i go, be stret man bambae i save stap gud oltaem nomo.

26 Bambae yu no mas traem blong tekem wan lesman i kam wok blong yu. Bambae hem i mekem yu yu harem nogud nomo, i olsem laman we i konkon long maot blong yu, no smok blong faea we i spolem ae blong yu.

27 Man we i stap tinghevi long Hae God, mo i stap ona gud long hem oltaem, hem bambae i gat longfala laef, be man nogud bambae i ded, we i no stret taem blong hem yet.

28 Ol samting we gudfala man i stap putum tingting blong hem i stap long hem, bambae oli mekem hem i glad tumas, be ol samting we man nogud i stap ting se bambae i kasem, bambae oli no save kamtru nating.

29 Hae God i stap blokemgud ol stret man, i stap sevem olgeta, be ol man we oli stap mekem ol fasin nogud, hem i stap spolemgud olgeta.

30 Man we fasin blong hem i stret, bambae i save stap gud oltaem nomo long kantri ya we Hae God i givim long yumi, be man nogud bambae i no save stap longtaem long hem.

31 Man we fasin blong hem i stret, oltaem hem i stap talem ol waestok, be man we i stap talem ol tok we i no stret, Hae God bambae i satem maot blong hem.

32 Man we fasin blong hem i stret, tok blong hem i save leftemap tingting blong man, be man nogud, oltaem hem i stap talem ol tok we i blong spolem man nomo.