1 ✝I nogud yu stap bigmaot long ol samting we bambae yu kasem tumora, from we yu no save ol samting we bambae i kamtru tede.

2 I nogud yu nomo yu stap leftemap yu bakegen. I moa gud yu letem ol narafala man mo ol strenja oli mekem fasin ya long yu.

3 Man we i no gat hed, trabol we hem i mekem i bigwan tumas, i winim bigfala ston we i hevi tumas, man i no save muvum.

4 Man we i kros, hem i save spolem olgeta samting, mo i save spolem man, we i no gat sore, be man we i jalus, hem i mowas olgeta.

5 Sipos yu lavem wan man, i moa gud yu tok stret long hem long fes blong ol man, blong stretem hem, i winim we yu no mekem wan samting nating long hem, nao hem i ting se yu no lavem hem.

6 Maet fren blong yu i mekem wan samting long yu we i mekem yu yu harem nogud, be hem i mekem from we i wantem givhan long yu. Be sipos wan enemi blong yu i kam putum han blong hem long solda blong yu, bambae yu mas lukaot gud.

7 Sipos yu kakae we yu fulap gud, nating we gudfala kakae, be bambae yu no wantem. Be sipos yu hanggri, nating we kakae we i konkon tumas, be bambae yu harem i swit we i swit.

8 Man we i stap longwe long hom blong hem, hem i olsem pijin we i lusum bed blong hem.

9 Senta mo oel we smel blong hem i naes, tufala i save mekem yu yu harem gud, be trabol i stap mekem we tingting blong yu i no save stap kwaet.*

10 I nogud yu stap fogetem ol fren blong yu, mo ol fren blong papa blong yu. Sipos trabol i kasem yu, i nogud yu resis blong go luk stret brata blong yu we i stap longwe long yu, blong i givhan long yu. I moa gud yu go luk wan fren blong yu we i stap klosap long yu.

11 Pikinini blong mi, yu yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.

12 Man we i gat gudfala tingting i save luk we trabol i stap kam, mo i save ronwe long hem, be man we i no tingting gud, hem i no kea, i save letem trabol i kam kasem hem, we biaen i sore from.

13 Sipos wan man i mekem kaon long yu, mo narafala man i promes blong pemaot ol kaon ya be i no savegud man ya, hem i krangke nomo. Sipos hem i mekem olsem, i moa gud yu holem ol klos blong hem fastaem, gogo i pemaot kaon ya.

14 Man we i singaot strong blong wekemap fren blong hem long eli moning blong talem gudmoning long hem, fasin ya i olsem we man ya i singaot trabol i kam long hem.

15 Woman we oltaem i stap toktok tumas long man blong hem, hem i olsem haos we i stap lik, we wota i stap drop, drop, drop oltaem nomo. 16 Woman olsem, i strong tumas blong man i mekem hem i stap kwaet. Yu traem tingbaot. ?Yu yu traem samtaem blong yu blokem win blong i no blu, no blong yu pikimap oel long han blong yu?

17 Oltaem, ol man oli stap lanlan long olgeta bakegen, olsem we naef i save sapenem naef.

18 Sipos yu stap lukaot gud long figtri* blong yu, frut blong hem bambae i kam plante blong yu kakae. Mo long sem fasin, sipos yu stap wok long wan masta, mo yu stap lukaot gud long hem, hem bambae i ona gud long yu.

19 Taem we yu lukluk i go long wota, fes we yu luk, fes blong yu nomo, mo long sem fasin, taem we yu lukluk long laef blong yu, laef we yu luk, laef blong yu nomo.

20 Tingting blong man we oltaem i stap wantem plante samting, hem i olsem Hom* blong ol Dedman we oltaem i gat rum blong man i go long hem.

21 Gol mo silva, oltaem man i stap bonem long faea blong faenemaot se i gud no i nogud, be man, nem we ol narafala man oli givim long hem i save soemaot fasin blong hem.

22 Man we i no gat hed, nating we yu wipim hem gogo i hafded, be yu no save ronemaot ol krangke tingting ya blong hem.

23 Oltaem yu mas traehad blong lukaot gud long ol sipsip mo ol buluk blong yu, 24 from we ol samting ya oli mekem yu yu rijman, be oli no save stap olwe. Nating we ol bigfala kantri, be ol man blong olgeta tu bambae oli no save stap olwe. 25 Evri yia, yu mas go long graon blong yu fastaem blong katem ol gras, blong ol anamol ya oli save kakae long koltaem, nao biaen, taem we gras ya i stap gru bakegen, yu save go katem gras olbaot long saed blong hil. 26 Sipos yu stap wok strong olsem, bambae yu save tekem ol hea blong pikinini blong sipsip blong wokem klos blong yu long hem, mo yu save pem graon long mane we yu kasem long ol nani we yu stap salem. 27 Mo ol narafala nani we i stap bambae oli save givim melek, we i naf blong yu wetem ol pikinini blong yu, mo ol gel blong wok blong yu tu.