1 Sipos ol man oli luk se yu yu wan gudfala man nao oli ona long yu, hemia i gud moa i winim we yu kam rijman.

2 Nating we rijman no puaman, be Hae God i mekem tufala evriwan.

3 Man we i gat gudfala tingting i save luksave we trabol i stap kam, nao i save ronwe long hem, be man we i no save tingting gud, hem i save letem trabol i kam, i kasem hem, we biaen i sore from.

4 Man we i obei long Hae God, mo i mekem tingting blong hem i stap daon, hem bambae i kam rijman. Bambae hem i gat longfala laef, mo ol man bambae oli ona long hem.

5 Sipos yu wantem laef blong yu i stap gud, yu mas ronwe long ol trap ya long rod, we ol man nogud oli stap foldaon long hem.

6 Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.

7 Oltaem, ol puaman oli stap kam slef blong ol rijman, mo sipos yu kaon long wan man, bambae yu kam slef blong hem nao.

8 Sipos yu stap folem fasin we i no stret, we yu stap spolem ol narafala man, i olsem we yu stap planem sid we frut blong hem, bigfala trabol, nao bambae yu no save win.

9 Man we oltaem i rere blong givim kakae long ol puaman long gladhat blong hem, Hae God bambae i blesem hem from.

10 Sipos yu ronemaot ol stronghed we oli stap tok flas, ol fasin ya we ol man oli stap rao, mo oli stap faet, mo oli stap tok nogud long olgeta bakegen bambae oli finis.

11 Sipos yu yu wan man we oltaem tingting blong yu i klin, mo yu stap toktok gud long ol man, king bambae i kam fren blong yu.

12 Hae God i stap daonem ol tok blong ol man blong giaman, be hem i stap lukaot gud long ol trutok.

13 Man blong les, oltaem hem i stap nomo insaed long haos blong hem, from we hem i stap ting se sipos hem i go afsaed, bambae wan laeon i kakae hem.

14 Woman we i stap pulum man we i mared finis i kam stap wetem hem, hem i olsem wan trap we i stap kasem ol man we Hae God i kros long olgeta.* i kam stap wetem hem, hem i olsem wan trap we i stap kasem ol man we Hae God i kros long olgeta.

15 Fasin blong pikinini, oltaem i save mekem ol krangke samting we i no save tingbaot, be sipos papa blong hem i stap wipim as blong hem blong lanem hem, bambae i save lanem ol gudfala fasin.

16 Man we i stap givim ol presen i go long ol rijman, no we i stap ravem ol puaman blong kam rijman, man olsem bambae i kam puaman tru.

17 Pikinini blong mi. I gud yu lesin gud, nao bambae mi tijim yu long ol tok we ol waes man oli stap talem. Yu mas stadi gud long ol tok ya blong olgeta, 18 nao sipos yu stap tingbaot olgeta oltaem, mo yu save talemaot olgeta baehat, bambae yu save harem gud. 19 Mi mi wantem talemaot ol waestok ya long yu naoia, from we mi wantem se oltaem yu mas trastem Hae God. 20 Mi mi raetemdaon toti waestok we oli save mekem yu yu gat save, mo oli save givhan long yu long laef blong yu. 21 Ol tok ya oli save tijim yu blong yu savegud ol tok we i tru, nao sipos ol man oli sanem yu blong yu go faenemaot trutok blong wan samting, bambae yu save tekem stret ansa i kambak long olgeta.

22 I nogud yu stap ravem ol puaman from we yu luk se i isi nomo blong spolem olgeta, mo i nogud tu blong yu stap ravem ol man we oli pas long kot we oli no gat man blong givhan long olgeta. 23 Ol man olsem, Hae God bambae i stanap long saed blong olgeta, mo hem bambae i spolem man we i stap spolem olgeta.

24 I nogud yu stap fren long ol man blong faerap, we oli save kros kwik. 25 Yu mas lukaot gud. Sipos no, bambae yu tekem fasin blong olgeta, nao bambae i strong blong yu jenisim fasin ya blong yu bakegen.

26 I nogud yu promes blong pemaot kaon blong narafala man. 27 Sipos yu no save pem, bambae oli kam tekemaot olting blong yu, wetem bed blong yu tu.

28 I nogud yu muvum olfala mak blong graon we ol olfala bubu blong yumi bifo oli putum.

29 Man we wok blong hem i gud, sipos yu luklukgud long hem, bambae yu luksave we hem i wan man we i gud moa, i winim plante narafala man, mo we hem i naf blong kam man blong wok blong king.