1 Pikinini we i waes, taem papa blong hem i tok long hem blong stretem hem, hem i stap lesin gud long hem. Be pikinini we i stronghed, hem i no save talem samtaem se, "Papa, mi mi rong."

2 Man we oltaem i stap talem ol gudfala tok, hem bambae i save kasem ol gudgudfala samting from, be man we i stap trikim ol man long ol giaman toktok blong hem, oltaem, hem i stap singaot faet nomo i kam long hem.

3 Man we i stap tingting gud fastaem, nao biaen i tok, hem i stap lukaot gud long laef blong hem, be man we i no kea long ol tok we hem i stap sakem, hem i stap spolem hem nomo.

4 Nating we man blong les i wantem plante samting, be hem i no save kasem. Man we i stap wok had, yes, hem bambae i kasem evri samting we hem i wantem.

5 Ol man we oli no save giaman oli no laekem nating fasin blong giaman, be tok blong ol man nogud i samting blong sem nomo.

6 Stret fasin i stap blokem ol stret man, blong oli no mekem ol samting nogud, mo long sem fasin, fasin nogud i stap mekem ol man nogud oli go lus.

7 I gat sam man oli stap giaman se oli rijman, be oli no gat wan samting nating, mo i gat sam narawan oli stap talem se oli puaman, be oli stap giaman nomo, oli gat plante gudgudfala samting.

8 Rijman, samtaem hem i mas yusum mane blong hem blong pemaot laef blong hem long man we i wantem kilim hem i ded, be puaman i no save kasem trabol olsem.

9 Stret man i olsem laet we i stap laet gud, we i saen we i saen, be man nogud i olsem laet we i no laet gud, we bambae i no longtaem i ded.

10 Man blong flas we i no save lesin, hem i stamba blong trabol nomo. Be man we i save lesin long advaes, hem i gat hed.

11 Mane we man i kasem isi nomo i save lus kwiktaem, be mane we man i hadwok from, oltaem i stap kam bigwan moa.

12 Taem man i putum tingting blong hem i stap strong long wan samting, be samting ya i no kamtru, tingting blong hem i save foldaon, be taem samting ya i kamtru, hem i glad we i glad.

13 Sipos man i no wantem lesin long gudfala advaes, hem i stap pulum trabol nomo i kam long hem, be sipos hem i stap lesin long advaes ya, bambae hem i save stap gud.

14 Ol samting ya we waes man i stap tijim ol man long hem, hem i olsem springwota blong laef. Springwota ya i save sevem man we i stap long rod blong ded.

15 Man we i gat gud hed, ol man oli save ona long hem, be man we ol man oli no trastem hem, rod blong hem i strong we i strong.

16 Man we i gat hed, oltaem nomo hem i stap tingting gud fastaem, nao biaen i mekem samting, be man we i no gat hed, oltaem nomo hem i stap soemaot i klia we i no save wan samting.

17 Man blong karem tok we ol man oli save trastem hem, hem i man blong mekem pis, be man blong karem tok we i man blong giaman, hem i man blong mekem trabol nomo.

18 Man we i no wantem lan, bambae hem i kam puaman, mo bambae i sem long fes blong olgeta man, be man we i stap lesin long ol toktok we i blong stretem hem, bambae ol man oli save ona long hem.

19 Taem man i kasem ol samting we i stap tingbaot, hem i save harem gud, mo from samting ya, man we i no gat hed i no wantem livim ol fasin nogud.

20 Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.

21 Ol man nogud, oltaem trabol nomo i stap folem olgeta, be ol man we fasin blong olgeta i stret, olgeta oli stap kasem ol gudgudfala samting olsem pei blong olgeta.

22 Taem gudfala man i ded, ol gudgudfala samting we hem i gat, ol smol bubu blong hem oli save tekem i blong olgeta. Be taem man nogud i ded, ol samting we hem i hivimap, bambae oli go long han blong ol stret man.

23 I gat plante kakae i stap long ol olfala garen blong ol puaman, we i naf blong olgeta oli kakae, be ol man nogud oli stap blokem ol puaman blong oli no go tekem.

24 Sipos yu no wantem panisim pikinini blong yu, hemia i min se yu no lavem hem. Sipos yu lavem hem, bambae yu stap stretem hem.

25 Ol stret man oli gat plante kakae blong olgeta, be ol man nogud oli stap hanggri oltaem nomo.