1 I nogud yu stap harem nogud from we yu no gat ol samting ya we ol man nogud oli gat, mo i nogud tu blong yu traem kam fren wetem olgeta. 2 Ol man olsem oli wantem mekem trabol nomo, mo oltaem, taem oli tok, be oli stap mekem plan blong mekem narafala man i harem nogud nomo.

3 Prapa fandesen blong man i wokem haos blong hem long hem, waes mo save. 4 Mo haos blong man we save blong hem i bigwan, ol rum blong hem oli fulap long ol gudgudfala samting, we praes blong olgeta i antap moa.

5 I moa gud blong yu kam waes, i winim we yu kam strong. Mo i moa gud blong yu gat save, i winim we yu gat paoa. 6 Sipos yu wantem go mekem faet, be yu mas mekem gudfala plan fastaem. Mo sipos yu gat plante man blong givim gudfala advaes long yu, janis blong yu blong yu win, bambae i stap kam bigwan moa.

7 Ol waestok oli strong tumas, man we i no gat hed i no save kasem mining blong olgeta. Sipos ol haeman oli sidaon blong tokbaot wan bigfala samting, bambae man olsem i no save tok, oltaem hem i stap sidaon kwaet nomo.

8 Man we oltaem i stap mekem plan blong mekem ol samting nogud, bambae nem blong hem i kam rabis. Bambae ol man oli stap singaot hem se, "Man blong mekem trabol." 9 Ol plan blong man we i no gat hed, oli blong mekem samting nogud nomo. Mo man we oltaem i stap laf nogud long ol narafala man, ol man oli no laekem hem nating, oli stap agens long hem.

10 Sipos tingting blong yu i no strong long taem blong trabol, hemia i soemaot we yu yu no strong nating.

11 Sipos ol man oli wantem kilim wan man i ded, be i no stret nating blong hem i ded, yu yu no mas fraet blong go sevem hem. 12 Maet yu save talem se, "!Hemia i no bisnes blong mi ya!", be Hae God i save, mo hem i stap skelem tingting blong yu, blong save from wanem yu stap talem olsem. Hem i stap lukluk yu, mo i savegud yu. Mo bambae hem i givim pei long yu, stret long mak blong fasin we yu yu mekem.

13 Pikinini blong mi. Eg* blong sugabag,* hem i wan gudfala samting blong kakae. Mo yu save, taem we yu jes tekemaot long bed blong hem, hem i gud tumas, i swit we i swit. 14 Mo long sem fasin, yu mas save we waes tu, hem i gud tumas, mo i save holem tingting blong yu. Sipos yu save kasem waes, bambae laef blong yu i save kam gud moa.

15 I nogud yu folem fasin blong ol man nogud, we oli stap mekem plan blong go stilim olting blong ol stret man, mo blong spolem ol haos blong olgeta. 16 Nating we trabol i stap kasem stret man hamas taem, be oltaem hem i save girap bakegen. Be sipos trabol i kasem ol man nogud ya, bambae i stap spolemgud olgeta.

17 Sipos enemi blong yu i kasem trabol no i stambol, i nogud yu stap glad from. 18 Sipos yu stap glad long ol samting ya, Hae God bambae i save, nao bambae hem i no glad nating long fasin ya blong yu, mo maet hem i no save panisim enemi ya blong yu.

19 I nogud yu stap harem nogud long ol samting we ol man nogud oli stap mekem. Nating we olgeta oli stap win, be i nogud yu stap jalus long olgeta from. 20 I no gat wan gudfala samting nating i stap, we ol man ya oli save putum tingting blong olgeta i stap long hem, se bambae oli kasem.

21 Pikinini blong mi. Oltaem yu mas tinghevi long Hae God, mo yu mas ona gud long hem, mo yu mas mekem olsem tu long king. I nogud yu go joen long ol man we oli stap girap agens long Hae God, no agens long king. 22 Ol man olsem bambae oli save kasem trabol kwiktaem nomo. Yumi no naf blong makem trabol we Hae God i save mekem i kamtru long enemi blong hem, no we king tu i save mekem i kamtru.

23 I gat ol narafala waestok tu i stap we ol waes man oli stap talem, we oli olsem.

Fasin ya we man blong mekem kot i stap lesin long wan saed nomo, hem i nogud olgeta. 24 Sipos hem i stap jajem ol man we oli mekem i no stret se oli stret nomo, olgeta man bambae oli agens long hem, oli stap singaot* trabol i kam long hem. 25 Be sipos hem i stap panisim ol man we oli stap mekem i nogud, bambae laef blong hem i gohed gud, mo bambae hem i gat gud nem long fes blong ol man.

26 Man we oltaem i stap givim stret ansa long yu, hem i stap soemaot we hem i wan prapa fren blong yu.

27 Fastaem yu mas wok strong blong planem garen blong yu, mo yu mas lukaot gud long hem, nao biaen, bambae yu save wokem haos blong yu.

28 Sipos yu no savegud poen we wan man i gat agens long narafala man, bambae yu no mas go long kot blong witnes agens long narafala man ya. I nogud yu go talemaot ol giaman toktok we bambae i mekem kot i go krangke. 29 Mo i nogud yu talem se, "Mi bambae mi mekem long hem stret olsem we hem i mekem long mi. Fasin ya blong hem, bambae mi givimbak long hem bakegen."

30 Wan dei, mi mi stap wokbaot long bus, nao mi luk wan garen, mo wan plantesen blong rop ya grep,* we tufala i blong wan lesman we i no gat hed. 31 Tufala garen ya i fulap long ol rop we i gat nil, mo grasnil i kavremapgud, mo stonwol we i goraon long tufala i brobrok olbaot. 32 Nao taem mi luk ol samting ya, mi stap tingting gud long hem, mo mi lanem wan gudfala samting long hem. 33 ✝Sipos yu stap ledaon, yu stap spel, yu stap slip, 34 wantaem nomo bambae yu kam puaman, olsem we man blong stil i kam stilim olgeta samting blong yu.* yu stap spel, yu stap slip, 34 wantaem nomo bambae yu kam puaman, olsem we man blong stil i kam stilim olgeta samting blong yu. Sipos yu mekem olsem, wantaem nomo bambae yu trabol gud blong kasem kakae, olsem we strong man blong faet i kam flatemgud yu.