1 Hae God i no laekem nating, fasin ya we man i stap jenisim bol blong skel blong i giaman long ol man. Hem i wantem fasin ya we man i stap yusum skel we i stret gud nomo.

2 Man we i stap flas, bambae i no longtaem hem i sem bigwan, be man we i mekem tingting blong hem i stap daon, hem i wan waes man.

3 Gudfala man, oltaem stret fasin i stap lidim hem, be man blong giaman, rabis fasin ya blong hem i stap spolem hem.

4 Long dei we Hae God bambae i jajem yumi, ol samting we rijman i gat bambae oli no save givhan long hem, be sipos fasin blong man i stret, hemia i save sevem laef blong hem.

5 Man we narafala man i no save jajem hem, stret fasin blong hem i stap mekem rod blong hem i isi moa, be man nogud, oltaem rabis fasin blong hem i stap mekem hem i foldaon.

6 Man we i no save giaman, oltaem stret fasin blong hem i stap sevem hem, be man blong giaman, fasin ya we oltaem hem i wantem plante samting, i olsem wan trap we i holemtaet hem.

7 Man nogud, sipos hem i ded, ol tingting blong hem bambae i lus wetem hem. Ol gudgudfala samting we hem i stap ting se bambae i kasem from we hem i rijman, bambae i no save kamtru long hem nating.

8 Taem trabol i kam, Hae God i stap blokemgud ol stret man oli stap gud, nao trabol ya i go kasem ol man nogud.

9 Tok blong man we i no bilif long Hae God, hem i stap spolem ol man we oli stap raonabaot long hem, be waestok i stap sevem ol stret man.

10 Taem ol stret man oli kasem ol gudgudfala samting, olgeta man long taon oli glad, mo taem ol man nogud oli lus, ol man oli glad, oli stap singsingaot from.

11 Sipos ol stret man oli askem long Hae God blong i blesem taon blong olgeta, taon ya i save kam wan bigfala taon we i nambawan, be ol man nogud, tok blong olgeta i stap mekem taon blong olgeta i kam nogud olgeta.

12 Man we i stap tok nogud blong spolem nem blong ol man we oli stap raonabaot long hem, hem i krangke, i no gat hed. Man we i gat hed, hem i stap kwaet nomo.

13 Man we i stap go talem ol tok olbaot, we i spolem nem blong narafala man, hem i no save haedem wan samting, be man we ol man oli stap trastem hem, hem i no save mekem olsem.

14 Sipos ol lida blong wan kantri oli no stap kasem ol gudfala advaes, kantri ya i mas foldaon, be taem i gat plante man blong givim gudfala advaes long olgeta, kantri i save stap gud, i save win.

15 Sipos yu promes blong pemaot kaon blong wan man we i strenja long yu, biaen, bambae yu harem nogud from. I moa gud yu no mekem promes olsem.

16 Woman we i stap givhan long ol man long gladhat blong hem, hem bambae i kasem gudfala nem, mo man we i stap traehad blong mekem bisnes blong hem i gohed, hem bambae i kasem plante samting.* be man we i stap traehad blong mekem bisnes blong hem i gohed, hem bambae i kasem plante samting.

17 Taem man i kaen gud long narafala man, fasin ya i stap mekem i gud long hem tu, be taem man i stap mekem i strong tumas long narafala man, hemia i stap spolem hem nomo.

18 Man we i stap mekem ol fasin nogud maet i save kasem plante samting, be i no save givhan long hem, be man we i stap mekem ol stret fasin, hem i no save mestem prapa pei blong hem.

19 Man we oltaem tingting blong hem i stap strong blong mekem ol stret fasin, hem bambae i gat gudfala laef, be man we i stap mekemhed, nao i stap mekem ol samting nogud, bambae hem i ded from.

20 Ol man we oltaem oli stap wantem ol rabis fasin nomo, Hae God i no laekem olgeta nating, hem i agens long olgeta, be ol man we fasin blong olgeta i stret gud, hem i lavem olgeta.

21 Evri man i mas savegud se ol man nogud bambae oli mas kasem panis, be ol stret man oli no save kasem samting ya.

22 Woman we fes blong hem i naes, be i no gat hed, hem i olsem gol ring we man i hangem long nus blong pig.

23 Taem ol plan blong stret man i kamtru, oltaem nomo ol gudgudfala samting i stap kamaot long hem, be taem ol plan blong man nogud i kamtru, oltaem i mekem Hae God i kros.

24 Sam man oli no save holemtaet mane blong olgeta, be oltaem, oli stap kam rij moa, be sam man oli stap holemtaet mane blong olgeta, be oltaem, oli stap kam pua moa.

25 Man we i stap givim ol samting long narafala man long gladhat blong hem, oltaem hem i gat plante samting. Man we i stap givhan long ol man, oltaem ol man oli stap givhan long hem.

26 Man we i gat kakae be i no wantem salem long man we i sot, i stap holemtaet blong wet gogo praes i go antap, ol man bambae oli stap singaot* trabol i kam long hem, be man we oltaem i glad blong salem ol kakae blong hem, ol man bambae oli stap askem long Hae God blong i blesem hem from.

27 Man we i stap traehad blong kasem ol gudgudfala samting, Hae God bambae i ona long hem, be man we i stap lukaot ol rabis fasin, rabis fasin bambae i spolem hem.

28 Man we i ting se ol gudgudfala samting we hem i gat i save holem hem i stap gud, hem bambae i foldaon olsem lif blong narara long koltaem, be laef blong stret man bambae i gohed gud olsem tri we lif blong hem i stap grin olwe.

29 Man we i stap pulum trabol i kam long ol pikinini blong hem, hem bambae i lusum olgeta samting we hem i gat.

Man we i no gat hed, bambae i kam slef* nomo blong ol waes man.

30 Fasin we i stret i stap mekem man i gat gudfala laef, mo waes man i stap pulum plante man oli kam long laef ya.*

31 ✝Ol gudfala man oli stap kasem pei blong olgeta long wol ya, mo hemia i min se ol man nogud tu we oli stap mekem sin, oli mas kasem stret pei blong olgeta.