9 Senta mo oel we smel blong hem i naes, tufala i save mekem yu yu harem gud, be trabol i stap mekem we tingting blong yu i no save stap kwaet.*27.9: Tok ya i folem olfala translesen blong Oltesteman long lanwis blong ol man Gris bifo, we i kamaot long olfala Oltesteman long lanwis ya Hibru, be long Oltesteman long Hibru we i stap tede, tok ya i olsem. Senta mo oel we smel blong hem i naes, tufala i save mekem yu yu harem gud, olsem we gudfala advaes blong fren blong yu i save mekem tingting blong yu i glad.

10 I nogud yu stap fogetem ol fren blong yu, mo ol fren blong papa blong yu. Sipos trabol i kasem yu, i nogud yu resis blong go luk stret brata blong yu we i stap longwe long yu, blong i givhan long yu. I moa gud yu go luk wan fren blong yu we i stap klosap long yu.