1 Nariyumviriye kuri ivyo vyose nsanga umugororotsi n’umunyabwenge bompi n’ivyo bakora vyose biri mu kuboko kw’Imana, ariko nta n’umwe azi nimba urukundo canke urwanko bimurindiriye. 2 Iherezo ni rimwe kuri bose, umugororotsi n’umunyakibi, abeza n’ababi, uwuhumanye n’uwudahumanye, abatanga ibimazi n’abatabitanga.

Nk’uko bimera ku muntu mwiza,

ni ko bimera no ku munyavyaha;

uko bimeze ku wusezerana,

ni ko bimera no ku wutinya gusezerana.

3 Iki ni ikibi kiri mu bintu vyose bibera musi y’izuba: bose bafise iherezo rimwe. Vyongeye, imitima y’abantu yuzuye ibibi kandi mu mitima yabo huzuye ubusazi mu gihe bakiriho, maze iherezo bagahamvya abapfuye. 4 Umuntu wese akiri muzima afise ivyizigiro, kandi imbwa nzima iruta intambwe ipfuye!

5 Kuko abariho bobo barazi ko bazopfa,

ariko abapfuye nta na kimwe bazi;

nta yindi ngero biteze,

kandi ntibasubira kwibukwa.

6 Urukundo rwabo, urwanko rwabo

n’ishari ryabo vyaribagiranywe;

nta mugabane na mutoya

bazosubira kuronka mu biba musi y’izuba.

7 Genda, urye ivyokurya vyawe unezerewe, kandi unywe umuvinyu wawe n’umutima unezerewe, kuko ari ubu nyene Imana inezererwa ivyo ukora. 8 Wame wambaye impuzu zera, kandi wisige amavuta ku mutwe. 9 Nezererwa ubuzima hamwe n’umugore wawe ukunda, imisi yose y’ubu buzima butoya Imana yaguhaye musi y’izuba. Kuko ivyo ari vyo mugabane wawe mu buzima no mu butame bwawe musi y’izuba. 10 Ibintu vyose amaboko yawe ahawe gukora, ubikore n’inkomezi zawe zose, kuko mu mva, iyo uzoja, ata gukora canke imigambi, kumenya canke ubwenge.

11 Hari ikindi nabonye musi y’izuba.

Abanyaruka si bo batsinda mw’ihiganwa,

mbere si n’abakomeye mu ntambara.

Abanyabwenge si bo baronka ivyokurya,

mbere si n’abakerebutse baronka itunga,

si n’abize baronka amahirwe;

kuko ivyago n’uguhirwa bishika kuri bose.

12 Vyongeye, nta muntu azi igihe isaha yiwe izoshikira.

Nk’uko ifi zifatwa mu rusenga,

canke inyoni zigafatwa n’umutego,

ni ko n’abantu bafatwa n’ibihe bibi

bibashikako giturumbuka.

13 Kandi nabonye musi y’izuba akandi karorero k’ubwenge kantangaje: 14 Kera hariho igisagara kimwe kandi gitoya, carimwo abantu bakeya. Maze giterwa n’umwami akomeye, aragikikuza akirundira ibigunguzi vyo kwuririrako ngo agitere. 15 Muri ico gisagara harimwo umuntu w’umukene ariko w’umunyabwenge, maze akirisha igihugu ubwenge bwiwe. Ariko nta n’umwe yasubiye kwibuka uwo mukene. 16 Maze ndavuga nti: "Ubwenge buruta inkomezi." Ariko bwa bwenge bwa wa mukene bwarakengerewe, kandi amajambo yiwe ntiyasubiye kwibukwa.

17 Amajambo yiyoroheje y’umunyabwenge aruta

gukankama kw’umutware w’ibipfu.

18 Ubwenge buruta ibigwanisho vy’intambara,

ariko umunyavyaha umwe asambura ivyiza vyinshi.