1 Ndin Adidem Sọlọmọn amaakoot mme ñkpisọñ Isrel edi ke iso amọ ke Yeruselem, afịd mme iwuod ubon ye mme ufọk, ediben akebe edioomo Abọọñ edọọk eto Saiyọn, Abio Defid. 2 Afịd nditọ Isrel emaedisoobo ke esịd keed ekeene Adidem Sọlọmọn ke ini usọrọ ke afiọñ Etanim, ayọhọ afiọñ itiaba.

3 Ke ini afịd mme ñkpisọñ ke Isrel emaekediwuọ, mme aku emaeben akebe edioomo, 4 ndin ammọ emaeben akebe edioomo Abọọñ ye atayad mbono ye afịd ndisana ñkpọ mbana ufọk ke esịd amọ. Mme aku ye mme Lifai emaekoono afịd ñkpọ edọọk, 5 ndin Adidem Sọlọmọn ye afịd esob Isrel e-ekediighe edisoobo ye anye ekeba ke iso akebe edioomo, esʌk ewa uwak-uwak edọñ ye mme enañ ake awo imiikikanna adiwewet me adibabat.

6 Mme aku ndin emaeben akebe edioomo Abọọñ ekaa itie amọ ke ataa esịd ubeed tembịd, Ata Adisana Itie, ekenịm anye ke idak mme mba serubim. 7 Mme serubim emaetat mme mba ammọ ke anyọñ itie akebe edioomo emaenyʌñ efʌk akebe edioomo ye mme mboi edatta eben anye. 8 Mme mboi ami emaenyọọñ tutu eda ekịt utịd ammọ ke Adisana Itie ke iso ataa esịd ubeed, ado awo ikikịtte ito anwa Adisana Itie; ndin ammọ mmọdo esʌk eba tutu mfịn ami. 9 Ñkpọ ndomokeed ikisịneke ke akebe edioomo ikan itiadñwed iba ake Moses akesịnne ke Họreb, ke itie Abọọñ akenamma edioomo ye mbon Isrel ke ammọ emaekewuọñọ eto Iyib.

10 Ke ini mme aku emaekekpọñ Adisana Itie, ntọñanyọñ amaafʌk tembịd Abọọñ. 11 Ndin mme aku ikikanna adinam utom ammọ ke ntak ntọñanyọñ, sia ubọọñ Abọọñ amaayọhọ tembịd amọ.