1 Ke Sọọl amaakekpa, nọ Defid akekweeñe adiwot mbon Amalek, anye amaatịmme anyọñ adiba usen iba ke Siklak. 2 Ke ayọhọ usen ita, awo amaato nnaaekọñ Sọọl adi, asịne ñwaiya afọñ ye ntọñ ke iwuod. Anye akediwuọ iso Defid, anye amaaduọ ke isọñ anyʌñ atuak iwuod anọ Defid.

3 Defid amaabịp anye abo, "uke ke afo ato adi?"

Anye amaabọọrọ ate, "Ami ñkefeghe mbọkkọ nto nnaaekọñ Isrel."

4 Defid amaabịp anye abo, "Ndọkkọ miin, nsoo ikido?"

Awo ado amaabọọrọ ate, "Ideen ado emaefeeñe ekpọñ iso ekọñ. Uwak ammọ emaeduọññọ enyʌñ ekpañña. Ndin Sọọl ye ayịn amọ Yọnatan emaekpañña."

5 Ndin Defid amaabo akparawa a-akebenne etob ami adi ate, "Afo anam die adiọọñọ ke Sọọl ye ayịn amọ Yọnatan ekpañña?"

6 Akparawa ado amaabọọrọ ate, "Ami ñkeba ke Abod Kilboa," adidem Sọọl amaaba do ñko, abere ke eduad amọ, mme sariọd ekọñ ye mme andiwad ammọ ekesʌk ebịne anye adudu-adudu. 7 Ke ini anye akekannake anyen añkịt miin, anye amañkoot miin, ami mmaanyʌñ mbo, Nsoo ke ami ñkeme adinam unọọ fiin?

8 "Anye amambịp miin, ‘Afo ado anie?’

"Ami mmaabọọrọ ‘Ami ndo awo Amalek.’

9 "Ndin anye amambo miin ate, ‘Da mi ñkpere miin nyʌñ ñwot miin, sia ami mba ke akpọsọñ ubiak ñkpa, ado uwem asʌk ambaaba miin ke idem.’

10 "Do ndin, ami mmaada ke ñkañ amọ ñnyʌñ ñwot anye, sia mmaadiọọñọ ke sia anye amaakeduọ, ke idiiduuho. Ndin ami mmaayaara anyanya ke iwuod amọ ñnyʌñ nsio anye ñkpọubọk ke ubọk, ammọ ke ñkoono ami nsọk abọọñ mmi."

11 Akema Defid ye mme afịd awo se ikibañña ye anye emaesịññe afọñ ammọ ewai. 12 Ammọ emaefʌhọ, etua enyʌñ etre ndidia tutu ndubiayio ebaña Sọọl ye ayịn amọ Yọnatan, enyʌñ ebaña mbonekọñ Abọọñ ye ufọk Isrel, sia ammọ emaekpañña afai ato akañkañ.

13 Akem Defid amaabịp akparawa a-akebenne etob ado adi abo, "Afo ato uke?"

Anye amaabọọrọ ate, "Ami ndo ayịn asenawo, awo Amalek."

14 Defid amaabịp anye abo, "Nsoo ido ntak afo umuukunieghe mbaak adibenne ubọk mfo ñwot awo Abọọñ amaakeyet adan anịm?"

15 Ndin Defid amaakoot keed ke atu mme awo amọ anyʌñ adọkkọ anye abo, "Kaa, ke wot anye!" Akparawa ado amaawot awo Amalek ado, ndin anye amaakpa. 16 Sia Defid amaadọkkọ anye abo ate, "Yak iyiib mfo udodo fiin ke iwuod. Sia inua mfo amaado ntiense unọ fiin idaha afo akebooho, ‘Ami ñkewot anye ake Abọọñ amaakeyet adan anịm.’ "

17 Ndin Defid amaaseeme aseeme ami abaña Sọọl mme ayịn amọ Yọnatan, 18 anye amaanyʌñ anọ uyio abo yak ekpeep mbon Yuda aseeme utịgha ami nọ adọnọ ammọ (ewet ami esịn ke Ñwed Yasaa):

19 "O! Isrel, e-ewot edob* edot ke mme ñkoñ-ñkoñ itie mfo.

Mbọm, mbon uko e-eduọññọ!

20 "Ndufo ikiitañ ami ke Kad,

ikiibʌk ami ke mme efaak Askelọn,

mbaak nditọ ibaan Filistia edidat esịd,

mbaak nditọ ibaan mbon ake imiifọọrọke edʌd edidaara.

21 "Mme Ikpọabod Kilboa,

ke ndufo enie mbara me edịm,

ke ukodedịm aduọkkọ ke isọñ anọọ inwañ ndufo.*

Sia do ke ekesuenne atuekọñ mbon uko,

atuekọñ Sọọl, a-adan imiiyereke aba.

22 "To ke iyiib mme akpañña afai,

to ke abʌkidem mbon uko,

utịgha Yọnatan ikitịmmeke aba idi,

akañkañ Sọọl ikinyʌññọ itịmme idi ukpọk.

23 Sọọl ye Yọnatan

ke ayio uwem ekemaama enyʌñ ekpono ammọ,

ndin ke ñkpa ammọ ikidiaññake.

Ammọ emaesọp usọp ekan ntrukpuum,

emaenie adudu ekan ekpe.

24 "Nditọ ibaan Isrel,

itua ayịd inọ Sọọl,

a-akisịnne ndufo ndad-ndad afọñ mme nti ñkpọ ke idem,

a-akedọññọ mme afọñidem ndufo ye mbọbọ ake kold.

25 "Mbọm, naña mbon uko eduọññọ ke ekọñ!

Yọnatan akpa ke afai anaa ke ñkoñ-ñkoñ itie ndufo.

26 Esịd mmi abʌññọ unọ fiin, Yọnatan ayịneka mmi;

afo akedo adima ufan mmi.

Ima a-afo akenieghe annọọ miin akedo utịppe,

akan ima ibaan.

27 "Mbọm, naña mbon uko eduọññọ!

Mme ñkpọekọñ enyʌñ etak!"