1 Amaakedikem ke ini, Defid amaabịp Abọọñ abo. "Ado se ami ndọọk ñkaa keed ke mme abio Yuda?"

Abọọñ amaadọkkọ anye abo, "Dọọk kaa."

Defid amaabịp abo, "Ñka uke?"

Abọọñ amaabọọrọ anye abo, "Kaa Hibrọn."

2 Do ndin Defid amaadakka akaa do ye mme anwaan amọ iba, Ahinoam awonwaan Yesriil ye Abikel, ebekpa Nabal awonwaan Kamel. 3 Defid ñko amaasaña ye mme ideen amọ e-ekebaaha ye anye, ammọ keedekeed ekenyʌñ esaña ye mme ubon ammọ, ammọ emaenyʌñ ekedʌñọ ke mme abio Hibrọn. 4 Akema, ideen Yuda emaedi ke Hibrọn, emaediyet Defid adan enịm nte adidem ke esiin Yuda.

Ke emaekedọkkọ Defid ebo ke akedo mbon idʌñ Yabes Kilied ekeben Sọọl ebuuk, 5 Defid amaadọñ mme isʌñutom abo ekedọkkọ mbon Yabes Kilied ebo, "Yak Abọọñ idiọñ naña ndufo ekewọt Sọọl eteufọk ndufo mfọn ke edibuuk anye. 6 Yak Abọọñ iwọt ndufo mfọn ye akpanikọ, ami ñko ñyaiwọt ndufo ukem mfọn ado ato ke se ndufo ekenam ami. 7 Do ndin, ikop adudu ye uko, sia ete ufọk ndufo Sọọl akpa, ndin mbon Yuda eñyet miin adan enịm nte adidem ammọ."

8 Akema, Abna ayịn Nee, adaiso ekọñ Sọọl, amaadat Is-Bosed ayịn Sọọl adian idem anyʌñ aben anye akanna adika ke Mahanaim. 9 Anye amaanam Is-Bosed ado adidem ke Kilied, Asuri, Yesriil, ye ke Ifrem, Benyamin ye ke afịd Isrel.

10 Is-Bosed ayịn Sọọl akedo isua aba ke ini anye akedooho adidem ke Isrel, ndin anye akekara ke isua iba. Ado esiin Yuda ekeda ye Defid. 11 Defid akekara nte adidem Yuda ke Hibrọn ke isua itiaba ye afiọñ itiokeed.

12 Abna ayịn Nee ye ideen Is-Bosed ayịn Sọọl emaekpọñ Mahanaim ekaa ke Kibiọn. 13 Yoab ayịn Seruya ye ideen Defid emaewuọ ekesoobo ammọ ke ñkpọdiọhọ mmọọñ Kibiọn. Atu mbon awo keed emaebono ke mbeñ ñkpọdiọhọ mmọọñ keed, atu mfen enyʌñ ebono ke mbeñ uko.

14 Ndin Abna amaabo Yoab ate, "Yak inam nọ ubaak ñkparawa ami edakka eda enyʌñ enwana ubọk ye ubọk ke iso ñnyịn."

Yoab amaanyịmme abo, "Afọn, yak ammọ enam ntoro."

15 Do ndin ammọ emaedaaña eda, enyʌñ ebat ammọ, ekedo awo duob mme iba ke ukañ Benyamin ye Is-Bosed ayịn Sọọl, duob mme iba ñko ke ukañ Defid. 16 Ndin awo keedekeed amaamʌm awo anwan amọ ke iwuod, anyʌñ anək ikwa amọ asịn ke ñkan awo anwan amọ, ndin afịd ammọ eduọññọ atọ keed. Ekekoot itie ado ke Kibiọn Hedkad Hasurim*.

17 Ekọñ amaanekke asọñ usen ado, ndin ikọd Defid emaekan Abna ye nditọ Isrel.

18 Nditọ ideen Seruya ita ekeba do: Yoab, Abisai ye Asahel. Asahel akesọp ñkpad nte edob ikọd. 19 Asahel amaabịne Abna, iwakkake idʌk nnasia me ufiin naña akebịneke anye. 20 Abna amaakanna anyen ke edem anyʌñ abịp abo, "Afo Asahel adodo?"

Anye amaabọọrọ abo, "Ami ke ado."

21 Ndin Abna amaabo anye ate, "Kanna dʌk nnasia me ufiin; mʌm akparawa keed nyʌñ bọi anye ñkpọekọñ amọ." Ado Asahel ikinyịmmeke aditre adibịne anye.

22 Abna amaamaana adʌt Asahel utọñ abo, "Kumbịne miin aba! Ntak ami ñkpuwotto fiin-e? Ndiikan die nse ayịneka mfo Yoab ke iso?"

23 Ado Asahel ikinyịmmeke aditre adibịne anye, ndin Abna amaakịm Asahel ekpa ke itak eduad, eduad amaatịppe ato ke edem amọ awuọ. Asahel amaaduọ anyʌñ akpa ke itie ado. Afịd awo emaesọñ eda ekediwuọ itie ado Asahel akeduọhọ akpa.

24 Do ndin Yoab ye Abisai emaebịne Abna, tutu ekewuọ abod Amaa, ke idaha utịn akaaha isop, a-akpereke Kia ke usʌñ a-akaaha ndoon ake Kibiọn. 25 Ndin ikọd Benyamin emaetuak eda ye Abna. Ammọ emaediana ekappa edo atu keed edudak ke anyọñ abod.

26 Ado Abna amaabọñ akoot Yoab ate, "Ado nte akañkañ ana akaiso asobo ke nsi-nsi? Ado nte afo udiọọñọke ke ñkpọ ami adiikitre ke ndusuara? Idooho ndin se afo abo ikọd mfo etre edibịne nditọete ammọ, mbon Isrel?"

27 Yoab amaabọọrọ ate, "Ke akpanikọ, adaña nte Abasi aduuho uwem, akpedo afo ukusioho uyio, ikọd mmi ekpekaaka iso ebịne ammọ tutu ubakusen."

28 Do ndin Yoab amaafịt adukpoñ, ndin afịd udịmekọñ emaesọñ eda; ammọ ikibịneke Isrel aba, ammọ ikinyʌññọ inwana aba.

29 Abna ye afịd ikọd amọ emaesaña ke udịm afịd akonayio ado ekeboiyo Araba. Ammọ emaekaaña eboiyo Yọdan ke usiere ubakusen enyʌñ ekewuọ Mahanaim.

30 Akema, Yoab amaatre adibịne Abna anyʌñ akoot afịd mbonekọñ amọ abok. Ke amaaboiyo Asahel, awo ikikịtte mbon Defid awo duob mme usʌkkeed. 31 Ado ikọd Defid emaewot mbon Benyamin ikie ita mme ata (360) e-ekebaaha ye Abna. 32 Ammọ emaeben Asahel ekebuuk ke udi ete amọ ke Betlehem. Ndin Yoab ye ikọd amọ emaesaña ke udịm afịd akonayio enyʌñ ekewuọ Hibrọn ke usiere.