1 Ke ini Defid amaakesaña etək ibọhọ etịñe abod, Siba ayịnufọk Mefibosed, amaawuọ adibet, ayem adisoobo ye anye. Anye amaaben mme dọñki ke udịm adi, ekebọppọ mbiomo efọk uyo ikie iba (200), kek ake resịn ikie (100), kek ake fik ikie (100) ye ukọd ke ikịm keed.

2 Adidem amaabịp Siba, "Nsoo inam nọ afo akoono afịd ñkpọ ami adi?"

Siba amaabọọrọ ate, "Mme dọñki ado se mbon ufọk adidem ewat, uyo ye mfịd edoñño se ideen edia, ndin ukọd anie mbon se idem amem nọ ademme adudu ammọ ke anaan."

3 Adidem amaabịp abo, "Ayeyịn eteufọk mfo aba ke mmọọ?"

Siba amaabọọrọ abo, "Anye aba ke Yeruselem, sia anye akere ate, ‘Esiin Isrel eyaekappa ebekpo ubọọñ etebom mmi ennọ miin mfịn ami.’ "

4 Ndin adidem amaabo Siba ate, "Afịd ñkpọ se ikiinie Mefibosed adido ake mfo idahami."

Siba amaabo ate, "Ami mmenyuuk iwuod unọ. Yak ñkịt mfọn ke iso mfo, abọọñ mmi adidem."

5 Idaha adidem Defid akesañake akpere Bahurim, awodeen keed a-aketooho ukem ubon nte Sọọl amaawuọ ato do adi. Anyịñ amọ akedo Simei, ayịn Kera, anye amaasaña ye isuuñọ naña asañake awuọ adi. 6 Anye amaatọọñ Defid ye afịd mme adaaha adidem ke itiad, akpesʌkado afịd mbonekọñ ye mbon asaña-asaña ukpeme ekebaaha ke ubọk nnasia ye ufiin Defid. 7 Naña anye asueghe mi, anye Simei amaabo, "Wuọ mi, wuọ mi, afo awodawo, afo abʌd-abʌd awo! 8 Abọọñ u-usio fiin usiene ke afịd iyiib a-afo akeduọkkọ ke ubon Sọọl, ake afo adaaha ukara ke itie amọ. Abọọñ a-akappa abio asịn ke ubọk ayịn mfo Absalọm. Mbiara usịm fiin, sia afo ado awodawo!"

9 Ndin Abisai, ayịn Seruya amaabo adidem ate, "Nsoo ido ntak adukpo ewa ami akpesueghe abọọñ mmi adidem? Yak ami ñka do ñkekpịkke iwuod amọ nsio."

10 Ado adidem amaabo, "Ñkpọ ami ibeghe die ndufo, nditọ Seruya? Adieke anye asuuñọke sia Abọọñ amaadọkkọ anye abo ‘Suuñọ Defid,’ anie awo akeme adibịp mbo, ‘Nsoo ido nọ afo anam ami?’ "

11 Akem Defid amaabo Abisai ye afịd mme adaaha amọ ate, "Ayịn awodeen mmi, abʌk ye iyiib ake mmi, asʌk anwana adiñwot. Nwaanwa dise, ndin, awo Benyamin ami! Saana anye yaak; yak anye asuuñọ, sia Abọọñ abo anye anam ntoro. 12 Akeme adido Abọọñ ayaakịt ukuud mmi anyʌñ atịmme annọ adidiọñ edioomo amọ, utu ke isuuñọ amọ mfịn."

13 Ndin Defid ye ikọd amọ emaekaa iso esaña ke usʌñ ke ini Simei akekaaha ke nsakiso Defid ke ukañ abod, asaña asʌk asuuñọ, atoomo itiad anyʌñ aduọk Defid mbad. 14 Ndin adidem ye ikọd amọ emaekewuọ utịd itie isañ ammọ, ye mmemidem. Ke ndo ke anye akeduọk adudu, adia ndidia.

15 Akem Absalọm ye afịd nditọ Isrel emaedi ke Yeruselem, ñko Ahitofel amaaba ye anye. 16 Ndin Husai awo Akaid, ataa awo Defid, amaakaa akebo Absalọm ate, "Yak itọñ uwem asọñ adidem! Yak itọñ uwem asọñ adidem!"

17 Absalọm amaabo Husai, "Awuọ anye ami ado ima a-afo awọttọ ufan mfo? Akpedo anye ado ufan mfo, nsoo ido yak afo ukudukeeneke anye ufeghe?"

18 Husai amaabo Absalọm ate, "Iyoo, anye se Abọọñ amek, ato ibon ami, ye afịd ideen ke Isrel, ake amọ ke ami ndiido, ami ndiinyʌñ nsʌk nda ye anye. 19 Akanna ado, anie ke ami ñkpenam ñkpọ nnọ? Ikpinaaha ami nnam ñkpọ nnọ ayịn? Kpa naña ami ñkenam ñkpọ nnọ ete mfo, kpa ntoro ke ami ndiinam unọ fiin."

20 Absalọm amaabo Ahitofel, "Inọ ñnyịn item mfo. Nsoo ke ñnyịn ikpinam?"

21 Ahitofel amaabọọrọ Absalọm, "Naa ye ibaan esa ete mfo, a-anye akebonno abo ese ñkpọ ebaña akwere amọ. Ke ntoro afịd Isrel eyaekop ebo ke afo amaakappa ado ñkpọ mbubiam ke iso ete mfo, ndin ami ayaasọọñọ ubọk afịd mbon awo se iba ye afo." 22 Do ndin emaetuak atayad enọ Absalọm ke anyọñ ufọk, anye ñko amaakaa akena ye ibaan esa ete amọ ke iso afịd Isrel.

23 Ke mme usen ado, item se Ahitofel akesinọ akesiba nte ake awo a-abịppe ato Abasi. Ke utọ usʌñ ami ke Defid ye Absalọm ekesidat item Ahitofel.