1 Yoab, ayịn Seruya amaadiọọñọ ke itọñ Absalọm amaadọñ adidem. 2 Ke ntoro, Yoab amaadọñ awo aka akedat awonwaan a-ayọhọke ye aniọñ ato abio Tekoa adi. Yoab amaadọkkọ mma ado ate, "Nam nte afo aba ke ikpo. Sịne mme afọñ ikpo, kuufiọññọ adan uyai ndomokeed. Nam nte awonwaan a-afʌhọke ñkpa awo ke uwak usen. 3 Do ndin kaa bịne adidem kedọkkọ anye ikọ ami." Yoab amaasịn anye ikọ ke inua.

4 Ke awonwaan Tekoa amaakewuọ iso adidem, anye amaaduọ akʌp iso amọ ke isọñ akpono anye, ñko anye amaabo ate, "Ñnyaaña miin, O adidem mmi!"

5 Adidem amaabịp anye abo, "Nsoo ñkpọ ufịna fiin?"

Anye amaabọọrọ ate, "Ami ndo ebekpa; ebe mmi amaakpa. 6 Ami ayịnufọk mfo ñkenie nditọ ideen iba. Ammọ awo iba enwana ye emọ-emọ ke inwañ, awo ikibaaha se imuum ammọ. Keed amaatọ keed anyʌñ awot anye. 7 Idahami, afịd idịd ñnyịn e-edakka eda enam ikọ ye awo mfo, ete, ‘Sio andikitọ ayịneka, inọ ñnyịn iwot anye ke iwuod uwem ayịneka ake anye akewotto; ndin ñnyịn iyaisobo adiaakpa ñko.’ Ammọ eyem iniime ukweeñe ukañ i-ikañ asakka annọọ miin, mbaak anyịñ ebe mmi me ake ubon amọ adiba aba ke iso isọñ."

8 Adidem amaadọkkọ mma ado ate, "Nyọñ ufọk, ami ñyaanọ uyio ke iwuod mfo."

9 Ado awonwaan a-atooho Tekoa amaabo adidem ate, "Yak abọọñ, adidem mmi afeen annọ miin ye ufọk mmi, ñko yak adidem ye ebekpo amọ anana ndudue."

10 Adidem amaabọọrọ anye ate, "Adieke awo ndomokeed uyemme ikọ, ben ammọ di mi, ndin ammọ iduufịnake fiin aba."

11 Anye amaadian do abo, "Yak adidem atommo anyịñ Abọọñ Abasi amọ nọ akpan asiousiene ke iyiib akuudian nsobo, mbaak adisobo ayịn mmi."

Adidem amaadian do, "Adaña nte Abọọñ aduuho uwem, ided keed ke iwuod ayịn mfo idiiduọhọ ke isọñ."

12 Awonwaan ado amaabo ate, "Yak ayịnufọk mfo atañ ikọ anọ Abọọñ mmi adidem."

Adidem amaabo anye, "Tañ."

13 Awonwaan ado amaabo, "Nsoo ido ndin yak afo anam utọ ñkpọ ami abaña ikọd Abasi? Ke ini adidem atañña ikọ ami, nte adidem ibiommo idem amọ ikpe, sia adidem ibenne ayịn amọ e-ekebịneke esio ke abio? 14 Nte mmọọñ a-aduọkkọke ke isọñ, a-awo imiikanna ikoi aba, ntoro ana ñnyịn ikpañña. Ado, idooho se Abasi ayem ado ado; utu ke ado, anye asai mme usʌñ mbaak awo e-ekebịneke esio ke abio idooho ke nsi-nsi.

15 "Ndin ami mmedi adidọkkọ abọọñ adidem mmi sia mme awo enam yak ndịk ammʌm miin. Ayịnufọk mfo akekere ate, ‘Ami ñyaatañ nnọ adidem; akemeido anye ayaanam ebeeñe ayịnufọk amọ. 16 Akemeido adidem ayaanyịmme adinyaaña ayịnufọk amọ nsio ke ubọk awo ayemme iñkpịkke miin mme ayịn mmi nsio ke nsʌhọ udeeme Abasi.’

17 "Do ndin ayịnufọk mfo abo, ‘Yak uyio abọọñ mmi adidem asọọñọ nsʌhọ udeeme mmi anịm annọ, sia abọọñ mmi adidem aba nte enyere Abasi ke adideet eti mme idiọọk nse. Yak Abọọñ Abasi mfo aba ye afo.’ "

18 Akem adidem amaabo awonwaan ado ate, "Kuutre adinnọ ibọọrọ ikọ ami mbooho ubịp fiin mi."

Awonwaan ado amaabo, "Yak abọọñ mmi adidem atañ."

19 "Nte ubọk Yoab isịneke ke afịd ñkpọ ami?"

Awonwaan ado amaabọọrọ ate, "Ma uwem mfo, abọọñ mmi ye adidem, awo ndomokeed ikemeke adiwọññọ ñkaa nnasia me ufiin ke abaña ñkpọ se abọọñ mmi ye adidem atañ. Ntoro, ado ayịnufọk mfo Yoab akentemme miin abo nnam ami anyʌñ adọñ afịd mme ikọ ami ke inua ayịnufọk mfo. 20 Awo mfo Yoab akenam ami nọ akpəho naña ñkpọ aba idahami. Abọọñ mmi anie aniọñ nte ake enyere Abasi, anye adiọọñọ afịd ñkpọ se iba ke isọñ."

21 Ndin adidem amaadọkkọ Yoab ate, "A-afọn, ñyaanam ñkpọ ami. Kaa, ke ben akparawa ado Absalọm nyọñ di."

22 Yoab amaaduọ ke isọñ akʌp iso amọ, akpono anye, anyʌñ akọọm adidem. Yoab amaabo, "Mfịn ami awo mfo adiọọñọ abo ke anye akịt mfọn ke anyen mfo, abọọñ mmi adidem, sia adidem anam ebeeñe ayịnufọk amọ."

23 Ndin Yoab amaakaa Kesọọ akeben Absalọm atịmme adi ke Yeruselem. 24 Ado adidem amaabo ate, "Anye ana anyọñ ufọk amọ, inaaha anye akịt iso mmi." Ndin Absalọm akenyọñ ufọk amọ, ikinyʌññọ ikịt iso adidem.

25 Ibaaha awo e-eketooroke ke uyai ke afịd Isrel nte Absalọm. Tọọñọ ke etịñiwuod amọ tutu ekaesịd ikpad amọ, ndo ndomokeed ikibaaha anye ke idem. 26 Ini akeedodo anye akefatta ided iwuod amọ, anye akesifat ided amọ akañ keed ke isua sia ided amaadoppo ibọhọ inọ anye, anye amaasisịn ke udomoñkpọ, ndin udob amọ akesido sekel ikie iba* ke udomoñkpọ adidem.

27 Absalọm akenie nditọ ideen ita ye ayịn awonwaan keed. Anyịñ ayịn awonwaan amọ akedo Tama, anye ñko akedo uyaiya awonwaan.

28 Absalọm akedʌñ ke Yeruselem isua iba, ado ikikịtte adidem iso. 29 Ndin Absalọm amaadọñ ekoot Yoab nọ adọñ anye anọ adidem, ado Yoab amaasịn adidikịt anye. Anye amaamaana adọñ ayọhọ akañ iba, ado Yoab ikisʌkkọ idi. 30 Ndin anye amaabo ikọd amọ, "Sese, inwañ Yoab ada akpere ake mmi, ñko anye anie baali do. Ikaa, ikisʌm ikañ isịn." Ndin ikọd Absalọm emaefọp inwañ ado ke ikañ.

31 Ke akpatre, Yoab amaadika ufọk Absalọm, anyʌñ akebịp anye abo, "Nsoo ido nọ nditọufọk mfo esịn ikañ ke inwañ mmi?"

32 Absalọm amaabo Yoab ate, "Sese, ami mmaadọñ utom unọ fiin ñnyʌñ mbo nte, ‘Di mi nọ udọñ yak akebịp adidem abo, "Ntak a-ami ñkenyọññọ ke Kesọọ ndi-e? Akpaakefọn ye ami adieke ñkpekesʌkkọ mba do!" ’ Ke ntoro, ami ñyem adikịt iso adidem, ñko akpedo ami mmedue ñkpọ ndomokeed, yak anye añwot miin."

33 Ndin Yoab amaakaa akedọkkọ adidem ntoro. Akem adidem amaadọñ ekoot Absalọm, anye amaanyʌñ adʌk adi, anye adisuuk iso amọ ke isọñ ke iso adidem. Adidem ndin amaatʌm Absalọm inua.