1 Afịd esiin Isrel emaedisoobo iwuod ye Defid ke Hibrọn enyʌñ ebo anye, "Ñnyịn ido abʌk ye iyiib mfo. 2 Ke mme usen edem ke idaha Sọọl akedooho adidem ñnyịn, afo akedo awo a-akesidatta Isrel usʌñ akaa ekọñ. Ñko Abọọñ amaudọkkọ fiin ate, ‘Afo ayaado andikpeme ikọd mmi Isrel, ndin afo ayaado andikara ammọ.’ "

3 Ke ini afịd mme ñkpisọñ ke Isrel emaekedisoobo ye Adidem Defid ke Hibrọn, anye adidem amaanam edioomo ye ammọ ke Hibrọn ke iso Abọọñ, ndin ammọ emaeyet Defid adan nte adidem ke Isrel.

4 Defid akedo isua edịb mme duob ke ini anye akedooho adidem, anye ñko akekara ke isua aba. 5 Ke Hibrọn anye akekara isua itiaba mme afiọñ itiokeed ke Yuda, anyʌñ akara isua edịb mme duob mme ita ke Yeruselem ye ke afịd Isrel mme Yuda.

6 Adidem ye mbonekọñ amọ emaedʌk Yeruselem adinwana ye mbon Yebus, e-ekedʌññọ do. Mbon Yebus emaedọkkọ Defid ete, "Afo uduudʌkkọ umi, kpa mme nnan ye mme mbʌñọ ekeme adubịne fiin nsio." Ammọ emaekere ebo, "Defid idiikanna idʌk idi mmi." 7 Kpayeado, Defid amaadʌk abọ akpọsọñ itie ke Saiyọn, a-adooho Abio Defid.

8 Ke usen ado Defid akebo, "Awo ndomokeed a-adiikan mbon Yebus anie adito adu usʌñ mmọọñ ñkesịme mme ‘mbʌñọ ye nnan’ e-edooho mme asua Defid.*" Ado anam ammọ ebo, "Mme ‘nnan ye mbʌñọ’ idiidʌkkọ akwere adidem."

9 Defid ndin amaadat akpọsọñ itie Saiyọn anam itieidʌñ amọ anyʌñ akoot anye Abio Defid. Anye amaabọp ndibene akanna anye akʌk, tọọñọ ke unaisọñ abod tutu adʌk esịd. 10 Ndin Defid amaanenekke akop uko, sia Abọọñ Abasi Andikponñkan amaaba ye anye.

11 Akema Hiram adidem Tai amaadọñ ikpọ isʌñutom anọ Defid, esaña ye mme mboi eto sida, mme akọñeto ye mme abọbufọk itiad, ndin ammọ emaebọp akwere enọ Defid. 12 Ke ntoro, Defid amaadiọọñọ ke Abọọñ amaisio imọ anịm nte adidem andikara Isrel anyʌñ adịppe itie ubọọñ imọ ke anyọñ ke ntak ikọd amọ Isrel.

13 Defid amaanie uwak ibaan esa ye ataa ibaan ndọ ke Yeruselem, ke anye amaakekpọñ Hibrọn, ndin anye amaabon uwak nditọ ideen ye nditọ ibaan mfen do. 14 Mme anyịñ nditọ se ekeman enọ anye ke Yeruselem edoñño ami: Samua, Sobab, Natan, Sọlọmọn, 15 Ibha, Elisua, Nefek, Yafia, 16 Elisama, Eliada ye Elifeled.

17 Ke ini mbon Filistia emaekekop ke emaeyet Defid adan nte adidem ke afịd Isrel, ammọ emaedọọk ekaa ke afịd adudu adikiyem anye, ado Defid amaakop abaña, anye amaasọiyọ adʌk ke akpọsọñ itie. 18 Akem mbon Filistia emaedi editara eyọhọ Abedeñ Refaim; 19 Ke ntoro Defid amaabịp Abọọñ "Nte ñka ñkenwana ye mbon Filistia? Afo ayaayaak ammọ ansịn miin ke ubọk?"

Abọọñ amaabọọrọ anye ate, "Kaa, sia ke akpanikọ ami ñyaayaak mbon Filistia usịn fiin ke ubọk."

20 Ndin Defid amaakaa ke Baal Perasịm,* do ke anye akekan ammọ. Anye amaabo, "Naña mmọọñ abomo awuọñọ, ukem ado ke Abọọñ aboom mme asua mmi ke iso mmi." Ntak ado anam, ekedikoot itie ado Baal Perasịm. 21 Mbon Filistia emaefeeñe ekpọñ mme abasi ubọk awo ammọ, ndin Defid ye ikọd amọ emaekoono ammọ enyọñọ.

22 Ini keed mfen, mbon Filistia emaemaana edi, editara eyọhọ Abedeñ Refaim; 23 ke ntoro Defid amaabịp Abọọñ, ndin anye amaabọọrọ ate, "Kuusaña nnen-nnen ukaa, saña to edem kanna ammọ kʌk, nyʌñ nwana ye ammọ ke iso mme eto pọpla. 24 Emaesʌk ekokop uyom ntịm ñkpad isañ ke mme anyọñ eto pọpla, saña dʌk usọp-usọp sia ado adiiwọt ke Abọọñ ibem iso awuọ akaa adikiwoot mbon ekọñ Filistia." 25 Ndin Defid amaanam naña Abọọñ akenọọ anye uyio, anye amaanyʌñ awoot mbon Filistia tọọñọ ke Kibiọn* akewuọ Kesa.