1 Ke adidem amaaketuakka atie ke akwere amọ, ndin ke Abọọñ amaakenọ anye emem ke atu mme asua e-ekekannake anye ekʌk, 2 adidem amaadọkkọ prọfed Natan ate, "Se miin mi, naña ndʌñ ke ufọk sida, ke ini akebe edioomo Abasi asịneke ke atayad."

3 Natan amaabọọrọ adidem ate, "Se idodo usịneke fiin ke akikere, nam ado, sia Abọọñ aba ye afo."

4 Ado ke akonayio ado, uyio Abọọñ amaabo Natan, ate:

5 "Kaa kedọkkọ awo mmi Defid bo, ‘Se Abọọñ atañ ado ami: Nte afo ado awo se idiibọp ufọk innọ miin yak ndʌñ ke esịd? 6 Ami ndʌññọ ke ufọk tọọñọ ke usen ami ñkebenne nditọ Isrel nsio ke isọñ Iyib tutu usen mfịn. Ado ami ñkesaña ke itie mme itie ye atayad nte itie idʌñ. 7 Ke afịd usʌñisañ mmi ye nditọ Isrel, akenam ami mmaadọkkọ keed ke atu mme andikara ammọ ami ñkenọọhọ mbo ebọọk ikọd mmi Isrel nte, "Nsoo ido ke ndufo ekama sida ebọp ufọk ennọ miin?" ’

8 "Idahami ndin, dọkkọ isʌñutom mmi Defid, ‘Se Abọọñ Andikponñkan atañ ado ami: Ami ñkuben fiin ñkpọñ itie ubọọk ufene, uben nsio ke ukpeme ufene, ñnyʌñ umek fiin andikara ikọd mmi Isrel. 9 Ami mmeba ye afo ke itie nte afo akaaka, ndin mmediañña afịd mme asua mfo mfep ke iso mfo. Idahami ami ñyaanam anyịñ mfo akpon, aba nte anyịñ mme ñkpọsọñ awo ke ederimbod. 10 Ami ñyaanịm itie nnọ ikọd mmi Isrel ñnyʌñ nsọọñọ ammọ nnịm nọ ammọ enie itieidʌñ ammọ, mbaak awo adifịna ammọ aba. Mbon ibak idiifiighe ammọ aba, nte naña ammọ ekenam ke aditọọñọ 11 nte e-enyʌññọ enam tọọñọ ke ini ami ñkemekke mme adaaha* nnọ ikọd mmi Isrel. Ami ñyaanyʌñ unọ fiin nduọkadudu nto ubọk mme asua mfo.

" ‘Abọọñ usian fiin abo ke Abọọñ ke idem amọ adiibọp ufọk unọ fiin: 12 Mme usen uwem mfo ke isọñ emaekweeñe nọ afo akeduọk adudu ye mme eteete mfo, ami ñyaabenne nditọ mfo ndot ke itie ubọọñ mfo, adiido abʌk ye iyiib mfo, ñyaanyʌñ nnam ubọọñ amọ asọọñọ ada. 13 Anye ado awo a-adiibọp ufọk inọ Anyịñ mmi, ndin ami ñyaanam ebekpo ubọọñ amọ ada ke nsi-nsi. 14 Ami ñyaado ete amọ, anye ayaanyʌñ ado ayịn mmi. Anye amaanam ndudue, ami ñyaatʌnọ anye ke ikpa a-awo abọppọ, ke umia ake ubọk awo. 15 Ado tutu amama awo idiibọọhọ anye ima mmi, nte naña ami ñkeben nsio ñkpọñ ye Sọọl, ake ami ñkedooroke nsio ke iso mfo. 16 Ufọk mfo ye abioubọọñ mfo eyaesọọñọ eda ke iso mmi ke nsi-nsi; ebekpo mfo ayaada ke nsi-nsi.’ "

17 Natan amaakedọkkọ Defid afịd mme ikọ ñkukịd ami.

18 Ndin adidem Defid amaadʌk aketie ke iso Abọọñ, anyʌñ abo ate:

"Ami ndo anie awo, Abọọñ Andikara, ubon mmi ado nsoo, nọ afo andịppe miin awuọ utọ ekamba itie ami? 19 Ndin aba nte ami isʌkkọ ikekem ke anyen mfo, Abọọñ Andikara, afo amaana atañ ikọ abaña ini iso ufọk isʌñutom mfo, ndin ewʌhọ ami, Abọọñ Andikara, anọ ñkaña awo* nte ami!

20 "Nsoo ñkpọ mfen ke Defid akeme aditañ ye afo? Sia afo amediọọñọ awo mfo, Abọọñ Andikara. 21 Ke ntak ikọ mfo ye ke uduak mfo, afo amenam utọ ekamba ñkpọ ami, anyʌñ anam awo mfo adiọọñọ abaña.

22 "Afo amenekke akpon, Abọọñ Andikara! Ibaaha anditie nte afo, inyʌññọ iba Abasi mfen kpa afo ikpọọñ, nte naña ñnyịn ikop ke utọñ ñnyịn. 23 Ndin mme anie iba nte ikọd mfo Isrel, idịd keed ke iso isọñ ake Abasi akekaaha akefak asio anọ idem amọ, anyʌñ anịm anyịñ anọ idem amọ, anyʌñ anam ñkpoon ye mme ñyọọ-ñyọọ utịppeñkpọ ke adibịne mme idịd ye mme abasi ammọ nsịññe ke iso ikọd mfo, ake afo akefakka asio ke isọñ Iyib?* 24 Afo amaanam ikọd mfo Isrel edo asaña-asaña ake mfo ke nsi-nsi, afo ñko, Abọọñ, amaanyʌñ akappa ado Abasi ammọ.

25 "Ndin idahami, Abọọñ Abasi, kpono enwọñọ a-afo anamma abaña awo mfo ye ufọk amọ. Nam naña afo akenwọñọ, 26 ma anyịñ mfo akpon ke nsi-nsi. Ndin mme awo eyaebo ete, ‘Abọọñ Andikponñkan ado Abasi ke afịd Isrel!’ Ñko ufọk awo mfo Defid ayaasọọñọ ada ke iso mfo.

27 "Abọọñ Andikponñkan, Abasi Isrel, afo ameyaara ñkpọ ami anọ afʌnadeen mfo ate, ‘Ami ñyaabọp ufọk unọ fiin.’ Ke ntoro awo mfo anie uko adibọñ akam ami unọọ fiin. 28 Abọọñ Andikara, afo ado Abasi! Enwọñọ mfo ado akpanikọ, afo amenyʌñ anwọñọ mme nti ñkpọ ami anọ awo mfo. 29 Ndin yak unem fiin esịd idahami adidiọñ ubon isʌñutom mfo, nọ anye akaiso aba ke iso mfo ke nsi-nsi; sia afo, Abọọñ Andikara, ametañ ikọ, ndin ye adidiọñ mfo eyaediọñ ufọk isʌñutom mfo ke nsi-nsi."