1 Nte ñkpọ akaaha iso, adidem mbon Amọn amaakpa, ndin ayịn amọ Hanun amaadat itie amọ nte adidem. 2 Defid amaakere ke esịd amọ ate, "Ami ñyaafọn ido ye Hanun ayịn Nahas, kpa naña ete amọ akefọn ido ye ami." Ndin Defid amaadọñ mme isʌñutom ekedọñ Hanun esịd ke ntak ñkpa ete amọ.

Ke mme isʌñutom Defid emaekewuọ ke isọñ mbon Amọn, 3 mme adaiso mbon ekọñ Amọn emaebo Hanun abọọñ ammọ ete, "Afo akere abo ke Defid akpono ete mfo ke anye adidọñ mme ikpọ isʌñutom inọọ usọk abo edudọñ esịd? Ñkọ idooho Defid anam ñkara adidọñ ammọ unọ fiin nọ ediyep abio enyʌñ eduuñọ naña etọ anye ekat?" 4 Ke ntoro Hanun amaamuum mme ikpọ isʌñutom Defid, akwaat mbakka iba ñwaebek kwa awo, afat afọñidem ammọ ke itie efʌd aduọọñọ, ndin abịn ammọ ate enyọñọ.

5 Ke emaekedọkkọ Defid ñkpọ ami, anye amaadọñ isʌñutom ekesoobo ammọ, sia emaenekke esuenne ammọ. Adidem amaanọ uyio ate, "Ndufo iba ke Yeriko tutu ñwaebek ndufo amaana atịppe, mbemiso ndufo enyọñọ edi."

6 Ke ini mbon Amọn ekekịtte ebo ke mmimọ imiyat Defid esịd, ammọ emaekekpe mbonekọñ usaña ke ikpad mbon Aram awo tọsịn edịb (20,000) eto Bed Rehob ye Aram Soba, ye adidem Maaka ye ideen tọsịn keed (1,000), ye mbon Tob awo tọsịn duob mme iba (12,000) ke Tob.

7 Defid akekop ami, anye amaasio Yoab ye afịd udịm mbon unwana ekọñ. 8 Mbon Amọn emaewuọñọ edibeeñe idem enyʌñ eda ke udịm unwana ekọñ ke inuaatob abio ammọ, ke ini mbon Aram Soba ye Rehob ye ikọd Tob ye Maaka ekebaaha ke idem ammọ ke anwa esịd idịd.

9 Yoab amaakịt ke mme udịmekọñ mmọdo eba ke iso ye ke edem amọ, anye ndin amaasat ubaak mme nta anwanaekọñ ke Isrel anyʌñ asio ammọ adọñ eka ekenwana ye mbon Aram. 10 Anye amaasịn ubaak mbon ekọñ se ikisʌhọ ke idak ndadusʌñ Abisai ayịneka amọ awodeen, ndin emaedọñ ammọ eka ekenwana ye mbon Amọn. 11 Yoab amaabo ate, "Adieke mbon Aram esọññọ adudu eñkan miin, ndin ana ndufo ediñnyaaña miin; ado mbon Amọn ekpesọñ adudu ikan ndufo, ndin ami ñyaadi ndinyaaña ndufo. 12 Ikop uko, yak ñnyịn inyʌñ inwana uko-uko inọ ikọd ñnyịn ye mme abio ake Abasi ñnyịn. Abọọñ ayaanam se ifọn anye ke anyen."

13 Ndin Yoab ye udịmekọñ e-ekesañake ye anye emaewuọñọ ekaa edinwana ye mbon Aram, ndin mbon Aram emaefeeñe ke iso amọ. 14 Ke ini mbon Amọn ekekịtte ebo ke mbon Aram ekesʌk efeeñe, ammọ emaefeeñe ke iso Abisai enyʌñ edọñọ esịd abio. Ndin Yoab amaanyọñ akpọñ adinwana ye mbon Amọn anyʌñ adi Yeruselem.

15 Ke ini mbon Aram emaekekịt ke Isrel ikan mmimọ, ammọ emaemaana eboho itie keed. 16 Hadadesa amaanam nọ ekoono mbon Aram ekaaña edem Akpa Yufretis edi; ammọ emaedika Helam, esaña ye Sobak adaiso mbon ekọñ Hadadesa akedat ammọ usʌñ.

17 Ke emaekedọkkọ Defid ibaña ñkpọ ami, anye amaakoot afịd Isrel abok, ndin amaanyʌñ akaaña Yọdan akewuọ Helam. Mbon Aram emaetịm udịmekọñ ammọ adikisoobo ye Defid ñnyʌñ ñnwana ye anye. 18 Ado mbon Aram emaefeeñe ke iso Isrel, ndin Defid amaawot mbon ake ekewatta sariọd ekọñ ammọ tọsịn itiaba (7,000) ye mbon ekọñ ake ekesañake ke ukod ammọ tọsịn aba (40,000)*. Anye amaanyʌñ awot Sobak, adaiso mbon ekọñ ammọ, ndin anye amaakpa ke ndo. 19 Ke afịd ndidem e-ekebaaha ke idak Hadadesa emaekekịt naña Isrel ekan ammọ ke ekọñ, ammọ emaenam emem ye nditọ Isrel enyʌñ ekappa eba ke idak ukara Isrel.

Ke ntak ado ndịk ikiyakka mbon Aram enwam mbon Amọn aba ke ekọñ.