1 Defid akekwọ anọ Abọọñ mme ikọ ikwọ ami ke ini Abọọñ akenyaañake anye asio ke ubọk afịd mme asua amọ, ye ke ubọk Sọọl. 2 Anye akebo ate:

"Abọọñ ado akwa itiad mmi, itie udịbe mmi ye ubọkkọ mmi;

3 Abasi mmi ado akwa itiad mmi, ke anye ke ami ndʌk ndịbe;

atuekọñ* mmi ye nnʌk* adinyaaña mmi.

Anye ado akpọsọñ ubọkkọ mmi, udịbe ye andiñnyaaña miin

afo ameñnyaaña asio ke ubọk mbon afai.

4 "Ami mmaakoot Abọọñ, a-adotto itooro,

ndin anye amañnyaaña miin asio ke ubọk mme asua mmi.

5 Mme awawa ñkpa emaeñkanna miin ekʌk;

mme ukwọ nsobo emaemfuuk miin.

6 Mme udʌk udi emaeñkanna miin ekʌk;

mme afia ñkpa emaennaa miin ke iso.

7 "Ke nnananyen mmi ami mmaakoot Abọọñ;

Ami mmaabọñ ñkoot Abasi mmi.

Anye amaatie ke tembịd amọ akop uyio mmi;

uyio ñkpo mmi amaasịm anye utọñ.

8 Isọñ amaanyeñ anyʌñ anyeeñe,

mme itiad idakisọñ mme hefịn* emaenyeeñe,

ammọ emaenyeeñe sia anye amaayat esịd.

9 Nsʌñikañ amaawuọ anye ke aduiwuo,

akwa ikañ amaanyʌñ awuọ anye ke inua,

eboho ikañ amaabịppe ato do asak.

10 Anye amaabakka mme hefịn anyʌñ asọiyọ adi;

ñkịm-ñkịm ntọñanyọñ amaaba anye ke idak ikpad.

11 Anye amaadoro ke anyọñ serubim anyʌñ afuurọ;

anyʌñ afuurọ adọọk ke mba afịm.

12 Anye amaanam ekịm ado kanopi amọ akanna anye,

mme ñkịm-ñkịm* ntọñanyọñ edịm ke ikpaanyọñ.

13 Ato ke uyamma iso amọ

mme eboho akebkeb emaebịmme ewuọ.

14 Abọọñ amaatuak ke anyọñ nte aduma;

uyio ataa Andikoñ Ñkan amaasakka;

15 Anye amaatop idañ amọ anyʌñ asuan mme asua,

amaanyʌñ adọñ mme akpọsọñ akebkeb adisuan ammọ.

16 Mme abedeñ akpainyañ mmọọñ emaewuọñọ edudak

ndin mme itiad idakisọñ ederimbod emaewuọñọ eda

ke nduaiya ake Abọọñ,

ke mfiara afịm ake aduiwuo amọ.

17 "Anye amaatie ke anyọñ asio ubọk ammʌm;

anye amandʌt miin asio ke ntotəño mmọọñ.

18 Anye amamfak miin asio ke ubọk akpọsọñ asua mmi,

ansio ke ubọk mme asua ekesọññọ adudu eñkan miin.

19 Ammọ emaetuaha ye ami ke usen ukuud mmi,

ado Abọọñ akedo ibededem mmi.

20 Anye amansio miin asịn ke ñnwaña uyaiya itie;

anye amamfak miin sia anye amaanem esịd ye ami.

21 "Abọọñ anam ye ami akeene adinenido mmi;

anye amannọ miin utịb akeene naña ubọk mmi asana.

22 Sia ami mmekpeme usʌñ Abọọñ;

ami ndueghe ke adiwọññọ ñkpọñ Abasi mmi.

23 Afịd mme mbed amọ enna miin ke iso;

ami ñwọññọke iso ñkpọñ mme ewʌhọ amọ.

24 Ami mmenana ndo ke iso amọ

ñnyʌñ nsio idem mmi ke usʌñ idiọọkñkpọ.

25 Abọọñ annọ miin utịb akeene adinenido mmi,

akeene naña ubọk mmi asana* ke iso amọ.

26 "Afo anam akpanikọ ye mbon se inam akpanikọ ye afo,

afo awọt idem mfo nte anana ndo anọ mme anana ndo,

27 afo amenịm idem mfo ke adisana, ye mbon se isana,

ado ye mbon mbubịk, afo amewọt ñkara.

28 Afo anyaaña mbon ake esuuhọke idem,

Ado anyen mfo ase mbon ntañidem, adisuuhọ ammọ.

29 Afo, Abọọñ, anam utuenikañ mmi asak;

ñko Abọọñ akappa ekịm mmi asịn ke unwana.

30 Ato ke unwam mfo ami mmekan ñnwana ye udịmekọñ*;

ye Abasi mmi ami mmekan ntamma mfrọ akọ.

31 "Amaado Abasi, usʌñ amọ afọn ama:

ikọ Abọọñ inieghe ndo;

anye ado atuekọñ anọ afịd mbon se idịbe ke anye.

32 Anie ado Abasi ke imiibọhọke Abọọñ?

Anie ñko ido Itiad ke imiibọhọke Abasi ñnyịn?

33 Ado Abasi annọ miin adudu*

anyʌñ anam usʌñ mmi asọọñọ ada anen.

34 Anye anam ukod mmi aba nte ukod edob;

anye anam nọ ami nda ke mme ñkoñ-ñkoñ itie.

35 Anye akpeep ubọk mmi anịm anọ usen ekọñ;

adọọn ubọk mmi akeme adinuuk utịgha brọns.

36 Afo anam adinyaaña unwam mfo ado atuekọñ mmi;

unwam mfo anam ami ñkpon.

37 Afo amenọ ikpad mmi ñnwaña-ñnwaña usʌñ isañ,

mbaak itọñukod mmi adiyekke.

38 "Ami mmaabịne mme asua mmi ñnyʌñ nnuak ammọ;

ami ñkitịmmeke edem tutu esobo ammọ.

39 Ami mmaasọnnọ ammọ afịd-afịd, ndin ammọ ikanna idakka ida;

ammọ emaeduọññọ ke idak ikpad mmi.

40 Afo amannọ miin adudu unwana ekọñ;

afo amaasuuhọ mbon usua mmi ke iso mmi.

41 Afo amaanam mbon usua mmi etịmme edem efeeñe,

ndin ami mmaasobo mme asua mmi.

42 Ammọ emaetua eyem unwam, ado awo ikibaaha se inyaaña ammọ

emaekoot Abọọñ, ado anye ikibọọrọke ammọ.

43 Ami mmaanuak ammọ nọ edọrọ nte ntọñ isọñ;

ami mmaatịm ñnyʌñ nsọọk ammọ nte mbad ke efaak.

44 "Afo ameñnyaaña miin asio ke ubịne mme awo;

afo ameñkpeme miin nte adaiwuod ke mme idịd.

Mme awo se ami mmiikidiọọñọke enam ñkpọ ennọ miin idahami,

45 mbon idịd mfen esuuk iwuod ke iso mmi,

ke ini ammọ esʌkkọ ekokop uyio mmi, ammọ eñkpono miin.

46 Idem a-abọkkọ afịd ammọ;

ammọ enyeñ* idem ewuọñọ ke mme itie udịbe ammọ edi.

47 "Abọọñ adu uwem! Itooro anie Itiad mmi!

Yak edịppe Abasi mmi, Itiad, Andinyaaña mmi!

48 Anye ado Abasi a-asioho usiene iwuod mmi,

a-asịnne mme abio ke ukara mmi,

49 a-amfakka miin asio ke ubọk mme asua mmi.

Afo amambenne miin nọ ñkoñ ñkan mme asua mmi;

amamfak asio ke ubọk awo afai.

50 Ke ntoro, ami ñyautooro fiin, Abọọñ, ke atu mme idịd;

Ami ñyaakwọ mme itooro anyịñ mfo.

51 "Anye anọ adidem amọ ekamba adikan, ado tọwa adinyaaña amọ;

anye awọt anye e-emaekeyet adan inịm mfọn mma ima amọ,

anọ Defid ye ubon amọ ke nsi-nsi."