1 Ndin ami mmaakịt ekamba enyere mfen naña asọiyọ ato hefịn adi. Anye akesịne ntọñanyọñ nte afọñidem, ye adʌkabasi naña aba ke anyọñ iwuod amọ. Iso amọ akebit utịn, ndin mme ukod amọ ekebit mme adaaha ikañ. 2 Anye amaakama etək ikpañwed a-akekʌppọke ana ke ubọk amọ. Anye amaawuuk ukod nnasia amọ ke inyañ, ye ukod ufiin ke abod. 3 Anye amaabọọñ ñkpo nte ekpe akuun, ndin mme uyio aduma itiaba emaetañ ikọ. 4 Ndin ke ini mme aduma itiaba ado emaeketañ ikọ, ami mmaayem adiwet se ammọ eketañ, ado mmaakop naña uyio ato ke hefịn abo, "Sọọñọ mme ikọ se mme aduma itiaba ado etañ ke ufiikñkpọ, ado kuuwewet anye unịm."

5 Ndin enyere a-ami ñkekịtte naña ada ke inyañ ye ke abod amaadịppe ubọk nnasia amọ ke hefịn. 6 Ndin anye amaanwọñọ ke anyịñ andidu uwem ke nsi-nsi nsi-nsi, andikibot mme hefịn ye afịd se idọñọ ke esịd, isọñ ye afịd se idọñọ ke esịd, akpainyañ ye afịd se idọñọ ke esịd, anyʌñ abo, "Ubiadini idiibaaha aba. 7 Ado ke mme usen a-ayọhọ enyere itiaba adiifịt adukpoñ amọ, eyaenam mme ndedịbe ñkpọ Abasi ema, kpa naña anye amaaketatañ anọ mme isʌñutom ye mme prọfed amọ."

8 Ndin uyio a-ami mmaakekop nto hefịn amaamaana atañ ikọ ini keed mfen ye ami ate, "Kaa, keben ikpañwed a-akʌppọke ana ke ubọk enyere a-adaaha ke akpainyañ ye ke unaisọñ."

9 Ndin ami mmaakaa ñkebo enyere ado yak anye annọ etək ikpañwed ado. Ndin anye amambo miin, "Bọ mi nyʌñ ta. Ayaanam idịb mfo akpakpaiya, ‘ado ayaunem nte adanakwọọk ke inua.’ " 10 Ami mmaabọ etək ikpañwed ado ke ubọk enyere ado nta. Anye amaanem nte adanakwọọk ke inua mmi, ado ke ini ami mmaaketa anye mma, idịb mmi amaakappa akpakpaiya. 11 Ndin emaembo ete, "Ana afo amaana atañ prọfesi abaña uwak uduud awo, mme idịd, mme usem ye mme ndidem."