1 Ke ami amaakeboiyo, ami mmaakịt enyere mfen naña asọiyọ ato hefịn adi. Anye amaanie akpọsọñ adudu, ndin ederimbod amaayamma ato ke ntak uyai amọ. 2 Anye amaabọñ ke akpọsọñ uyio ate:

" ‘A-aduọ! Ekamba Babilọn a-aduọ!’

Anye adido itie idʌñ mme dimọn,

ye itie mme mbubiam sịbidịd esikibonoke,

itie mme afịd ndedeghe inuen,

mme ndedeghe ye mbubiam unam esikibonoke.

3 Sia afịd mme idịd e-enwọñ akpọsọñ ukọd efịbe amọ.

Ndidem ederimbod emaesịn efịbe ye anye,

ndin ñkpoon mme anyam udua ke ederimbod

emaekappa emọinyọ ato ke uwak ñkpọ udia uwem amọ."

4 Ndin ami mmaakop naña uyio mfen ato hefịn abo,

" ‘Ikọd mmi, iwuọñọ ikpọñ anye,’

mbaak ndufo idikeene iwuana ke mme ndiọiñkpọ amọ,

mbaak ndufo idinyʌñ ibọọ mme unọmọ amọ ndomokeed;

5 sia mme ndiọiñkpọ amọ edọọk ekesịm hefịn,

ndin Abasi a-atoiyo mme mbubịk amọ.

6 Itịmme inọ anye ukem se anye akenọọ,

ikpe anye ukpa iba se anye akenam.

Tọkkọ nọ anye ke udomo kọọb amọ akañ iba.

7 Nọ anye akpọsọñ ndutʌhọ ye mfʌhọ

yak akem ye ubọọñ ye eduek uwem se anye akenọọ idem amọ.

Ke esịd amọ anye asʌk awọk inua,

‘Ami ntie ke ebekpo nte abọọñanwaan.

Ami ndooho ebekpa;

ami ndiinyʌññọ mba ke mfʌhọ.’

8 Ke ntoro, ke usen keed mme unọmọ amọ eyaekan anye ubọk,

ñkpa, mfʌhọ ye akañ.

Ikañ ayaata anye asobo

sia Abọọñ Abasi andibiide ikpe nnọọ anye ado andikpon ñkan.

9 "Ke ini ndidem ederimbod e-ekesịnne efịbe ye anye, e-ekenyʌññọ ewuana ke mme ñkpọuto udia uwem amọ ediikịt nsʌñikañ a-afọppọ anye, ammọ eyaetua enyʌñ efʌhọ ke ntak amọ. 10 Ke akpọsọñ ndịk adiinam ammọ adikịt ndutʌhọ amọ, ammọ eyaeda nsan-nsan etua:

" ‘Nsobo! Nsobo unie fiin, ekamba abio,

afo Babilọn, akop adudu abio!

Ke idak awa keed, ikpe nsobo mfo a-adi!’

11 "Ikpọ mme anyamudua ederimbod eyaetua enyʌñ efʌhọ anye sia awo ndomokeed ideppe mme ñkpọ udua ammọ aba, 12 mme ñkpọ udua kold, silfa, nsọñudua itiad ye mme ñkwa; mfọọn linen, iduod-iduod, sịlk ye ndad-ndad afọñ; afịd utọ eto sitrọn, ye mme nsio-nsio ñkpọ e-edatta nnʌk eniin enam, nsọñudua eto, brọns, ukwak ye mabịd; 13 mme ñkpọ udua sinamọn ye spaisi, insensi, mee, frañkinsensi, ukọd ye adan ọlif, ndọdọrọ ndomuyo ye abakpa; mme enañ ye edọñ; enañmbakara ye ukpadñkpọ; ye mme awo enyamma nte ifʌn.

14 "Ammọ eyaebo, ‘Mfịd a-afo akeyemme u-ukpọñ fiin. Afịd inie ye mmọnyọ mfo e-esoomo, idiitịmmeke ubịne aba. 15 Mme ñwuọnda anyam udua e-ekesinyamma mme ñkpọudua enyʌñ enam inie ammọ eto anye, ediidada ke anyan usʌñ ise anye, ekop ndịk ke ukuud amọ. Ammọ eyaetua enyʌñ efʌhọ, 16 ndin ebọọñ ke akpọsọñ uyio ete:

" ‘Nsobo! Nsobo unie fiin, akpọsọñ abio a-akesisịneke linen,

iduod-iduod ye ndad-ndad anyʌñ asesem ye kold ye nsọñudua

itiad ye mme ñkwa.

17 Ke awa keed kpọd ekamba inie ado adʌk nsobo!’

"Afịd mme awadinyañ ye afịd mme andisika isañ ke nsʌñikañ, mme awat nsʌñikañ, mme afịd mbon uyem idịb udia nto mmọọñ eyaeda nsan-nsan. 18 Ke ini ammọ ekịtte nsʌñikañ a-awuọhọ ke ikañ a-afọppọ anye, ammọ eyaesio ñkpọ ete, ‘Kpaanaanam me aba abio nte utọ akpọsọñ abio ami?’ 19 Ammọ eyaeduọk ntọñ ke mme iwuod ammọ, ndin ke ntuaña ye mfʌhọ eyaebọñ ñkpo ebo:

" ‘Nsobo! Nsobo unie fiin, akpọsọñ abio,

itie a-afịd mbon se ikinie mme ubom ke akpa mmọọñ,

e-ekemọinyọke ato ke ntak imọ amọ!

Ke awa keed nsobo a-asịm anye!’

20 "Inem esịd ibaña anye, ndufo mme hefịn!

Inem esịd, ndufo ikọd Abasi!

Inem esịd, mme abọsịd ye mme prọfed!

Sia Abasi a-akpe ikpe amọ ye

ubiideikpe a-anye akebenne idot ndufo!"

21 Ndin ataa akop adudu enyere keed amaabenne ekamba itiad a-akekponno nte ekamba itiad ukọkñkpọ atop asịn ke akpainyañ anyʌñ abo:

"Ke utọ afai

ami ke ediitop Babilọn iduọk,

ndin awo ndomokeed idiikịtte anye aba.

22 Awo idiikoppo aba uto fiin ikwọ

mme abre ndido ye mme akwọikwọ,

mme afịdadʌk ye

mme afịd adukpoñ.

Awo idiikịtte mme anam utom usọ ke akwere mfo aba. Awo idiinyʌññọ ikop

uyom ukọkñkpọ uto fiin aba.

23 Awo idiinyʌññọ ikịt aba unwana ikañ a-atooho

utuenikañ naña ayamma uto fiin,

awo idiikoppo uyio ebendọ

ye anwaan ndọ aba.

Mme anyam udua mfo ekewuọ etob ekan afịd awo ke ederimbod.

Ato ke ntak mme ifọd mfo afịd mme idịd emaewakka ekpọñ usʌñ.

24 Ke idem amọ emaekịt iyiib mme prọfed ye ake mme ndisana ikọd Abasi,

ye ake afịd awo se ekewoot ke ederimbod."