1 Ndin ami mmaakop ekamba uyio naña ato tembịd abo mme enyere itiaba ado ate: "Ikaa ikitoomo mme bọwịd ifiobesịd Abasi itiaba ado idọñ ke ederimbod."

2 Akpa enyere amaakaa aketop bọwịd ifiobesịd amọ aduọk ke isọñ, ndin ndiọi inia a-akesañake ye akpọsọñ ubiak emaebomo ewuọñọ ke idem mbon e-emaekebọ idiọọñọ idiọọk unam enyʌñ ekpono ubobod mbid idem amọ.

3 Ayọhọ enyere iba amaatop bọwịd ifiobesịd amọ aduọk ke akpainyañ, ndin anye amaakappa iyiib, atie nte iyiib awo ñkpa, ndin afịd mme aduuwem ñkpọ ke akpainyañ emaekpañña.

4 Ayọhọ enyere ita amaatop bọwịd ifiobesịd amọ aduọk ke mme inyañ, mme idịm mmọọñ, ndin ammọ emaekappa iyiib. 5 Ndin ami mmaakop naña enyere andise ñkpọ mbaña mmọọñ abo:

"Afo Andido Adisana, amenen ke mme ubiideikpe ami,

Afo a-abaaha, a-akenyʌññọ ababa,

6 sia ammọ e-eduọk iyiib mme ndisana awo mfo ye ake mme prọfed mfo,

ndin afo amenọ ammọ iyiib enwọñ, kpa naña adot ye ammọ."

7 Ndin ami mmaakop naña akpokoro uwa abọọrọ:

"Ii, Abọọñ Abasi Andikponñkan,

mme ubiideikpe mfo edoñño akpanikọ ye unen."

8 Ayọhọ enyere inaañ amaaduọk usan amọ ke utịn, ndin emaenọ utịn unen adifọp mme awo ke ikañ. 9 Idem ammọ amaayaaña ato akpọsọñ ufiob, ndin ammọ emaesueñ anyịñ Abasi, Andikikara mme unọmọ ado, ado ammọ emaesịn edikappa esịd ñnyʌñ nnọọ anye ubọọñ.

10 Ayọhọ enyere ition amaaduọk bọwịd amọ ke ebekpo idiọọk unam ado, ndin ekịm amaafʌk abioubọọñ amọ. Mme awo emaedoom edeme ammọ ke ntak akpọsọñ ubiak, 11 enyʌñ esueñ Abasi ke hefịn ke ntak akpọsọñ ubiak ye inia a-aketaaha ammọ, ado ammọ emaesịn adikappa esịd ñkpọñ se ammọ ekenam.

12 Ayọhọ enyere itiokeed amaaduọk bọwịd amọ ke ekamba inyañ Yufretis, ndin mmọọñ amọ amaasat nọ abeeñe usʌñ anịm anọ mme ndidem e-etooho Usakkautịn. 13 Ndin ami mmaakịt mme ndedeghe sịbidịd ita e-ekebitte mme mfuọd; ammọ ekewuọñọ ke inua drakọn, ewuọñọ eto inua idiọọk unam ye inua prọfed abiaña. 14 Ammọ edoñño mme sịbidịd dimọn e-enaññake mme idiọọñọ, ndin ammọ ewuọñọ ebịne mme ndidem afịd ederimbod adikoono ammọ nọ edinwana ekọñ ke ekamba usen Abasi Andikponñkan.

15 "Sese, ami ndi nte inọ! Afọfọn anọ awo a-atabake idab anyʌñ asịne afọñ amọ ke idem, mbaak anye adisaña ifed anyʌñ adia ndọk."

16 Ndin ammọ emaekoono mme ndidem ederimbod ekaa itie e-ekootto Amakedọn ke usem Hibru.

17 Enyere ayọhọ itiaba amaatop bọwịd amọ aduọk ke afịm, ndin ekamba uyio amaato tembịd awuọ ke ebekpo abo "E-enam ema!" 18 Ndin mme unwana akebkeb emaesaiya, ndukuunọ ye akpọsọñ uyom aduma ye ekamba unyeñisọñ amaaba. Utọ unyeñisọñ ado kpaanaanam ibaaha tọọñọ awo aketọọñọ aba ke ederimbod; akedo akop akpaaña nsa. 19 Ekamba abio ado amaasakka ke mbaak ita, mme abio ke mme idịd mme idịd emaenyʌñ ewuuro. Abasi amaatoiyo Babilọn ekamba abio, anyʌñ anọ anye kọọb a-ayọhọke ye ukọd akpọsọñ ifiobesịd amọ. 20 Afịd mme isuọ emaefeeñe, awo ikikanna ikịt mme ikpọabod aba. 21 Mme edịm itiad e-ekedoppoke eyọhọ ñkpọ nte baun ikie* emaeto ikpaanyọñ ediduọññọ etọọñ mme awo. Ndin ammọ emaesueñ Abasi ke ntak unọmọ edịm itiad ado, sia unọmọ ado amaanie ndịk eti-eti.