1 Ke mme ñkpọ ami amaakeboiyo mmaakịt naña usʌñ hefịn ana inwañ. Ndin akpa uyio añkekoppo a-akebaaha nte uyom ekamba adukpoñ amaambo miin ate, "Saña dọọk di, yak ami uwọt fiin ñkpọ a-anaaha atịppe ke ini iso." 2 Ini keed Sịbidịd amamben miin, ndin sese mmaakịt ebekpo ke abio Abasi, awo anyʌñ atie ke ebekpo ado. 3 Andikitie do akeba nte yaspa ye rubi. Adʌkabasi a-akebitte emeraal amaakanna ebekpo ado akʌk. 4 Ebekpo edịb mme inaañ emaekanna ebekpo ami ekʌk ndin ñkpisọñ edịb mme inaañ emaetie ke mme ebekpo ado. Ammọ ekesịne mfia afọñidem enyʌñ eyaara ntinya kold ke iwuod. 5 Amịneñmịneñ amaato ebekpo ami akeppe, asana ye ndukuunọ ye akpọsọñ uyio aduma. Ke iso ebekpo ami, utuenikañ itiaba ekesʌk esak. Afịd ami edo sịbidịd Abasi itiaba. 6 Ñko ke iso ebekpo ñkpọ se ikiiba nte ndukpọñ akpainyañ amaaba, amaayamma nte kristal.

Ndin ke ufọọd ebekpo mme ñkanñkʌk amọ akedo mme aduuwem ñkpọ inaañ, e-ekeyọhọke ye anyen ke iso ye ke edem. 7 Akpa aduuwem ñkpọ akeba nte ekpe, ayọhọ iba akeba nte abaakenañ, ayọhọ ita akenie iso nte awo, ayọhọ inaañ akeba nte ntrukpuum a-afuurọkefuurọ. 8 Ndin afịd mme aduuwem ñkpọ inaañ ami ekenieñe mba itiokeed, enyʌñ enieñe anyen eyọhọ idem, kpa ye ke idak mba ammọ. Uweemeayio ye akonayio ammọ ikiduọkkọ adudu ke edibo,

" ‘Adisana, adisana, adisana

ado Abọọñ Abasi Andikponñkan,’

a-amaakebaba, a-abaaha, a-adiitịmme adi."

9 Ini akeedodo a-mme aduuwem ñkpọ ami enọọhọ anditie ke ebekpo a-aduuho uwem ke nsi-nsi ubọọñ, ukpono ye ekọọm, 10 mme ñkpisọñ edịb mme inaañ ado eduọññọ ke isọñ ke iso anditie ke ebekpo enyʌñ ekpono anye a-aduuho uwem ke nsi-nsi. Ammọ ebon ntinya ammọ ke ebekpo enyʌñ ebo:

11 "Abọọñ ye Abasi ñnyịn, afo amedot

adibọ ubọọñ ye ukpono ye adudu,

sia afo akebot afịd ñkpọ,

ndin ke unyịmme mfo emaebot ammọ,

ammọ enyʌñ enie uwem."