1 Ke anye amaakekʌppọ ayọhọ ufiikñkpọ itiaba, ndobo amaaba ke hefịn ke ñkpọ nte ubaak awa keed.

2 Ndin ami mmaakịt mme enyere itiaba naña eda ke iso Abasi, ndin emaenọ ammọ adukpoñ itiaba.

3 Enyere mfen a-akekamake ñkpọ ufọb insensi e-enamma ke kold, amaadida ke itie uwa. Emaenọ anye uwak insensi adifọp, ye mme akam mme ndisana ikọd Abasi ke itie ufọb uwa kold, ke iso ebekpo. 4 Nsʌñikañ insensi ado, ye akam mme ndisana awo emaeto ubọk enyere ado edọọk ekaa iso Abasi. 5 Ndin enyere ado amaaben ñkpọ ufọb insensi adọñ ikañ a-aketooho itie ufọbuwa, atop asuan ke isọñ. Ndin emaekop uyom ye ndukuunọ aduma, enyʌñ ekịt unwana ikañ akebkeb ye unyeñisọñ.

6 Ndin mme enyere itiaba e-ekekamake mme adukpoñ itiaba emaebeeñe idem adifịt ammọ.

7 Akpa enyere amaafịt adukpoñ amọ ndin edịm itiad a-akesañake ye ikañ ye iyiib amaadep aduọkkọ ke ederimbod. Ubaak ederimbod keed ke itie ita amaata ikañ akweeñe, ubaak keed ke itie ita ye mme eto emaenyʌñ eta ikañ ekweeñe, afịd mme awawa mbid emaenyʌñ esak ekweeñe.

8 Ayọhọ enyere iba amaafịt adukpoñ amọ, ndin emaetop ñkpọ a-akebaaha nte ataa ekamba abod a-akesakka ikañ esịn ke inyañ. Ubaak inyañ keed ke itie ita amaakappa ado iyiib. 9 Ubaak keed ke itie ita ke atu afịd ñkpọ se ikidu uwem ke esịd akpainyañ emaekpañña, ndin emaebiat ubaak keed ke itie ita nsʌñikañ ke akpainyañ.

10 Ayọhọ enyere ita amaafịt adukpoñ amọ, ndin ataa ekamba ntantaafiọñ, a-akeyammake nte ikañ emuum amaato ikpaanyọñ adiduọ ke akpammọọñ ayọhọ ubaak ita ye ke mme mmọọñ idịm. 11 Anyịñ ntantaafiọñ ado akedo Wọọmwuud*. Ayọhọ ubaak mmọọñ keed ke itie ita amaakappa adodoro ndin uwak awo se ikinwọñ emaekpañña eto idod mmọọñ ado.

12 Ayọhọ enyere inaañ amaafịt adukpoñ amọ, ndin emaetuak ayọhọ ubaak keed ke itie ita utịn, ayọhọ ubaak keed ke itie ita afiọñ ye ayọhọ ubaak keed ke itie ita ntantaafiọñ tutu ayọhọ ita ammọ afịd akappa abubịd. Ayọhọ ubaak ita usen ado ikinieghe unwana. Ayọhọ ubaak keed ke itie ita akonayio ñko ikinieghe unwana.

13 Ami ñkesʌk nse, ndikop naña ntrukpuum keed a-akesʌkkọ afuuro ke ufọọd anyọñ abọñ ke akpọsọñ uyio abo: "Nsobo! Nsobo! Nsobo anọ mme andidʌñ ke isọñ adiito uyio adukpoñ a-mme enyere ita e-esʌhọke ediifịt!"