1 Ndin drakọn ado amaada ke mben akpainyañ. Ndin ami mmaakịt naña idiọọk unam awuọ ke akpainyañ. Anye akenie nnʌk duob ye iwuod itiaba, anyanya duob enyʌñ edudot ke mme nnʌk amọ, ndin ke iwuod keedekeed emaewet anyịñ a-akenọọhọ Abasi usọñanyen. 2 Idiọọk unam a-ami ñkekịtte akebit ekpeikọd, ado anye akenie ñkpad nte anawịdekpe, inua amọ anyʌñ abit inua ekpe. Drakọn amaayaak adudu amọ ye ebekpo amọ ye ekamba adudu amọ anọ idiọọk unam ado. 3 Keed ke atu mme iwuod idiọọk unam ado akeba nte akenie ataa ekamba unan a-akpekedooho se iwot anye, ado emaekọk unan ado. Idem amaakpa afịd ederimbod ndin ammọ emaenyʌñ ekeene idiọọk unam ado. 4 Mme awo emaekpono drakọn ado, sia anye amaayaak ukara amọ anọ idiọọk unam ado. Ammọ emaenyʌñ ekpono idiọọk unam ado enyʌñ ebịp ete, "Anie awo itie nte idiọọk unam! Anie awo ikeme adinwana ekọñ ye anye?"

5 Emaenọ idiọọk unam ado inua aditañ mme ikọ asian-asian, ye mme ikọ isuuñọ ye adida ukara, ke afiọñ aba ye iba. 6 Anye amaakʌppọ inua amọ adisuuk Abasi uyio, anyʌñ asueñ anyịñ amọ ye itie idʌñ amọ ye mme andidʌñ ke hefịn. 7 Emaenọ anye adudu adinwana ekọñ ye mme ikọd Abasi ñnyʌñ ñkan ammọ. Emaenyʌñ enọ anye adudu adikara afịd ubon awo, aduuk, usem ye idịd. 8 Afịd mme andidʌñ ederimbod eyaekpono idiọọk unam ado, afịd awo se anyịñ ammọ imiiwereke ke ñwed uwem a-anieghe Ayịn Edọñ, e-ekewotto tọọñọ ke ini ekebotto ederimbod.

9 Awo akeedodo a-anieghe utọñ yak anye akop.

10 Awo akeedodo a-anaaha adʌk afʌn,

kpa afʌn ke anye adiidʌk.

Awo akeedodo a-anaaha ewot ke akañkañ,

kpa ke akañkañ ke ediiwot anye.

Ñkpọ ami ayem ataa ime ye nsọọñọnda ke mbuọdidem ato nditọ Abasi.

11 Ndin ami mmaakịt idiọọk unam mfen naña awuọ ato isọñ. Anye akenie nnʌk iba nte edọñ, ado atañ ikọ nte drakọn. 12 Anye akekama ukara anọ akpa idiọọk unam anyʌn anam ederimbod ye mme andidʌñ ke esịd ekpono akpa idiọọk unam e-ekekọkkọ ekamba unan ke iwuod amọ. 13 Ndin anye amaanañña mme ikpọ utịppe idiọọñọ, tutu asịm adinam ikañ asọiyọ ato hefịn adi isọñ ke iso afịd awo. 14 Ato ke ntak mme idiọọñọ e-ekenọọhọ anye adudu adinam ke iwuod akpa idiọọk unam, anye amaabiaña mme andidʌñ ke ederimbod. Anye amaawuuk ammọ ate enam ubobodñkpọ ke mbid ye ke ukpono akpa idiọọk unam emaekenọ unan ke akañkañ, akpesʌkado a-anye asʌkkọ adodu uwem. 15 Emaenyʌñ enọ anye adudu adinọ mbid akpa idiọọk unam inweek uwem nọ anye akan atañ ikọ anyʌñ anam ewoot afịd mbon se imiikinyịmmeke adikpono mbid akpa idiọọk unam ado. 16 Anye amaanyʌñ anyịk afịd awo, ntək ye ikpo, mme anie ñkpọ ye mme uweene, mme amanaisọñ ye mme afʌn, adibọ idiọọñọ ke ubọk nnasia me ke akpọiso, 17 mbaak awo ndomokeed adikan adep me anyam ñkpọ ibọhọke anye anie idiọọñọ a-adooho anyịñ idiọọk unam me ibad anyịñ amọ.

18 Ñkpọ ami ayem aniọñ. Yak awo a-anieghe ikike abat nọmba idiọọk unam ado, sia ado nọmba awo. Nọmba amọ ado ikie itiokeed mme ata mme itiokeed (666).