1 Ke ami amaakeboiyo, ami mmaakop se ikiba nte uyom ekamba atu awo ke hefịn naña ebọñ:

"Haleluya!

Adinyaaña ye ubọọñ ye adudu enie Abasi ñnyịn,

2 sia mme ubiideikpe amọ edo ke unen ye akpanikọ.

Anye a-abiom ekamba akpara ado ikpe,

anye a-akebiamma ederimbod ke efịbe amọ.

Anye a-asio akpara ado usiene ke iyiib mme isʌñutom amọ."

3 Ndin ammọ emaemaana ebọñ ñkpo ete:

"Haleluya!

Nsʌñikañ a-atooho anye adọọk aka ke nsi-nsi nsi-nsi."

4 Mme ñkpisọñ edịb mme inaañ ado, ye mme aduuwem unam ado emaeduọññọ ke isọñ ekpono Abasi, a-aketieghe ke ebekpo. Ndin enyʌñ ebọñ ete:

"Amen, Haleluya!"

5 Ndin uyio amaato ebekpo ate:

"Itooro Abasi ñnyịn,

afịd ndufo mme isʌñutom,

ndufo e-efegheke anye,

ntək-ntək mme ñkpoon!"

6 Ndin mmaakop se ikiba nte ekamba atu awo, nte uyom adufuud mmọọñ ye nte nsakka uwak aduma, naña ebo:

"Haleluya!

Sia Abọọñ Abasi Andikponñkan akara.

7 Yak ñnyịn idaara, inyʌñ inem esịd,

inyʌñ inọ anye ubọọñ!

Sia ini ndọ Ayịn Edọñ a-adi,

ndin anwaan ndọ abeeñe idem.

8 Emaenọ anye uyaiya nsem-nsem

ye nsana linen asịne"

(Uyaiya linen ada anọ ndinen utom mme ndisana ikọd Abasi.)

9 Ndin enyere amambo miin ate, "Wet: Afọfọn anọ mbon e-ekoodo ebo edi usọrọ ndọ Ayịn Edọñ!" Amaanyʌñ adian do ate "Mbon ami edoñño mme ikọ akpanikọ Abasi."

10 Ke emaeketañ ami, ami mmaaduọ anye ke ukod adikpono anye, ado anye amambo miin ate: "Kuunam ntoro! Ami ndo emọ-emọ isʌñutom nte afo ye nditọeka mfo ke Krais e-emʌmmọ ikọ ntiense Yisọs ekama. Ikpono Abasi! Sia Sịbidịd brọfesi ado se itie ntiense inọ Yisọs."

11 Mmaakịt hefịn naña ana inwañ, ndin ke iso mmi afia enañmbakara amaada, ekoot andiwad anye Nsọọñọnda ye Akpanikọ. Ke unen ke anye akpe ikpe anyʌñ anwana ekọñ. 12 Anyen amọ asak nte ndubek ikañ, anye anyʌñ ayara uwak anyanya ke iwuod. Anye anie anyịñ e-ewette anye ke idem a-adooho awo ndomokeed mfen idiọọñọke ibọhọke anye ke idem amọ kpọd. 13 Anye asịne afọñ e-ekenyiine ke iyiib, ndin anyịñ amọ ado Ikọ Abasi. 14 Mme udịmekọñ hefịn emaekeene anye, ewat ke anyọñ mfia enañmbakara enyʌñ esiine mfọọn linen, mfia ye nsaana. 15 Akañkañ a-asọppọ afịbe anye ke inua nọ anye adat asobo mme idịd. "Anye ayaakara ammọ ye esañ ukwak." Anye ado andidioho unuak ukọd iyadesịd ye ifiobesịd Abasi Andikponñkan. 16 E-ewet anyịñ amọ ke afọñidem amọ ye ke ifʌkkọ amọ:

Adidem mme Ndidem ye Abọọñ mme Mbọọñ.

17 Ndin ami mmaakịt enyere naña ada ke utịn, a-akebọññọ ke akpọsọñ uyio anọ afịd mme inuen se ifuurọ ke ufọọd anyọñ: "Idi, idiboho itie keed ke ekamba usọrọ udia Abọọñ Abasi, 18 nọ ndufo eta abʌk mme ndidem, ikpọ mbon ekọñ, ye mme awo e-ekoppo adudu, mme enañmbakara ye mme andiwad ammọ, mme abʌkidem afịd awo, amanaisọñ ye ifʌn, ntək-ntək ye ñkpoon."

19 Ndin mmaakịt idiọọk unam ye mme adaukara ederimbod ye mbon ekọñ ammọ naña ebono itie keed adinwana ekọñ ye andiwad afia enañmbakara ye mbon ekọñ amọ. 20 Ado emaemʌm idiọọk unam ado, ye prọfed abiaña a-akesinamma mme utịppe idiọọñọ ke iwuod amọ. Mme idiọọñọ ado ke anye akesikama ayaañ mbon e-ekebọọhọ idiọọñọ idiọọk unam enyʌñ ekpono mbid amọ. Emaetoomo ammọ awo iba edọñ ke ibiok ikañ sọlfọ. 21 Emaewoot mbon se ikisʌhọ ke akañkañ a-akewuọhọ ke inua andikiwat enañmbakara, ndin afịd mme inuen emaeyʌkkọ ato ke adita abʌk ammọ.