1 "Wet nọ enyere ufọkabasi ke Sadis:

Ami ado mme ikọ andikama sịbidịd Abasi itiaba ye ntantaafiọñ itiaba.

Ami mmediọọñọ mme utom mfo. Afo amewuọ etob nte ke asʌk adu uwem, ado amekpa. 2 Demme! Sọọñọ mme ñkpọ se isʌhọ e-eyemme adikpa, sia mmekịt ke utom mfo ikweeñeke ke iso Abasi mmi. 3 Ndin toiyo se afo abọọ anyʌñ akop. Nekke anye kama nyʌñ tua ñkpọfiọk. Ado afo umuudemmeke, ami ñyaadi nte inọ, ndin afo uduudiọọñọke ini se ami ndiidi ubịne fiin.

4 Kpayeado afo asʌk aneenie mme awo ifañ ke Sadis i-imiisappake afọñidem ammọ. Mbon ado eyaesaña ye ami, esịne mfia afọñidem, sia ammọ edot. 5 Anye a-akanna ayaanyʌñ asịne afia afọñ nte ammọ. Ami ndiisọọhọ anyịñ awo ado nsio ke ñwed uwem tutu amama, ado ñyaabo ke mmediọọñọ anyịñ ado ke iso Ete mmi ye mme enyere amọ. 6 Awo akeedodo a-anieghe utọñ yak anye akop se Sịbidịd adọkkọ mme ufọkabasi.

7 "Wet nọ enyere ufọkabasi ke Filadelfia:

Ami ado mme ikọ anye a-adooho adisana ye akpanikọ, anye a-akamake ukpọhọde Defid. Se anye atat awo ndomokeed ikanna ikọp, se anye anyʌñ akọp awo ndomokeed ikanna itat.

8 Ami mmediọọñọ mme utom mfo. Sese, ami mmenịm anainwañ usʌñ ke iso mfo ake awo ndomokeed miidiikanna ikʌk. Mmedọdiọọñọ ke inweek mfo ikponno, ado afo amenịm ikọ mmi, unyʌññọ ukañ anyịñ mmi. 9 Ami ñyaanam mbon e-edọñọke ke esob Setan, e-ebooho ke mmimọ idoñño mme Yuu, akpesʌkado ammọ idoññoke, ado edo mme asʌhọ nsu, ediduọññọ ke ukod mfo enyʌñ enyịmme anwa-anwa ke ami mmuma fiin. 10 Sia afo amenịm ewʌhọ mmi ke adibọ ke ime, ami ñko ñyaumʌm fiin ñkama ke ini idomo a-adiisịm afịd ederimbod nọ adidomo mbon se idʌñ ke iso isọñ.

11 Ami nsʌk nsọp ndi. Tʌm mʌm se afo anie kama, mbaak awo ndomokeed adubọọ anyanya mfo. 12 Anye a-akanna, ami ñyaanam anye ado adaaha ke tembịd Abasi mmi. Ammọ idiikpọññọ do aba. Ami ñyaawet anyịñ Abasi mmi ke idem ammọ ye anyịñ ufa abio Abasi mmi, ufa Yeruselem, a-asọiyọke ke hefịn ato Abasi mmi adi. Ndin ami ñyaanyʌñ ñwet ufa anyịñ mmi ke idem ammọ. 13 Awo akeedodo a-anieghe utọñ yak anye akop se Sịbidịd adọkkọ mme ufọkabasi.

14 "Wet nọ enyere ufọkabasi ke Laodisia:

Anye ami ado mme ikọ andido Amen, andisọọñọnda ye ntiense akpanikọ, anye a-adooho andikara afịd se Abasi abot.

15 Ami mmediọọñọ mme utom mfo, ke afo udeññekedeññe unyʌññọ ufofiop. Akpekapado afo ado keed ke atu ñkpọ iba ami. 16 Ndin sia afo abaaha mmeme-mmeme, ufioppofiop unyʌññọ udedeññe, mmebeeñe idem adufiat fiin nsio ke inua mmi. 17 Afo abo, ‘Ami mmenie inie; ami mmekọ uwak inie, ibaaha se ñyem.’ Ado afo udiọọñọke ke amenie mbọm, ado uweene ye nnan anyʌñ atie ifed. 18 Ami unọ fiin item nte ambọ miin kold e-emaekenam ke ufiob ikañ adep nọ afo akappa ado anie ñkpọ; mbọ ñko afia afọñidem dep sịne nọ afʌk ifed ye asuenne mfo. Dep ibọk sịn ke anyen mfo nọ ato do afo amọọnọ ñkpọ.

19 Mbon a-ami mmaaha ke ami nsua ñkpọ nnọ ñnyʌñ ntʌnọ. Ke ntoro, fọn ma nyʌñ kappa esịd. 20 Ami mmọdo nda ke inuausʌñ nsʌk ñkọñ. Awo akeedodo a-akoppo uyio mmi anyʌñ akʌkkọ usʌñ annọ miin, ami ñyaadʌk ndidia ñkpọ ye awo ado, anye anyʌñ adia ye ami.

21 Anye a-akanna, ami ñyaanọ anye unen aditie ye ami ke ebekpo ubọọñ mmi; kpa naña ami ñkekan ñnyʌñ ntie ye Ete mmi ke ebekpo ubọọñ amọ. 22 Awo akeedodo a-anieghe utọñ yak anye akop se Sịbidịd adọkkọ mme ufọkabasi."