1 Ndin enyere amañwọt miin inyañ mmọọñ uwem, a-asanake nte kristal, a-afegheke ato ebekpo Abasi ye ake Ayịn Edọñ 2 adiwuọ ufọọd ekamba usʌñ abio ado. Ke mbeñ iba inyañ ado eto uwem amaada a-akeyịreke ayọ mfịd duob mme iba, anyʌñ asio mfịd afịd afiọñ. Ndin mme mfañ eto ado, ado se edat ekọk mme idịd udọñọ. 3 Nsueñ ndomokeed idiibaaha aba. Ebekpo Abasi ye ake Ayịn Edọñ ediiba ke abio ado, ndin mme isʌñutom amọ eyaenam ñkpọ ekpono anye. 4 Ammọ eyaekịt anye iso, ndin anyịñ amọ ayaawere ammọ ke akpọiso. 5 Akonayio idiibaaha aba, ammọ idiiyemme unwana utuenikañ me unwana utịn, sia Abọọñ Abasi ayaanọ ammọ unwana. Ndin ammọ eyaeda ukara ke nsi-nsi nsi-nsi.

6 Enyere amambo miin, "Mme ikọ ami a-adot se enịm ke akpanikọ anyʌñ ado akpanikọ. Abọọñ, Abasi a-anọọhọ mme prọfed ifiọk, amaadọñ enyere amọ akewọt mme isʌñutom amọ mme ñkpọ a-anaaha asọp atịppe."

7 "Sese, Ami nsʌk nsọp ndi! Afọfọn anọ awo a-anịmme mme ikọ brọfesi a-adọñọke ke ikpañwed ami."

8 Ami Yọọn, ami ndo andikikop ñnyʌñ ñkịt mme ñkpọ ami. Ndin ke ami mmaakekop ñnyʌñ ñkịt ammọ, ami mmaaduọ ke isọñ ke ukod enyere ado adikpono anye a-akeñwọttọ miin mme ñkpọ ami. 9 Ado anye amambo miin: "Kuunam ntoro! Ami ndo emọ-emọ isʌñutom ye afo ye mme emọ-emọ prọfed ye afịd mbon e-enịmme mme ikọ ñwed ami. Kpono Abasi."

10 Ndin anye amambo miin: "Kuusiit ikọ brọfesi ñwed ami sia ini akpere. 11 Yak andinam idiọọk akaiso anam idiọọk; yak awo mbubiam akaiso ado mbubiam; yak andinam adinen ido akaiso anam adinen ido; ndin yak adisana awo akaiso ado adisana."

12 "Sese, ami nsʌk nsọp ndi! Utịb mmi mmọdo ye ami, ndin ñyaanọ awo keedekeed akeene se ammọ enam. 13 Ami ndo Alfa ye Omeka, Akpa ye Akpatre, Ntọọñọ ye Utịd.

14 "Afọfọn anọ mbon e-eyette afọñ ammọ, nọ ammọ ediinie unen ke eto uwem, enyʌñ eboiyo ke inuaatob edʌk esịd abio. 15 Ke esiin mme ewa ebañña, mme anam mayịk, mme asịn efịbe, mme asaña use, mme awodawo, mme akpono ndem ye afịd awo se ima inyʌñ inam nsu-nsu uwem.

16 "Ami, Yisọs, mmedọñ enyere Mmi adunọ fiin * mme ikọ ntiense ami esọk mme ufọkabasi. Ami ndo Adʌñ ye Ntịppe Defid, ye ñyayamma Ntantaafiọñ Ubakusen."

17 Sịbidịd ye ufa anwaan ndọ ete, "Di!" Ndin yak anye a-akoppo abo, "Di!" Awo akeedodo i-itọñ asatta, yak anye adi. Ñko awo a-amaaha, yak anye adibọ enọ mfọn mmọọñ uwem.

18 Ami mmedʌt afịd awo se ikop mme ikọ brọfesi ñwed ami utọñ. Awo akeedodo akpedian ñkpọ ndomokeed ke mme ikọ ami, Abasi ayaadian mme unọmọ e-etañña ebaña ke ñwed ami anọ anye. 19 Ndin adieke awo ndomokeed asioho ikọ ndomokeed afep ke ñwed brọfesi ami, Abasi ayaasio udeeme amọ afep ke eto uwem ye ke Adisana Abio, e-etañña ebaña ke ñwed ami.

20 Anye a-atañña mme ikọ ntiense ami abo, "Ii, Ami nsʌk nsọp ndi."

Amen. Di, Abọọñ Yisọs.

21 Yak mfọn Abọọñ Yisọs aba ye nditọ Abasi. Amen.