1 Mme ñke Sọlọmọn, ayịn Defid, adidem Isrel:

2 ke adinie aniọñ ye nnọitem;

ke adibọ ifiọk ye mbufiọk;

3 ke adibọ ukpeebñkpọ ke ido ndiọọñọidem,

adinam se inen inyʌñ ifọn inyʌñ idot;

4 ke adinọ mme akọi ndiọọñọidem,

nnọọ mme iwaad ifiọk ye mfarakeidem,

5 yak mbon aniọñ ekpañ utọñ enyʌñ edian ke ukpeebñkpọ ammọ

yak mbon eti iwuod enyʌñ ebọ ndadusʌñ,

6 ke adikama ndiọọñọ mme ñke ye mme ndọk,

mme ikọ ye mme uto mbon aniọñ.

7 Mbaak Abọọñ ado ntọọñọ ifiọk,

ado mme ndisịme esua aniọñ ye item.

8 Ayịn mmi, kpañ utọñ nọ item ete mfo

kuunyʌñ ufre anyen ubaña ukpeebñkpọ eka mfo.

9 Ammọ edo uyaraiwuod se inọ iwuod mfo mfọn

enyʌñ edo ñkpọitọñ adibana itọñ mfo.

10 Ayịn mmi, adieke ndiọi awo eyemme adutap fiin,

kuunyịmme unọọ ammọ.

11 Adieke ammọ ebooho, "Di diana ye ñnyịn;

yak ñnyịn idịbe ibem iyiib mbon i-imiidueghe,

yak ñnyịn idịbe ibet ukpọñ mbon i-imiinamma awo ibak;

12 yak ñnyịn iben ammọ imen ndisi, nte udi,

imen afịd, nte mbon e-eduọhọ edʌk ube;

13 ñnyịn iyainie nsio-nsio nti ñkpọ

inyʌñ iyọhọ mme ufọk ñnyịn ye mbịme;

14 diana ye ñnyịn;

afịd ñnyịn iyaiwuana ke mbịme ado,"

15 ayịn mmi, kuukeene ammọ ukaa,

kuusịn ukod ke usʌñ ammọ;

16 sia ikpad ammọ esọsọp adinam idiọọkñkpọ,

ammọ esọsọp ediduọk iyiib.

17 Ado ubiat ini aditat iyịre nduọọk

ke itie nte afịd inuen ekeme edikịt!

18 Utọ mbon ami edịbe ebem iyiib ammọ;

ammọ edịbe ebem idem ammọ kpọd!

19 Ami ado mme usʌñ mbon e-efegheke ebịne idiọọk udod;

anye ado abeben uwem mbon se inie anye afep.

20 Ke eferife, aniọñ asʌk abọọñ ke akpọsọñ uyio,

anye asio ñkpo ke anwa mbono;

21 ke anyọñ ndibene anye asio ñkpo,

ke inuaatob abio anye atañ ikọ amọ:

22 "Ndufo e-edooho mme akọi ediima akọi-akọi usʌñ ndufo ikpeene die?

Mbon nsaha ediikpeene die edikop inem ke edisak nsaha

mme ndisịme ediinyʌñ isua ifiọk ikpeene die?

23 Idat nduaiya mmi ikappa esịd!

Ndin ami ñyaanwañña mme akikere mmi ifʌk ndufo,

Ami ñyaanam ndufo ediọọñọ mme ukpeebñkpọ mmi!

24 Ado sia ndufo esịnne adikop idaha ami ñkoodo

inyʌññọ iba ndomokeed se iwuuk anyen ise idaha se ami nsio ubọk mmi ñnyan,

25 sia ndufo imiikoppo item mmi ndomokeed

inyʌññọ ikop nduaiya mmi,

26 ami ñyaakappa nsak ke ini afanekọñ amaisịm ndufo;

ami ñyainọ ñnyọ ke ini nnananyen amaisịm ndufo,

27 ke ini nnananyen amaiben ndufo nte ayobio,

ke ini afanekọñ amaiben ndufo nte idio,

ke ini ukuud ye mfịna emaikan ndufo ubọk.

28 "Idaha ado ammọ eyaeñkoot miin, ado ami ndiiyieghe;

ammọ eyaeñyem miin ado idiñkịtte miin,

29 sia ammọ emaesua ifiọk

ndin inyʌññọ imek adibaak Abọọñ.

30 Sia ammọ imiinyịmmeke edikop item mmi

enyʌñ esua nduaiya mmi,

31 ammọ eyaedia mfịd usʌñ ammọ

enyʌñ eyʌkkọ ye mfịd ndudiọ ammọ.

32 Sia unana nsọọñọnda mbon akọi adiiwot ammọ,

ndin uyʌkkọ mme ndisịme adiisobo ammọ;

33 ado awo akeedodo a-akpañña utọñ annọọ miin ayaadʌñ ke ifuuro

anyʌñ aba ke emem, ikoppo ndịk unọmọ."