1 Nsaad uyo ke emem ye ndobo a-afọn

akan ufọk usọrọ a-ayọhọke ye afanekọñ.

2 Ayịnufọk a-anieghe ndiọọñọidem ayaakara asuenneidem ayịn

anyʌñ anie udeeme adiaakpa nte keed ke atu nditọ ke ubon.

3 Ako ana anọ silfa edeeme ñko ikañ ana anọ kold,

ado Abọọñ adomo esịd.

4 Awo ibak akpañ utọñ anọ ñkpọkinua abiaña;

awo nsu akpañ utọñ anọ edeme nsobo.

5 Awo akeedodo a-asakka uweene asịn Abod ammọ ke ndek;

awo akeedodo a-adaarake abaña nnananyen itreke adibọ ufen.

6 Nditọnditọ edo anyanya enọ mbon usọñ,

Ete ye eka edo uku enọ nditọ ammọ.

7 Nneem inua idotto ndisịme i-imiidiọọñọke abasi,

nwaanwa dise ndiọọkñkan a-adooho asʌhọ nsu nnọọ adaukara!

8 Ubọkedem aba nte ibọk ke anyen awo andinọ;

ammọ ekere ke mfọniso ye uforo adiito do iwuọ afịd ini.

9 Awo akeedodo a-ayemme ima afʌk ndudue,

ado awo akeedodo a-amaanake atañ se imaikiboiyo asuan mme ufan ntandia.

10 Adiọọñọidem awo ama ntʌnọ

akan ubọkikpa ikie e-emiaha ndisịme awo.

11 Mbon ndoom esịn nsọñiwuod ye Abọọñ;

eyaedọñ isʌñutom ñkpa enọ ammọ.

12 Afọn adikisoobo amọnikọd ebọiyọ nditọ amọ

akan akọi a-asọọñọke ayịre ke ndisịme amọ.

13 Idiọọkñkpọ idiikpọññọ ufọk

awo a-akpeeghe utịb idiọọk ke eti ñkpọ.

14 Aditọọñọ utọk atie nte adifiọkkọ usʌñ mmọọñ;

ke ntak ado kuunam nọ utọk atọọñọ.

15 Aditoppo adueñkpọ ikpe ye adibiom adinen awo ikpe,

Abọọñ asua naña iba.

16 Nsoo ikpido ntak nọ mme ndisịme ekpekama akʌk ke ubọk eyem adidep aniọñ,

ke ini adooho aniọñ ikanna inwaña ammọ?

17 Ufan anie ima afịd ini,

ayịneka awodeen amana anọ ini nnananyen.

18 Awo i-imiinieghe eti iwuod atie ubiọñ

anyʌñ atie ubiọñ anọ mbọhọidʌñ.

19 Awo akeedodo a-amaaha utọk a-ama idiọọkñkpọ;

awo akeedodo a-abọppọ anyan inuaatob ayem nsobo.

20 Awo ake esịd amọ akwañake iforoke;

awo ake edeme amọ adooho abʌd-abʌd aduọ adʌk mfịna.

21 Adinie ndisịme nte ayịn adat iduọesịd adi;

inemesịd ibaaha inọ ete ye eka ndisịme i-imiibaaha abasi.

22 Esịd idaara ado eti ibọk,

ado esịd a-abaaha ke mfʌhọ asasaat akpọ.

23 Awo ibak abọ ubọkedem ke ndịbe

nọ anye awọññọ usʌñ unen.

24 Awo ikike anịm aniọñ ke iso,

ado anyen ndisịme ayoyo akanna utịd ederimbod.

25 Ndisịme ayịn adat iduọesịd asọk ete amọ

anyʌñ adat idod asọk eka a-akemanna anye.

26 Adieke adibọ adinen awo isob imiifọnnọ,

ke akpanikọ, adimia mme adaaha ukara e-enamma akpanikọ ikpa inenne.

27 Awo a-anieghe ifiọk ababat ikọ atañ,

ñko awo a-anieghe ndiọọñọidem isọppọ iyadesịd.

28 Idem mme ndisịme ebat ammọ nte mbon aniọñ ke ammọ ekpedop uyio,

enyʌñ ebat ammọ nte mbon ndiọọñọidem ke ammọ ekpefat edeme ammọ.