1 Ayịn awodeen mmi, adieke afo abọọhọ mme ikọ mmi

anyʌñ anịm mme ewʌhọ mmi ke esịd mfo,

2 asuuk utọñ mfo anọ aniọñ

anyʌñ asịn esịd mfo ke mbufiọk,

3 ke akpanikọ, adieke afo ayemme ikike

anyʌñ atua ayem ndiọọñọidem,

4 ndin adieke afo ayemme anye nte silfa

anyʌñ awuuk anyen ayem anye nte ndedịbe ñkpọuto,

5 idaha ado mbaak Abọọñ ayaunwaña fiin

afo ayaanyʌñ akịt ifiọk Abasi.

6 Sia Abọọñ anọ aniọñ;

ifiọk ye mbufiọk eto inua amọ.

7 Anye anịm uforo anọ ndinen awo,

anye ado atuekọñ anọ mbon i-ikpadisañ ammọ imiinieghe ndo,

8 sia anye akpeme usʌñ ndinen awo

anyʌñ akpeme usʌñ mme anam akpanikọ.

9 Ndin afo ayaadiọọñọ se ido eti ye se ifọn

ye se inen, afịd eti usʌñ ayaanekke unwaña.

10 Sia aniọñ ayaadʌk esịd mfo,

ñko ukpọñ mfo ayaakop inem abaña ifiọk.

11 Mfarakeidem ayaukpeme fiin,

mbufiọk ñko ayaukpeme fiin.

12 Aniọñ ayaufak fiin asio ke usʌñ mbon ibak,

asio ke ubọk mbon i-ikọ ammọ edooho abiaña,

13 mbon e-emaekekpọñ mme nnen-nnen usʌñ

ekesaña ke mme usʌñ ekịm,

14 mbon e-ekoppo inem ke adinam se imiinenne

enyʌñ edaara ke abʌd-abʌd idiọọkñkpọ,

15 u-usʌñ ammọ akwañake

e-enyʌññọ edo mbon akpọsọñ ñkara.

16 Aniọñ ayaanyʌñ ufak fiin asio ke ubọk awonwaan efịbe,

asio ke ubọk awonwaan akpara ye nneminua amọ,

17 a-amaakpọñ ebe uyịn amọ

anyʌñ afre edioomo a-anye akenamma ke iso Abasi.

18 Ke akpanikọ ufọk amọ aben awo asọiyọ akaa ñkpa

usʌñ amọ ñko aben akaa sịbidịd mme akpañkpa.

19 Ibaaha awo a-akaaha abịne anye atịmme anyọñ

me adisịm mme usʌñ uwem.

20 Ke ntoro, afo uduusaña ke mme usʌñ nti awo

anyʌñ akeene usʌñ ndinen awo.

21 Sia ndinen awo eyaedu uwem ke isọñ,

mbon se inana ndo ñko eyaedʌñ do;

22 ado eyaesobo mbon ibak esio ke iso isọñ,

ndin eyaenyʌñ ewai mbon abiaña esio efep.