1 A-afọn adido uweene u-usʌñ amọ ananake ndo

akan ndisịme i-ikọinua amọ adooho abʌd-abʌd.

2 Udọñ i-imiisañake ye ifiọk ifọnnọ,

nwaanwa dise naña asọp ukod isañ imiidiisoppo usʌñ!

3 Ndisịme ake awo adat awo anọ nsobo,

kpayeado ammọ eyat esịd ye Abọọñ.

4 Inie akoot mme uwak ufan,

ado ataa akpan ufan ntandia uweene afefeghe akpọñ ammọ.

5 Ntiense nsu idiitreke ibọ ufen,

awo akeedodo a-asʌhọke nsu idiibọkkọke.

6 Uwak awo eyem mfọn eto andikara,

ndin afịd awo edo ufan ye awo a-anọọhọ enọ.

7 Afịd mme ayakka mbon uweene esọsọọn ammọ,

nwaanwa dise naña mme ufan ammọ efeghe ekpọñ ammọ!

Akpesʌkado mme uweene efegheke ebịne ammọ ye ñkpeubọk,

awo ndomokeed ikịtte ammọ.

8 Awo a-anieghe aniọñ ama uwem;

awo a-amaaha mbufiọk ayaasọp aforo.

9 Ntiense nsu idiitreke ibọ ufen,

ñko awo akeedodo a-asʌhọke nsu ayaakịt nsobo.

10 Ndisịme awo idotto adidu eti uwem,

anenekke adiọọk afʌn adikara nditọ ideen abọọñ!

11 Aniọñ awo aman ime;

ado ke ufọn awo adifeen ndudue.

12 Iyadesịd adidem atie nte ñkuun ekpe,

ado mfọn amọ atie nte mbara ke mbid.

13 Ndisịme ayịn ado nsobo ete amọ,

ndin utọk-utọk anwaan atie nte

akọm ufọk a-adịtte atọi afịd ini.

14 Mme ufọk ye inie edo udeeme se awo anie ato ete ye eka,

ado adiọọñọidem anwaan ato Abọọñ.

15 Ifu asaña ye akpọsọñ idab,

ndin awo i-imiinieghe udọñ unam utom akpa abiọọñ.

16 Awo akeedodo a-anịmme mme ewʌhọ anịm uwem ammọ,

ado awo akeedodo a-asịnne usʌñ amọ ke ndek ayaakpa.

17 Awo akeedodo a-afọnnọ mfọn ye uweene awuọt Abọọñ ñkpọ,

Anye ayaanọ ammọ utịb ke se ammọ enam.

18 Tʌnọ nditọ mfo, sia idodanyen aba do;

kuudo andikeene nsaña usʌñ ñkpa ammọ.

19 Awo ifiobesịd ana akpe isob;

fak ammọ, ndin afo ayaamaana afak ammọ ke ini ke ini.

20 Kpañ utọñ nọ item nyʌñ nyịmme ntʌnọ,

ndin ke utịd eyaubat fiin esịn ke atu mbon aniọñ.

21 Uwak uduak esịne ke esịd awo,

ado uduak Abọọñ ikpọọñ awuọ ada.

22 Udọñ awo ado ima ammiikpuuho*;

afọn adido uweene akan adido asʌhọ nsu.

23 Uteeñe Abọọñ anọ awo uwem;

ndin awo adu ke uyʌkkọ, mfịna isịmme anye.

24 Awo ifu abuuk ubọk amọ ke usan;

anye idiikanna iben ikisịn ke inua amọ!

25 Mia asak awo ñkpọ, ndin akọi ayaakpeeb ndiọọñọidem;

sua nọ awo mbufiọk, ndin ammọ eyaedat idem ifiọk.

26 Awo akeedodo a-ayịppe ñkpọ ete ammọ anyʌñ abịne eka ammọ asio

ado ayịn abuud ye ndọk.

27 Ayịn awodeen mmi, tre adikpañ utọñ nnọọ item,

ndin afo ayaatịn usʌñ akpọñ mme ikọ ifiọk.

28 Abʌd-abʌd ntiense aduọi unen,

ndin inua awo ibak amen idiọọkñkpọ.

29 Enịm mme isob enọ mme asak awo ñkpọ,

ndin ntiim anaa anọ edem ndisịme.