1 Mme ñke Sọlọmọn mfen ake mme adaaha Hesikaiya, adidem Yuda eketuumọ ebono edo ami:

2 Ado ubọọñ Abasi adidịp ñkpọ;

adiduuñọ ñkpọ ndiọọñọ ado ubọọñ ndidem.

3 Kpa naña mme hefịn ekoñ isọñ anyʌñ atʌñọ,

kpa ntoro ke awo imiikanna iduuñọ esịd ndidem.

4 Kwokko mbad sio ke silfa,

ndin anamusọ silfa ayaakan anam usan;

5 sịññe mme ibak mbon utom ukara fep ke iso adidem,

ndin eyaewuuk ebekpo amọ ke adinenido.

6 Kuudịppe idem mfo ke iso adidem,

kuunyʌñ udat itie ke atu mme ikpọ adaaha amọ;

7 a-afọn anye adubo fiin, "Dọọk di mi,"

akan anye adusuenne fiin ke iso mme adaaha amọ.

Se afo akịt ke anyen mfo

8 kuusọp uben ukaa esob,

afo uduunam die ke utịd

adieke mbọhọidʌñ mfo usuenneke fiin?

9 Adieke abenne mbọhọidʌñ mfo akaa esob,

kuuyaara ikọ esịd idịb awo mfen,

10 imiidooho ntoro awo a-akoppo anye akeme adusuenne fiin

isoikpe mfo ayaanyʌñ asọọñọ ada.

11 Naña mme apịl e-enamma ke kold esịne ke usan silfa

ke nnekke-nnekke ubiideikpe ado.

12 Nte ñkpọutọñ e-enamma ke kold me ñkpọ mmaidem eti kold mfen

kpa ntoro ke ntʌnọ abiideikpe a-anieghe aniọñ aba ke utọñ mme andikob.

13 Nte ataa ndedeñ mmọọñ ke ini idọk

ntoro ke anam akpanikọ isʌñutom ado anọ andidọñ anye utom;

anye ademme sịbidịd eteufọk amọ.

14 Nte mme ntọñanyọñ ye afịm i-imiisañake ye edịm

ntoro ke awo a-akpọọhọ inua ke mme enọ a-awo imiinọọhọ anye kpaanam ado.

15 E-ekeme adikama ime ekpek adaukara,

ñko ifuuro-ifuuro edeme a-akeme adibuuñ akpọ.

16 Adieke afo akịtte adanakwọọk, dia etək-etək,

amaawak abọhọ, afo ayaakọk.

17 Baabat ini se akaa ufọk mbọhọidʌñ mfo,

umaukaan ubọhọ, ammọ eyausua fiin.

18 Awo a-atieghe ntiense nsu abaña mbọhọidʌñ amọ

aba nte akpeti me akañkañ me idañ a-asọbọke.

19 Adinie idodanyen ke awo abiaña ke usen nnananyen

aba nte eded a-abʌññọke me ukod a-akọkkọke.

20 Awo a-akwọọhọ ikwọ anọ mbon iduọesịd

aba nte awo a-asịññeke afọñidem ke usen atueb,

me nte fineka e-eduọkkọ ke anyenunan.

21 Adieke abiọọñ adọññọ asua mfo, nọ anye ndidia yak adia;

adieke itọñ asatta anye, nọ anye mmọọñ yak anwọñ.

22 Ke adinam ntom, afo ayaadot ufiob ukañ ke iwuod amọ,

ndin Abọọñ ayaunọ fiin utịb.

23 Edeme mbubịk, a-anamma ndịk awuọ ke iso awo

aba nte afịm adoro a-asañake ye adiwad edịm

24 A-afọn adidʌñ ke mben akọm

akan adiwana ufọk ye utọk-utọk anwaan.

25 Eti etob a-atooho anyan idịd adi

aba nte ndedeñ mmọọñ ke esịd awo a-akpaaha mba.

26 Ndinen awo e-eyaaha itie enọ mbon ibak

eba nte akpʌk idịm me utebe ñkpọdiọhọ mmọọñ.

27 Ifọnnọ adidia adanakwọọk awak abọhọ,

ukpono inyʌññọ iba ke adiduuñọ mme ñkpọ se itəño.

28 Awo i-imiinieghe mfarakeidem,

aba nte abio ake ndibene amọ amaawuuro.