1 Kuufịbe mbon ibak,

kuudʌk ndʌk ye ammọ;

2 sia esịd ammọ eduak afai,

inua ammọ enyʌñ etañ ebaña naña enam ntịme.

3 Edat aniọñ ebọp ufọk,

enyʌñ ekama mbufiọk ewuuk anye;

4 ato ke ifiọk mme ubeed amọ eyọhọ

ye nti ye mfọọn ñkpọuto.

5 Awo aniọñ anie adikan ato akpọsọñ adudu,

ndin mbon se inie ifiọk esio inweek ammọ.

6 Ke akpanikọ afo ameyem ndadusʌñ adinwana ekọñ,

adikan anyʌñ ato ke uwak mme anọitem.

7 Aniọñ akpon abọhọ anọ mme ndisịme;

ke itie mbono ke inuaatob ammọ inaaha ekʌppọ inua ammọ.

8 Awo akeedodo a-aduakka idiọọk

ediidiọọñọ anye nte awo ñkara.

9 Ñkara ndisịme ado idiọọkñkpọ,

mme awo enyʌñ esua enọ awo ñnyọọ.

10 Adieke afo aduọhọ ke ini mfịna,

adudu mfo ado etək-etək!

11 Fak mbon e-edatta eka ñkpa;

biọọñọ mbon e-edatta eka adiwot.

12 Adieke afo abooho, "Ado ñnyịn ikidiọọñọke ibaña ñkpọ ami,"

nte andidomo esịd idiidiọọñọke ibaña?

Nte andikpeme uwem mfo idiọọñọke ado?

Nte anye idiinọọhọ afịd awo utịb ikeene se ammọ enam?

13 Ayịn awodeen mmi, dia adanakwọọk, sia anye a-afọn;

adanakwọọk a-atooho ndukpa adanakwọọk anem kpa naña afo ama.

14 Diọọñọ ñko ke aniọñ atie nte adanakwọọk unọ fiin:

Adieke afo akịtte anye, idodanyen ini iso mmọdo aba unọọ fiin,

ndin idodanyen mfo idiikpuuho.

15 Kuudịbe nte idiọọk inọ ukpere ufọk ndinen awo,

kuubịme itie idʌñ ammọ;

16 sia akpesʌkado ndinen awo eduọhọ akañ itiaba, ammọ eyaemaana edakka eda,

ado mbon ibak edutịn ke nnananyen amaadi.

17 Kuudaara ke ini asua mfo amaaduọ;

ammọ emaetuak ukod, kuuyak esịd mfo adaara,

18 imiidooho Abọọñ ayaakịt anyʌñ asua

anyʌñ awọññọ iyadesịd amọ akpọñ ammọ.

19 Kuunie mfịna ubaña mme anamidiọọk

me adifịbe mbon ibak,

20 sia anamidiọọk inieghe idodanyen ini iso

ndin eyaenịme utuenikañ awo ibak.

21 Ayịn mmi, baak Abọọñ ye adidem,

kuunyʌñ udiana ye mme asọñiwuod mbon utom ukara,

22 sia ñkpọ iba ado eyaeben usọp-usọp nsobo esọk ammọ,

ndin anie awo idiọọñọ se utọ afanekọñ ke ammọ ekeme ediben ndi?

23 Mbon ami esʌk edo kpa mme ikọ aniọñ:

Aditeeñe awo anyen ke ubiideikpe ifọnnọ:

24 Awo akeedodo a-abooho adueñkpọ, "Afo udueghe,"

mbon awo eyaesuuñọ anye, mme idịd enyʌñ esua enọ anye.

25 Ado ayaafọn anọ mbon e-ebiommo mme adueñkpọ ikpe,

ndin uwak adidiọñ eyaedi ebịne ammọ.

26 Ibọọrọ a-adooho akpanikọ

atie nte aditʌm awo ñkpọkinua.

27 Nekke nam utom ke anwaesiin

nyʌñ fuut mme inwañ mfo bono;

umaukweeñe ado, bọp ufọk mfo.

28 Kuutie ntiense nsu ubaña mbọhọidʌñ mfo ke ntak imiibaaha,

nte afo akpaadat inua mfo atịn awo usʌñ?

29 Kuubo, "Ami ñyaanam ammọ naña ammọ ekennam miin;

Ami ñyaasio ammọ usiene ke se ammọ ekenam."

30 Ami ñkesaña mboiyo ke inwañ awo ifu,

nsaña mboiyo ke inwañ fain awo i-imiinieghe eti iwuod;

31 mbaraekpe amaayọhọ afịd itie,

mbid amaatịppe afịd ikọd,

ndibene itiad amaanyʌñ awuuro.

32 Ami mmaaben esịd mmi nsịn ke se ñkekịt

ñnyʌñ ñkpeep ñkpọ nto se ami ñkekịt:

33 Etək-etək idab, etək-etək iyeed,

etək adibọp ubọk nduọk adudu,

34 ndin uweene ayaadi ubịne fiin nte inọ

unana ñko ayaadi ubịne fiin nte amauke.