1 Timóteo 3

Mme Ñkpọ Emi enamde Owo Odot Nte Ada Idaha Ye Ọnọ Uñwam

1 Ikọ emi edi akpanikọ: Edieke owo oyomde ndidi adausuñ ke ufọk Abasi, enye okop udọñ abaña ata eti utom. 2 Ada usuñ ke ufọk Abasi enyene ndidi owo emi minyeneke ndo; enye enyene ndidọ ñwan kiet kpọt kpọt, enyene ndidi ọdiọñọ idem owo, enyene ndinyene mfarakeidem, onyuñ edi enyemi anamde ñkpọ nte odotde; enye enyene ndidara isenowo ke ufọk Esie; enye enyene ndinyene ukeme ndikpep mme owo ñkpọ, 3 enye inyeneke ndidi ama mmin mme owo obom, edi enyene ndidi suñ suñ owo ye owo emem; enye inyeneke ndidi owo emi amade okuk. 4 Enye enyene ndidi enye emi etimde onyuñ akarade ufọk esie ọfọn, onyuñ anamde nditọ esie esuk ibuot enọ enye ke kpukpru ido ukpono. 5 Koro edieke owo midiọñọke nte etimde ye nte ekarade ufọk esie, enye ekeme didie ndikama ufọk Abasi?

6 Enye inyeneke ndidi enyemi akabarede esit obufa; man enye edifut ọyọhọ ye ntañidem, ndien ọduọ oduk ke ubiomikpe nte ekedide ye Setan. 7 Enye enyene ndidi owo emi mme mmọ emi miduhọ ke esit ufọk Abasi ekponode, man esuene edisim enye, emi anamde enye ọduọ oduk ke afia Setan.