1 Mmenim nte ke mbufo eyenyene ime ye ami ke ekpri esisit ndisime emi ami nsimede; mbọk enyene ime ye ami! 2 Ami mmefibe ufup kpa nte Abasi efubede abaña mbufo; ami mma ññwọñọ ndida mbufo nnọ ebe kiet, Kraist ke idem Esie, nte eyen añwan emi akananam mikpereke erenowo. 3 Edi ami mokop ndik nte, nte urukikọt akabiañade If ke iñwañ Eden, ekikere esit mbufo ekeme ndiyo ñkpọñ edinam akpanikọ ye edisana ido ye Kraist. 4 Edieke owo edide edikwọrọ Jisọs emi ọkpuhọrede ye Jisọs enyemi ñnyin ikọkwọrọde, onyuñ edieke mbufo ebọde Spirit emi ọkpuhọrede ye Spirit emi mbufo ekebọde, edieke enyuñ ekopde ukwọrọ ikọ emi edide isio, ye ukwọrọ ikọ emi mbufo ekekopde ke inua ñnyin, ana mbufo enyene ime.

5 Ami ñkereke nte ke mme "Ikpọ mme asañautom" nte ekotde mmọ, efọn ekan mi ke ndomo usuñ ndomokiet. 6 Ekeme ndidi ami mbọhọ ukpep mbaña utiñ ikọ, edi idighe ke ifiọk; ñnyin ima inam emi añwaña mbufo ke kpukpru oruk usuñ.

7 Mme nte idiọkñkpọ ke ami ñkanam ke ami ndisuhọde idem mi man mbufo ewọrọ ñkpọ, ke ndikwọrọ Eti Mbuk Abasi nnọ mbufo ke mfọn? 8 Ami mma ntuk mme ufọk Abasi eken, ke ndibọ mmọ enọ man otodo ñkeme ndinam ñkpọ nnọ mbufo. 9 Kpa ke idem ini ñkodude ke unana ke ini ñkodude ye mbufo, ami ñkedighe mbiomo nnọ baba owo kiet; koro nditọ ete emi eketode ke Masidonia edi, ema eda kpukpru se inanade mi esọk mi. Ndien ami momum idem mi ñkama ke kpukpru usuñ, man ami ndidi mbiomo nnọ mbufo. Ñyesuk ñka iso nnam ntre. 10 Adaña nte akpanikọ Kraist odude ke esit mi baba owo ndomokiet ke ofuri obio Akaya idikemeke ndikpan mi ndinam inua mbaña ñkpọ emi. 11 Ntaha? Mme edi koro ami mmemmaha mbufo? Abasi ọfiọk ete ke ami mmama mbufo. 12 Ami ñyesuk ñka iso nnam se ami nnamde idahaemi, man otodo ami mbiọñọ mme mmọ oro ndinyene ntak nditañ idem, ñnyuñ ndọhọ nte ke utom mmimọ ye eke ñnyin edi ukem.

13 Koro mme mmọ emi edi mme mbet abiaña, mme anamutom nsu, ke ndikabade idem mmọ nnim nte mme Mbet Kraist. 14 Eyighe inyuñ iduhọ, koro idem Setan ekeme ndikabade idem esie ntie nte enjel uñwana. 15 Mmọdo idighe akamba ñkpọ edieke mme anamutom esie ekabarede idem mmọ enim nte mme anam utom edinen ido. Ke utit mmọ eyebọ nte ekemde ye se mmọ ekenamde.

16 Ami mmọtọñọ ntak ndọhọ nte yak owo baba kiet okukere ete ke ami ndi ndisime. Edi edieke mbufo edade mi nte ndisime, nte ededi, enyime mi ke ndisime mi, man ami ñko ñnyene esisit nnaminua. 17 Se ami ntiñde idahaemi, idighe se Ọbọñ ekpetiñde; edi ke nnaminua emi ami nnamde, ami nnam nte ndisime, 18 Sia ediwak owo enamde inua ke usuñ emi ererimbot enamde, ami ñyenyuñ nnam ñko. 19 Mbufo enyene ime ye mbon ndisime ke inemesit, sia mbufo edide mme ọfiọk ñkpọ owo. 20 Ke akpanikọ, mbufo emenyene ime ye owo, ke enye adade mbufo esin ufin, mme adiade inyene mbufo, mme enye adade ñkari omum mbufo, mme atañde idem, mme enye onyuñ eyibide mbufo ke mbañ. 21 Ami mokop but ndidọhọ nte ke ñnyin ikenyene uko ndinam mme ñkpọ oro. Edi edieke owo baba kiet ekemede nditaña ase mbaña ñkpọ ekededi — ami ntiñ nte ndisime — ami mmenyene ukeme ñko nditaña ase.

22 Nte mmọ edi nditọ Hibru? Ntre ke ami ndi ñko. Nte mmọ edi nditọ Isrel? Ntre ke ami ndi ñko. Nte mmọ edi nditọ Ebraham? Ntre ñko ke ami ñnyuñ ndi.

23 Nte mmọ edi mme asañautom Kraist? (Ntiñ nte owo idat). Edi ami mmedi eti asañautom ñkan mmọ. Ami mma nnam ọkpọsọñ utom ñkan mmọ, ami mmaka ñkpọkọbi ediwak ini, ami mọbọ ufen kpa emi ananade ibat, ñnyuñ ñkpere ñkpa ediwak ini. 24 Mma mbọ ubọk ikpa edip ye usukkiet utim ikotion ke ubọk mme Ju, 25 eda esañ ukwak emia mi utim ikata; ema enyuñ etọñọ mi ke itiat ini kiet. Ubom mi ama osip utim ikata, mma ndañ ke ufọt inyañ ibom okoneyo kiet ye uwemeyo kiet. 26 Ke mme ediwak isañ emi ami nsañade, mma ñkut afanikọñ ke akpa mmọñ inyañ ye ke ubọk mbon ñwo; mma ñkut afanikọñ ke ubọk ikọt ñnyin mme Ju, ye ke ubọk mme mmọ emi midighe mme Ju; mma ñkut afanikọñ ke mme ikpọ obio, mma ñkut afanikọñ ke mme ñkpri obio, mma ñkut afanikọñ ke inyañ ibom, ndien mma ñnyuñ ñkut afanikọñ ke otu nditọ ete abiaña. 27 Ami mma nnam ọkpọsọñ utom ye ukut, ndien ediwak ini ami nsidehe idap; ami mọdiọñọ se biọñ ye nsatitọñ edide ndien ediwak ini ami nsitie biọñ; tueb esimum mi ñnyuñ nsaña iferi ke idem.

28 Ke esiode kpukpru mme ñkpọ emi efep, ami menyene mfighe kpukpru ini ke esit mi mbaña kpukpru mme ufọk Abasi. 29 Anie owo odu ke mmemidem, ndien ami ntre nditiene enye ñkop mmemidem oro? Anie owo ke enam enye anam idiọkñkpọ, ndien ami ntre ndiyat esit?

30 Edieke anade nte nnam inua, ndinam inua kabaña mme ñkpọ oro esioñode mme mmemidem mi ewut; 31 Abasi ye Ete Ọbọñ ñnyin Jisọs Kraist, emi itoro ye ekọm enyenede Enye ke nsinsi, ọfiọk ete ami nsuhu nsu. 32 Nte uwutñkpọ, ke Damaskọs, andikara emi odude ke idak ukara Edidem Aretas, ama obon mbon ekọñ ete ekpeme inua otop obio man emum mi. 33 Edi ema esin mi ke akpasa eyiri uruk enyuñ esio mi ke odudu ibibene esuk mi, ndien mma mbọhọ ke ubọk esie.