1 Koro ñnyin imọfiọk ite, edieke atayat emi ñnyin iduñde ke esit ke isọñ emi owurede, ñnyin imenyene ufọk emi Abasi ọbọpde ọnọ ñnyin, emi midaha ubọk owo ibọp, ufọk emi ebighide ke nsinsi ke Enyọñ. 2 Koro ke akpanikọ ñnyin idu ke mmum, imokop udọñ nte ekpesinede ñnyin ufọk emi otode ke Enyọñ, 3 koro ke ema ekesine ñnyin ema, owo idikwe aba ñnyin iferi. 4 Ke akpanikọ ñnyin emi iduñde ke atayat emi idu ke mmum ufik; idighe koro ñnyin iyomde esio ñnyin ikpọkidem enyemi efep, edi ñnyin iyom emen ikpọkidem enyọñ esine ñnyin edori ke enyemi, man otodo uwem emen se idikpade emen. 5 Edi Abasi ekebeñe ñnyin idem ọnọ ukpuhọde emi, ndien Enye ama ọnọ ñnyin Spirit Esie nte ubiọñ kabaña kpukpru se enye ebeñede enim ọnọ ñnyin.

6 Mmọdo ñnyin ikokop isọñ esit kpukpru ini. Ñnyin imọfiọk ite adaña ini nte ñnyin idude ke ufọk ke ikpọkidem emi, ñnyin idu anyan ebiet ye ebiet iduñ Abasi. 7 Koro ñnyin idu uwem ito mbuọtidem, ñnyin iduhọ uwem ito se ñnyin ikutde ke enyin. 8 Ñnyin imọyọhọ ye idorenyin, ndien imakam ima ikan ndikpọñ ufọk ñnyin ke ikpọkidem emi ñkodu kiet ye Ọbọñ ke ufọk Esie. 9 Ke ntre udọñ ñnyin edi ndinem Enye esit ke kpukpru ñkpọ emi ñnyin inamde ekpedi ñnyin idu ke ikpọkidem enyemi, mme ikpọñde ikpọkidem enye emi, ikodu ye Enye ke enyọñ. 10 Koro kpukpru ñnyin iyeda usen kiet ke iso itie ikpe Kraist, man owo kiet kiet ọbọ utib emi ekemde ye se enye akanamde ke ini emi enye okodude ke ikpọkidem, eti mme idiọk.

11 Ñnyin imọfiọk se edibak Abasi edide, ke ntre ñnyin isin ifik ndinam mmọ efen ekut ye ñnyin. Abasi etim ọdiọñọ ñnyin, ndien ami modori enyin nte ke esit mbufo, mbufo emediọñọ mi ñko.

12 Ñnyin iñwanake nditọñọ ntak ntoro idem ñnyin nnọ mbufo; edi ñnyin iñwana ndinọ mbufo eti ntak ndibure mbure kabaña ñnyin, man mbufo ekpekeme ndibọrọ mme mmọ emi eburede mbure ebaña se owo ekutde ke enyin, edi idighe ke se mmọ ekutde ke esit esie. 13 Edieke ñnyin idamade, edi ke ntak Abasi; onyuñ edieke ñnyin inyenede eti ibuot, edi man ọfọn ye mbufo. 14 Ima Kraist akara ñnyin, ke emi ñnyin imọyuhọ ite ke owo kiet akakpa ke ibuot kpukpru owo, emi ọwọrọde ete ke kpukpru owo enyene ebuana ke ñkpa Esie. 15 Enye akakpa ke ntak ibuot kpukpru owo, man otodo kpukpru mmọ emi edude uwem ke ema ekebọ nsinsi uwem eto Enye ekudu aba uwem enọ idem mmọ, edi edu uwem mmọ enọ Enye ikpọñ ikpọñ emi akakpade onyuñ eset ke ñkpa ke ntak mmọ. 16 Ñnyin idaha aba idaha ubonñkpọ ererimbot ikpe owo ikpe. Okposuk edi ini ama odu emi ñnyin ikadade idaha ubonñkpọ ererimbot ikpe Kraist ikpe, ñnyin inamke aba ntre. 17 Mmọdo owo ekededi emi ediande enye ye Kraist, eyedi obufa obot; ñkani ñkpọ ema ebe efep, mbufa ñkpọ eda itie.

18 Edi Abasi anam kpukpru mme ñkpọ emi, Enyemi okotode ke Kraist anam ñnyin itie ke emem ye Enye, okonyuñ ọnọde ñnyin utom, ete ñnyin inam mmọ efen etie ke emem ye Enye ñko. 19 Koro edi ke Kraist ke Abasi anam ererimbot etie ke emem ye Enye, Enye ibatke mme idiọkñkpọ emi mme owo enamde inọ mmọ. Enye ama onyuñ ayak etop editie ke emem ye Enye esin ñnyin ke ubọk ete ikwọrọ. 20 Ñnyin idi mme isuñutom emi itiñde ikọ ke ibuot Kraist, nte ñkpọ emi Abasi adade ñnyin ekpe mbufo ubọk. Ñnyin imekpe mbufo ubọk ke ntak Kraist, ite mbufo enam emem ye Abasi. 21 Abasi akanam Enye emi mikọfiọkke idiọkñkpọ akabade edi idiọkñkpọ ke ntak ñnyin; man ñnyin ikabade idi mme ndinen ikọt Abasi ke Enye.