1 Sia ima ikenyene mme akwa eñwọñọ emi, mme ndima ufan, eyak ñnyin ndien idiañade ikpọñ kpukpru mme ñkpọ emi asabarede ikpọkidem ye Spirit, inyuñ inam idem ñnyin asana ekem ke edidu uwem ke idak uteñe Abasi. 2 Etat esit mbufo enọ ñnyin. Ñnyin ikanamke baba owo kiet idiọkñkpọ, mme nditahade owo baba kiet, mme ndituk baba owo ndomokiet. 3 Ami ntiñke emi man mbiom mbufo ikpe; koro mma mbemiso ntim ntiñ nnọ mbufo, nte ke mbufo emeda akpan itie ke esit ñnyin emi anamde ñnyin idu ọtọ kiet kpukpru ini ke uwem ye ke ñkpa. 4 Mmenyene akamba isọñesit ke idem mbufo, ndien mbure mi ke idem mbufo okpon eti eti. Mbufo emeriọ mi nsọñidem eti eti, enyuñ enam mi ndara, okposuk edi ñkutde ukut ọkpọsọñ.

5 Ke ini ñnyin ima ikesim Masidonia, nduọkodudu ndomokiet ikọduhọ inọ ñnyin. Mfina ama odu ke kpukpru ebiet, utọk ye mme mmọ eken ye ndik ke esit ñnyin. 6 Ntem Abasi emi ọdọñde mbon ñkpọnnam esit ama ọdọñ ñnyin esit oto ke edidi Taitọs. 7 Inyuñ idighe edidi esie ikpọñ ikpọñ, edi enye ama ada idọñesit emi mbufo ekenọde enye, edidọñ ñnyin esit ñko. Enye ama etiñ ọnọ ñnyin nte ọdọñde mbufo ndikut mi, ye nte mbufo efuhọde ebaña mi, enyuñ ebeñede idem ndifre ufre ke ibuot mi; oro anam idara mi ama okpon akan se ekedide.

8 Koro okposuk edi nte ami ñkanamde mbufo ekop mfuhọ oto ke ñwed emi ami ñkọnọde esọk mbufo, ami ntuaha ñkpọfiọk. Koro mokut nte ñwed oro anam mbufo efuhọ, edi anam mbufo efuhọ ke esisit ini. 9 Ami madara idahaemi eti eti, idighe koro mmanam mbufo ekop mfuhọ, edi koro mfuhọ mbufo anam mbufo ekabade esit etiene Abasi. Koro mbufo efuhọde nte ekemde ye ido Abasi, oruk mfuhọ emi Abasi oyomde ikọt Esie efuhọ. Anam ñnyin ikanamke mbufo ekop ubiak ke ndomo baba ntak kiet, 10 koro mfuhọ emi Abasi enyimede ada edikabade esit edi, emi akade ọkọsuñọ ke ubọhọ, ndien editua ñkpọfiọk iduhọ ke utọ mfuhọ oro. Edi mfuhọ obukidem ada ñkpa edi.

11 Ese ndien se Abasi anamde ye mfuhọ mbufo emi: nte anamde mbufo enyene iwuk, anam mbufo ekop udọñ ndiyarade ñwut unana ndudue mbufo! Utọ esuene oro, utọ ndighe oro, utọ esit mbọm oro, utọ nsin ifik oro, utọ mbeñeidem ndimia anamidiọk ufen. Emewut idem mbufo nte mme mmọ emi enanade ndo ke ofuri ñkpọ emi.

12 Okposuk edi nte ñkewetde ñwed nnọ esọk mbufo, ikedighe ke ntak enyemi akanamde idiọkñkpọ, mme owo emi akanamde enye idiọkñkpọ, edi ami ñkewet man nnam añwaña mbufo ke iso Abasi, nte ñwaidem mbufo okponde ye ñnyin.

13 Ntak edi oro ñnyin ikokopde idọñesit. Ikedighe idọñesit ikpọñ, edi ima idara ito ke idaraesit Taitọs kabaña usuñ nte kpukpru mbufo ekediande ubọk edọñ enye esit, 14 Ami mma mbebure mbure nnọ enye mbaña mbufo, ndien mbufo ikinyuñ ikpuhu mi. Ñnyin itiñ akpanikọ kpukpru ini inọ mbufo, ke ukem usuñ emi, mbure emi ikeburede ke iso Taitọs ibaña mbufo ọwọrọ akpanikọ. 15 Ima emi enye amade mbufo etetim ọkọri kadaña emi enye etide nte kpukpru mbufo ekebeñede idem ndisuk ibuot nnọ item esie, ye nte mbufo ekedarade enye ke ndik ye ñnyekidem. 16 Ami mokop inemesit, koro ami menyene ọyọhọ idorenyin ke idem mbufo.