1 Ufọn ndomokiet iduhọ inọ mi ndiwet mbufo mbaña edinam ñkpọ nnọ ikọt Abasi. 2 Koro ami mọfiọk udọñ emi mbufo enyenede ke ndiñwam, ñnyuñ nda mbufo nnam inua nnọ mbio Masidonia, ñnyuñ ndọhọ mmọ nte ke tọñọ ke isua oko ekebede, mbufo emi edude ke Akaya ema ebeñe idem ndinọ enọ, anam oto ke ntak ifiopesit ye udọñ emi mbufo; enyenede ediwak owo edaha eda etọñọ ndinam ñkpọ. 3 Edi ami mmọdọñ nditọ ete edi man nnaminua emi ami nnamde mbaña mbufo ediwọrọ ikpuikpu kabaña ñkpọ emi, man mbufo ebeñe idem ke uñwam mbufo, kpa nte ami ñkọdọhọde. 4 But eyenam mi eti eti, ndien ntre ke edidi ye mbufo ñko, edieke ndusuk mbon Masidonia emi esañade ye ami edi, edinyuñ ikutde ete ke mbufo ibeñeke idem, kadaña emi ami mma ñketiñ nnọ mmọ mbaña mbufo.

5 Ke ntre ami mma ñkere nte ke ọfọn ami ndidọñ nditọ ete ebem iso edi ebine mbufo, man otodo mbufo enam ndutim emi otukde enọ emi mbufo ekeñwọñọde, okure. Ami ñyom emi edi ata enọ ima esit, okudi nte enọ emi enyikde nyik mbufo ndinọ. 6 Edi eti emi, edieke enọde esisit, eyebọ esisit. Ọtọ iñwañ emi ọtọde esisit ñkpasip enyene ndidọk esisit mfri, edi, edieke enye ọtọde ediwak ñkpasip enye eyedọk ediwak ñko. 7 Yak owo kiet kiet ọnọ nte enye akaduakde ke esit esie ndinọ, okunọ ye ñkuni mme ke edinyenyik, koro Abasi ama owo emi ọnọde ke inemesit. 8 Ndien Abasi ekeme ndinọ mbufo ñkan nte mbufo eyomde, man oto do mbufo enyene se mbufo eyomde kpukpru ini enọ idem mbufo, onyuñ ọsuhọ se edade enam kpukpru nti utom. 9 Nte Ñwed Abasi ewetde ete, "Enye ama atat ubọk ọnọ mme ubuene ñkpọ, mfọnido Esie ebighi ke nsinsi."

10 Ndien Abasi emi ọnọde ọtọ iñwañ ñkpasip nditọ, ye uyo, nte udia, eyenyuñ anam ñkpasip emi mbufo editọde awak, onyuñ anam mbuñwum edinen ido mbufo etọt.

11 Eyenam mbufo enyene inyene ke kpukpru usuñ, man otodo mbufo ekeme nditat ubọk nnọ enọ ke kpukpru usuñ, man ediwak owo ekpekọm Abasi oto ke enọ mbufo emi mmọ ebọde eto ñnyin. 12 Se mbufo enamde emi idighe ndiyọ unana ikọt Abasi ikpọñ, edi anam mmọ enọ Abasi ọyọhọ ekọm ñko. 13 Oto ke ntak eti edinam emi utom mbufo emi adade edi, mme ediwak owo eyetoro Abasi ebaña nte mbufo esukde ibuot enọ Eti Mbuk Jisọs Kraist, emi mbufo ekwọrọde, ye ke ntatubọk emi mbufo edade Eti Mbuk emi ebuana ye mmọ ye kpukpru mme owo efen. 14 Ndien ke ntọtuñọ esit ima mmọ eyebọñ akam ebaña mbufo ke ntak utibe mfọn emi Abasi ọnọde mbufo.

15 Ekọm enyene Abasi ke enọ Esie emi inua mikemeke nditiñ.