1 Mme ndima ufan, ñwed emi oto Pọl emi Abasi ekemekde ete edi isuñutom Jisọs Kraist, ye eyen ete ñnyin Timoti, ñnyin iwet ñwed emi inọ esọk kpukpru ufọk Abasi emi edude ke Kọrint; ye kpukpru ikọt Abasi emi edude ke Akaya. 2 Yak mfọn ye emem oto Abasi Ete ñnyin ye Ọbọñ Jisọs Kraist esim mbufo.

3 Itoro enyene Abasi ye Ete Ọbọñ ñnyin Jisọs Kraist, Ete mbọm ye Abasi kpukpru idọñesit. 4 Emi ọdọñde ñnyin esit ke kpukpru ukut ñnyin, man otodo ñnyin ikeme ndidọñ mme mmọ emi edude ke ukut ekededi esit, oto ke idọñesit emi ñnyin ibọde ito Abasi. 5 Kpa nte ndutuhọ Kraist ọyọhọde ọduọhọ ke uwem ñnyin, kpa ntre ke idọñesit ñnyin onyuñ awak oto ke Kraist. 6 Edi edieke ñnyin ikutde ukut, edi man mbufo enyene idọñesit ye edinyaña; edieke ñnyin ibọde idọñesit, edi man mbufo enyene idọñesit emi anamde mbufo enyene ime ye ukeme ndiyọ ukem ukem ndutuhọ emi ñnyin inyuñ iyọde. 7 Ñnyin imonyuñ inyene ọkpọsọñ idorenyin ibaña mbufo, koro ñnyin imọfiọk ite, kpa nte mbufo ebuanade ke ndutuhọ ñnyin, ntre ñko ke mbufo etiene ebuana ke idọñesit ñnyin.

8 Ñnyin ikpamaha mbufo etre ndifiọk, nditọ ete, mbaña nsọñọ ñkpọ ye ufen emi ñnyin ikekutde ke Esia. Mbiomo emi ekedoride ñnyin ke ibuot ama okpon onyuñ odobi ke usuñ emi akanamde ñnyin iduọk idorenyin ibaña uwem. 9 Ñnyin ikekere ite ke ana ọnọ ñnyin ndikpa. Edi emi eketibe man ñnyin ikudori enyin ke ukeme idem ñnyin, edi idorenyin ke Abasi ikpọñ emi emenerede akpa ñkpa esin ke uwem. 10 Enye ama afak ñnyin osio ke utọ enyene ndik usuñ ñkpa oro, ndien Enye eyesuk anyaña ñnyin. Ñnyin imemen idorenyin ñnyin idori ke Enye ite ke Enye eyeka iso ndinyaña ñnyin, 11 nte mbufo ekade iso ndiñwam ñnyin ke akam mbufo. Ntre ke edibọrọ mme uwak akam emi ebọñde enọ ñnyin, ndien Abasi eyediọñ ñnyin; ndien ediwak owo eyemenede uyo mmọ enọ Abasi ekọm kabaña ñnyin.

12 Emi edi mbure emi ñnyin iburede: Esit ñnyin etie ntiense abaña nte ñnyin ikakamade idem ñnyin ke ererimbot, akpan akpan ke ebuana ñnyin ye mbufo ke edisana usuñ ye ke esit akpanikọ emi okotode Abasi. Ñnyin imenam emi ito ke mfọn Abasi; ikedighe ke ifiọk owo. 13 Kpukpru se ñnyin iwetde inọ mbufo, edi se mbufo ekemede ndikot añwaña mbufo. Ami mmenim nte eyetim añwana mbufo. 14 Edi okposuk edi emi mbufo ediọñọde ñnyin ubak ubak idaha emi, ami mmenim ke akpanikọ nte ke mbufo eyediọñọ ñnyin ọyọhọ ọyọhọ, man otodo mbufo ekpebure mbure ebaña ñnyin ke usen Ọbọñ ñnyin Jisọs kpa nte ñnyin ñko idiburede mbure ibaña mbufo. 15 Ami mma ntim mfiọk mme ñkpọ emi, oro akanam ami mbiere ndibemiso ndise mbufo, man otodo mbufo ekpebọ edidiọñ ikaba. 16 Ami mebiere ndikut mbufo ke usuñ isañ mi ndika Masidonia, ye ke ini emi ami ndifiakde edem do, man otodo ami ñnyene uñwam nto mbufo ke isañ mi ndika Judia.

17 Mme edikere mi ntem edi mfefere mfefere? Mme ami nnam uduak mi ke ido ererimbot man otodo ami ñkpọdọhọ "Ih" ye "Ih Ih" inikiet? 18 Nte Abasi edide anam akpanikọ, ikọ emi ñnyin itiñde inọ mbufo idighe "Ih" ye "Ih Ih".

19 Koro Jisọs Kraist, Eyen Abasi, emi ami ye Silfanọs ye Timoti ikọkwọrọde ke otu mbufo, idighe "Ih" ye "Ih Ih." Ke editim ntiñ, Enye edi "Ih" Abasi. 20 Mme eñwọñọ Abasi ewak nte ewewak, ke Kraist kpukpru mmọ edi, "Ih". Emi edi ntak emi ñnyin idọhọde ite "Amen" isin ke ubọñ Abasi oto ke Jisọs Kraist. 21 Ndien Enye emi anamde ñnyin ye mbufo isọñọ ida ke Kraist, onyuñ eyetde ñnyin aran enim edi Abasi, 22 Emi okonyuñ enimde ñnyin idiọñọ ke idem nte mme inyene Esie onyuñ esinde Spirit Esie ke esit ñnyin, nte ubọñ ọnọ kpukpru mme ñkpọ emi Enye etimde enim ọnọ ñnyin.

23 Ami mmada Abasi nte ntiense mi, koro ñketre ndidi ke Kọrint, man ami ndifina mbufo. 24 Idighe nte ñnyin iñwana ndikara mbuọtidem mbufo, edi iñwana ndiñwam mbufo ndinyene idaraesit, koro edi ke mbuọtidem ke mbufo esọñọ eda.