1 Ami ñnyene ndika iso nnam inua, okposuk edi oro minyeneke udori, edi ñyetiñ mbaña ñkukut emi ami ñkokutde ye ediyarade emi Ọbọñ akayararede ọnọ mi.

2 Ami mmọdiọñọ owo kiet ke Kraist emi ekemende enye eda edọk ke ọyọhọ enyọñ ita ke isua duopenañ emi ekebede. Ami ndiọñọke mme ñkpọ emi edi se iketibede ke ikpọkidem, mme enye okokut ñkukut, edi Abasi ikpọñ ọdiọñọ. 3 Ntọñọ ntak ntiñ nte, ke ami mmọdiọñọ nte ke ema emen owo emi eka ke Paradais (ami mfiak, ndọhọ nte ami ndiọñọke mme ñkpọ emi edi se iketibede ke ikpọkidem mme ekedi ñkukut edi Abasi ikpọñ, ọdiọñọ), 4 do ke enye okokop mme ñkpọ emi owo mikemeke ndida nsin ke usem, mme ñkpọ emi inua owo mikemeke nditiñ. 5 Ami mmonyuñ nda oruk owo oro nnam inua, edi ndinamke inua mbaña idem mi, ke mibọhọke abaña mme mmemidem mi. 6 Edieke okpodude mi ke udọñ ndinam inua, ami ñkpedighe ndisime, koro ami ñkpetiñ akpanikọ. Edi ami ndinamke inua, man owo ndomokiet edikere ete ke ami mokpon ñkan se enye okutde ami nnamde ye se ami ntiñde.

7 Edi man ebiọñọ mi ndikohode idem mi ñkaha, ke ntak utọ akamba ediyarade emi okponde ntem, ema esin mi ñkukim ke obukidem, isuñutom Setan onyuñ edituhọde mi, man ọbiọñọ mi ndikohode idem mi ñkaha. 8 Ami mma ñkpe Ọbọñ ubọk utim ikata mbaña ñkpọ emi, nte Enye emen efep ke idem mi.

9 Edi Enye ama ọbọrọ mi ete, "Mfọn Mi edi kpukpru se afo oyomde, koro odudu mi ọsọñ akan kini afo odude ke mmemidem". Ntre ke ntim ndat esit eti eti ndibure mbure kabaña mmemidem mi, man odudu Kraist odoro mi ke idem. 10 Ami mọyuhọ ke mmemidem mi, ye esuene, ye nsọñọ ñkpọ ye ukọbọ, ye mme mfina, ke ntak Kraist. Koro kadaña emi ami ñkopde mmemidem, ini oro ke ami ñkop odudu.

11 Ami mmada idem mi nnam ndisime, ndien edi mbufo ekenam mi nnam ntre. Akpana mbufo etoro mi, koro ami mmeñkprike ke baba usuñ ndomokiet ñkan mme ata ikpọ mbet mbufo oro, okposuk edi oro ami mmendighe ñkpọ. 12 Mma nda anyan ime nnam kpukpru utom emi owutde ete ke ami ndi mbet ke akpanikọ, ke mme idiọñọ ye mme utibe ñkpọ, ye mme utom odudu. 13 Ke nso utọ usuñ ke mbufo ekekpri ekan mme ufọk Abasi eken, ke mibọhọke ke emi ami mme ñkedighe mbiomo nnọ mbufo? Mbọk edahado enọ mi ke ndudue emi.

14 Emi edi ọyọhọ ikata emi ami ñyomde ndidi ndise mbufo ndien ami ndidighe mbiomo nnọ mbufo, koro ami ñyomke inyene mbufo, edi ñyom mbufo idem. Idighe nditọ ekpetim ñkpọ enim enọ mme ete ye eka mmọ, edi mme ete ye mme eka mmọ enyene nditim ñkpọ nnim nnọ nditọ mmọ. 15 Ami ñyekop inemesit ndibiat kpukpru se ami ñnyenede ye idem mi ñko man otodo ami ññwam mbufo. Nte mbufo ekpema mi esuhọde ekan ke ntak emi ami mmade mbufo ke utọ akwaima oro?

16 Edi yak etie nte etetie, ami ñkedighe mbiomo nnọ mbufo. Edi owo ekeme ndidọhọ ete ke ami ñkedi owo ñkari, ndien ke ñkada nsu mmum mbufo. 17 Didie ke ami ñkotuk mbufo nto ubọk mme mmọ emi ñkọdọñde ebine mbufo? 18 Ami mma ñkpe ye Taitọs nte yak enye edi ebine mbufo ndien mma ñnyuñ ndian eyen ete ñnyin eken asaña ye enye. Emekeme ndidọhọ ete ke Taitọs ama otuk mbufo? Nte ami ye enye inamke ñkpọ ukem ukem ito ke ukem ekikere ye ke ukem usuñ?

19 Nte mbufo ekere ofuri emi ete ñnyin iñwana ndinyaña idem ñnyin ke iso mbufo? Ñnyin itiñ ikọ ke iso Abasi, nte mme mmọ emi edude ke Kraist, ndien kpukpru se ñnyin inamde, ndima ufan, edi ndiñwam mbufo. 20 Koro ami mokop ndik nte ke ini ami ndidide, ami ndikwe mbufo nte ami ñkpoyomde mbufo edi, mbufo idinyuñ ikwe mi nte mbufo ekeyomde mi ndi. Ñkop ndik koro ami ndikut ufen, ifiopesit, efam, emiom, ibañaedem, ye ñkohodeidem, ye ndutime. 21 Ke ini nditọñọde ntak ndi, Abasi mi eyenam mi nsuhọde idem ke iso mbufo, ndien ami ñyekop mfuhọ mbaña ediwak owo, emi ekenamde idiọkñkpọ ke ini emi ekebede, ndien mituaha ñkpọfiọk inyuñ ikabade esit ikpọñ mbubiam ido ye use, ye idiọkitọñ emi mmọ ekenamde.