1 Abasi ke mfọnido Esie ọmọnọ ñnyin utibe utom emi ndinam, anam esit iduọhọ ñnyin. 2 Edi ñnyin ima iduọk mme ndibe ndibe ido emi enyenede but; ñnyin isañake ke ñkari, inyuñ idaha nsu ibuak ye ikọ Abasi. Edi ke ediyarade se idide akpanikọ añwa añwa, ke ñnyin inam kpukpru owo efiọk ke esit mmọ ete ke ñnyin imanam se inende ke iso Abasi.

3 Koro edieke efukde Eti Mbuk emi ñnyin ikwọrọde, efuk ebaha mme mmọ emi etakde. 4 Mmọ inimke ke akpanikọ koro ifiọk abasi eyo emi amanam esit mmọ ekim. Enye ọbiọñọ mmọ ndikut uñwana emi ayamade ọnọ mmọ; uñwana emi otode ke Eti Mbuk emi abañade ubọñ Kraist, emi edide nnen nnen mbiet Abasi. 5 Koro ñnyin ikwọrọke ibaña idem ñnyin, edi ikwọrọ ke Jisọs Kraist edi Ọbọñ; ndien ñnyin idi ifin mbufo ke ntak Jisọs. 6 Koro edide Abasi emi ọkọdọhọde ete, "Yak uñwana ayama ke ekim", akanam uñwana Esie ayama ke esit ñnyin, ndinọ ñnyin uñwana ifiọk ubọñ Abasi emi odude ke iso Kraist.

7 Edi ñnyin inyene ñkpọuto emi ke esio mbat, ndiwut nte ke akwa odudu emi oto Abasi, itoho ñnyin.

8 Efik ñnyin ke kpukpru nde, edi ñkpọ ibiakke ñnyin; etimede ñnyin, edi inamke ñnyin inana idorenyin; 9 ekọbọ ñnyin edi Abasi ikpọñke ñnyin; enuk ñnyin eduọk ke isọñ, edi ikemeke ndisobo ñnyin. 10 Ñnyin ke ibiom ñkpa Jisọs kpukpru ini ke ikpọkidem ñnyin isaña, man uwem Jisọs ayararede ke ikpọkidem ñnyin.

11 Ñnyin idu ke ndik ñkpa kpukpru ini ke uwem ñnyin, ke ntak Jisọs, man uwem Jisọs ñko ọwọrọ owut idem ke ikpọkidem ñnyin emi edikpade. 12 Ke ntak edikwọrọ ñnyin, ñkpa ana ñnyin ke iso, edi emi akabade edi nsinsi uwem ọnọ mbufo. 13 Ñwed Abasi ọdọhọ ete, "Ami ñketiñ koro ñkenimde ke akpanikọ." Ke ukem Spirit mbuọtidem oro ke ñnyin ñko itiñ koro ñnyin imenim ke akpanikọ. 14 Ñnyin imọfiọk ite Abasi emi akanamde Ọbọñ Jisọs eset ke ñkpa, eyenyuñ anam ñnyin ñko iset ke ñkpa ye Jisọs, ndien ada ñnyin ye mbufo enim ke iso Esie. 15 Kpukpru ukut emi ñnyin ibọde mi edi ke ntak ufọn mbufo. Ndien nte mfọn Abasi esimde ediwak owo, mmọ eyenam akam ekọm ọdọk esim Abasi ke ubọñ Esie.

16 Ke ntak emi esit iduọhọ ñnyin. Okposuk edi nte ikpọkidem ñnyin akade iso ndisuhọde, kpa ye oro ñnyin ke ibọ nsọñidem ke Spirit ke usen ke usen. 17 Mi ekpri esisit ukut emi ñnyin ibọde mi idibighike, edi eyeda nsinsi akwa ubọñ emi okponde akan mme ukut ñnyin. 18 Ke ntre ñnyin idọñke enyin ke se owo okutde ke enyin, edi idọñ enyin ke se owo mikwe ke enyin, koro se owo okutde ke enyin eyebe efep, edi se owo mikwe eyebighi ke nsinsi.