1 Idahaemi, ke se itukde okuk emi anade etip ndida ññwam ikọt Abasi ke Judia: mbufo enyene ndinam se ñketiñde nnọ ufọk Abasi ke Kalesia enam. 2 Ke kpukpru usen ikọ Abasi, owo mbufo kiet kiet enyene ndisio ubak okuk nnim, nte asañade ekekem ye udori uñwana esie, ndien etim enim man utib etibe okudu ke ini emi ami ndidide. 3 Ke mma ndisim, ami ñyedọñ mme owo emi mbufo edimekde ye ñwed eda mme enọ mbufo eka Jerusalem. 4 Edieke anade nte ami ñka, mmọ eyesaña ye ami eka.

5 Ami ñyedi ñkañ mbufo ke mma ñkasaña mbe Masidonia, koro ana nte ami nsaña mbe ke Masidonia. 6 Ekeme ndidi nte ke ñyebiat ini esisit ye mbufo, monyuñ ñkeme nditie tutu ekarika okure, do ndien ke mbufo ediñwam mi ndika iso ke isañ mi, ke ebiet ekededi emi nditode do ñka. 7 Ami ñyomke ndiwawaha nse mbufo, edi ami mmenyene idorenyin ndibiat ata anyan ini ye mbufo, edieke Ọbọñ enyimede. 8 Ami ñyedu mi ke Efisọs tutu esim usọrọ ube inyañ. 9 Koro akamba ifet odu mi ọnọ mi ndinam ikpọ utom ye mme utom eken emi edotde, okposuk edi emi mme mbio ubiọñọ ewakde.

10 Edieke Timoti edide edem mbufo, ekutre ndidara enye ñnyuñ nnam enye okut emem ke ufọt mbufo, koro enye anamde utom ọnọ Ọbọñ, kpa nte ami nnamde. 11 Owo ndomokiet okuse enye ke usuhọde enyin, edi mbufo enyene ndiñwam enye ndika iso ke isañ esie ke emem, man otodo enye afiak edem ebine mi; koro ami ke nse usuñ mbaña edinyọñ esie ndi ye mme nditọ ete eken. 12 Ke se itukde eyen ete ñnyin Apọlọs, ami ke ntetiñ ye enye nte yak enye asaña ye mme nditọ ete eken edise mbufo, edi enye itimke iyuhọ nte ke akpana imọ idi ke utọ ini emi. Ke enye ama enyene ifet, enye eyedi.

13 Etiñ enyin, esọñọ eda ke mbuọtidem, enyene uko, enyuñ ekop odudu. 14 Enam kpukpru utom mbufo ke ima.

15 Emediọñọ ebaña Stefanas ye ofuri ufọk esie, ete ke mmọ edi akpa ikọt Abasi emi ekekabarede esit ke Akaya, ndien mmọ ema eyak idem mmọ enọ ke edinam ñkpọ nnọ ikọt Abasi. Mmekpe mbufo ubọk, nditọ ete mi, 16 nditiene nda usuñ mme utọ mme mmọ emi, ye mme mmọ efen emi enamde utom ye mmọ. 17 Esit ama adat mi eti eti ke edidi Stefanas, Fọtunatus ye Akekus, koro mmọ ema eda itie emi mbufo ekpedade. 18 Mmọ ema edemede spirit mi, kpa nte mmọ edemerede eke mbufo, odot mbufo ediọñọ utọ mmọ emi.

19 Mme ufọk Abasi emi edude ke idak ukara Esia enọ ekọm esọk mbufo; Akwila ye Prisila ye ufọk Abasi emi edukde ke ufọk mmọ enọ, ufiop ufiop ekọm ikọt Abasi esọk mbufo. 20 Kpukpru mme nditọ ete mi enọ ekọm esọk mbufo. Ekọm kiet eken ye ntiminua nditọ eka.

21 Ami Pọl ñwed ekọm emi ke idem mi. 22 Owo kiet ekededi emi mimaha Ọbọñ odu ke idak isuñi. "Maranata" Ọbọñ ñnyin di! 23 Yak mfọn Ọbọñ Jisọs odu ye mbufo. 24 Yak ima mi odu ye kpukpru mbufo ke Kraist Jisọs.