1 Kemi yak nti mbufo nditọ ete mbaña Eti Mbuk emi ñkọkwọrọde nnọ mbufo, emi mbufo ekenyimede enyuñ eyak mbuọtidem mbufo ọsọñọ ada ke esit. 2 Oto ke Eti Mbuk emi enyaña mbufo, edieke mbufo emumde mme ikọ emi ami ñkọkwọrọde nnọ mbufo ekama, ke midighe ntre, edinim ke akpanikọ mbufo ọkọwọrọ ikpuikpu.

3 Koro se ami ñkọbọde ke ami ñkayak nnọ mbufo, emi edide ata akpan ñkpọ: nte ke Kraist akakpa ke ntak mme idiọkñkpọ ñnyin nte Ñwed Abasi ekewetde, 4 Nte ke ema ebuk Enye, ndien ke ọyọhọ usen ita ema emenede Enye ke ñkpa efiak esin ke uwem, kpa nte ekewetde ke Ñwed Abasi; 5 Enye ama ọwọrọ owut Pita idem, ndien onyuñ ọwọrọ owut kpukpru mme mbet Esie duopeba idem ñko. 6 Ke emi ama ekebe, Enye ama onyuñ ọwọrọ owut idem ke otu mme owo emi ekekande ikie ition emi ekedide mme nditọ ete, emi ekese mmọ esuk edude uwem, okposuk edi emi ubak mmọ ema ekede. 7 Enye ama onyuñ ọwọrọ owut Jems ye kpukpru mme mbet eken idem ñko. 8 Ke akpatre Enye ama ọwọrọ owut mi idem, okposuk edi emi ami mbietde eyen emi ekemande ke ukpuhọde usuñ. 9 Koro ami ñkpri ñkan ke otu mme mbet, ndotke nte ekpekotdekot mi mbet, koro edi ami ñkọkọbọ Ufọk Abasi Kraist.

10 Edi ke mfọn Abasi ami ndi se ami ndide emi, ndien mfọn emi Enye ọkọnọde mi ikenanake odudu. Ke editim ntiñ, ami mmanam utom ñkan kpukpru mme mbet eken, okposuk edi oro miketoho ke ukeme idem mi edi okoto ke mfọn Abasi emi akade iso ndinam utom ke idem mi. 11 Ke ntre, mme okoto mi mme okoto mmọ, emi edi se kpukpru ñnyin ikwọrọde, ndien emi edi se mbufo ekenimde ke akpanikọ.

12 Ke emi, edieke etop emi ñnyin ikwọrọde edide nte ke ema emenede Kraist ke ñkpa, ntaha ndusuk mbufo edọhọde ete ke idimenekede mme akpaña ñkpa ifiak isin ke uwem-e? 13 Edieke emi edide akpanikọ, oro ọwọrọ ete ke ikemenekede Kraist, 14 ndien edieke mikemenekede Kraist ke ñkpa, ọwọrọ ete ñnyin inyeneke ñkpọ ndomokiet ndikwọrọ, ndien mbufo ñko inyeneke ñkpọ ndomokiet ndinim ke akpanikọ, 15 Se ikponde ikan oro edi ntem, nte ke ñnyin imekabade idi mme mmọ emi isude nsu idian Abasi, koro ñnyin ima idọhọ ite ke Enye ama emenede Kraist ke ñkpa. Edi edieke edide akpanikọ nte ke imenekede mme akpaña ñkpa ifiak isin ke uwem, akabade ọwọrọ ete ke Abasi ikemenekede Kraist. 16 Koro edieke mikemenekede mme akpaña ñkpa, kpa ntre ñko, ikemenekede Kraist. 17 Ndien edieke mikemenekede Kraist, mbuọtidem mbufo ọwọrọ ikpuikpu, ndien mbufo ke esuk ededu ke mme idiọkñkpọ mbufo. 18 Onyuñ ọwọrọ ñko ete ke mme mmọ emi ekenimde Kraist ke akpanikọ ndien mmọ ekpa, etak. 19 Edieke idorenyin ñnyin ke Kraist ekpedide kabaña uwem enye emi ikpọñ ikpọñ, ndien ñkpọ eñwen idianake do, odot ekop ñnyin mbọm ekan owo kiet ekededi efen ke ofuri ererimbot.

20 Edi se idide akpanikọ edi ke ema emenede Kraist ke ñkpa, nte ubiọñ, nte ke mme mmọ emi ekpañade, eyenyuñ emenede mmọ ke ñkpa esin ke uwem.

21 Koro kpa nte ñkpa okotode owo kiet edi, ke ukem usuñ oro ediset ke ñkpa onyuñ oto owo kiet ñko. 22 Koro kpa nte kpukpru owo ekpade oto ke edidiana mmọ kiet ye Adam, kpa ke ukem usuñ oro eyemenede kpukpru owo esin ke uwem ke ntak edidiana mmọ ye Kraist. 23 Edi eyemenede owo kiet kiet ke nnen nnen idaha esie! Kraist nte ata akpa ke kpukpru; ndien eyemenede mme mmọ emi Kraist enyenede ke ini edidi Esie.

24 Do ke utit ererimbot edidi; Kraist eyekan kpukpru mme odudu emi ekarade ke spirit, ndien Enye ayak Obio Ubọñ ọnọ Abasi Ete. 25 Koro Kraist enyene ndikara tutu Abasi akan kpukpru mme mbio asua Esie, ndien esin mmọ ke idak ukot Esie. 26 Akpatre asua emi edikande edidi ñkpa. 27 Koro ikọ Abasi ọdọhọ ete, "Abasi ada kpukpru ñkpọ esin ke idak ukot Esie." Emi etim añwaña nte ke ikọ oro "kpukpru ñkpọ" isineke Abasi ke idem Esie, emi esinde kpukpru ñkpọ ke idak Kraist. 28 Edi ke ini ema ekesin kpukpru ñkpọ ke idak ukara Kraist, do ndien Enye Eyen Abasi ke idem esie, eyeyak idem Esie esin ke idak ukara Abasi, emi akayakde kpukpru ñkpọ esin ke idak Esie; ndien Abasi eyekara kpukpru ñkpọ ofuri ofuri.

29 Edieke ediset ke ñkpa miduhọ, mme mmọ emi enade babtisim enọ mme akpaña ñkpa edinam didie? Nso ke edinam mmọ oro ọwọrọ, edieke edide akpanikọ nte mmọ etiñde, ete ke imenekede mme akpaña ñkpa ifiak isin ke uwem, ntaha mmọ oro enade babtisim enọ mme akpaña ñkpa-a?

30 Ndien kabaña ñnyin, ntaha emi ñnyin ikpenyimede ndiyak idem ñnyin nsin ke mfina ke kpukpru ini ñkanika-a? 31 Nditọ ete ami nse ñkpa ke iso kpukpru usen! Ntañidem emi ami ñnyenede kabaña mbufo ke ntak uwem ñnyin emi adianade ye Kraist Jisọs Ọbọñ ñnyin anam ami ntiñ emi. 32 Edieke ami ñkeñwanade eñwan ye mme unam ikọt ke Efisọs ke ntak obukidem, nso idi udori mi? Edi edieke mimenekede mme akpaña ñkpa ifiak isin ke uwem, "Eyak ñnyin idia inyuñ iñwọñ, koro ñkpọñ ñnyin iyekpa", nte mme etiñ ikọ etiñde.

33 Ekuyak ebiaña mbufo, "idiọk nsaña ababiat eti ido." 34 Ọnọ ntak ekere ikaba, enyuñ etre ndika iso ndinam idiọkñkpọ. Ami ntiñ emi man but anam mbufo nte ke ekese mbufo idiọñọke Abasi.

35 Ubak owo ekeme ndibup ete, "Ekeme didie ndinam akpa ñkpa eset afiak enyene uwem? Nso utọ ikpọkidem ke mmọ edinyene?" 36 Mbufo mme ndisime! Ke ini emi mbufo etọde ñkpasip ke isọñ, enye ikemeke ndisiaha ñwọrọ enyọñ nte odu uwem eto tutu enye akpa. 37 Ndien se mbufo etọde ke isọñ edi ikpuikpu ñkpasip; ekeme ndidi ñkpasip ibokpot, mme oruk ñkpasip efen, idighe ofuri idem eto emi edikọri. 38 Abasi ọnọ ñkpasip oro oruk ikpọkidem emi Enye amade; Enye ọnọ ñkpasip kiet kiet nnen nnen ikpọkidem esie. 39 Ndien obukidem mme odu uwem ñkpọ idighe ukem ukem obuk; mme owo enyene obukidem isio, mme unam enyene uduot eke mmọ, mme inuen ye eke mmọ, ndien mme iyak enyene eke mmọ isio.

40 Ndien mme ikpọkidem edu ke enyọñ ye ke isọñ; uyai emi enyenede mme ikpọkidem enyọñ ọkpuhọde ye uyai emi enyenede mme ikpọkidem isọñ. 41 Utin enyene uyai esie, ọfiọñ ñko enyene uyai esie, ndien mme ntantaọfiọñ ye uduot uyai mmọ isio; kpa ke otu mme ntantaọfiọñ mme nsio nsio oruk uyai edu. 42 Ntem ke edidi ke ini ema emenede mme akpaña ñkpa efiak esin ke uwem, ke ini emi ebukde ikpọkidem enye edi mbiara ñkpọ — se ikpade; ke ini emi emenerede, enye eyedi se midikpaha ñkpa. 43 Ke ini emi ebukde, ifọnke ndise, onyuñ edi se inanade odudu; edi ke ini emi emenerede, enye eyenyuñ okop odudu. 44 Kini ebukde, enye edi ikpọkidem ererimbot; ke ini emi emenerede enye eyedi ikpọkidem spirit. Adaña nte ikpọkidem ererimbot emi odude, kpa ntre ke ikpọkidem spirit odu ñko. 45 Koro Ñwed Abasi ọdọhọ ete, "Akpa erenowo, emi edide Adam, ekebot enye nte oduuwem ñkpọ", edi ekpere edem Adam edi spirit emi ọnọde owo uwem.

46 Ikedighe eke spirit ekebem iso, ekedi eke ererimbot, ndien eke spirit adiana. 47 Ekenam akpa Adam oto ntan isọñ; udiana Adam okoto ke enyọñ. 48 Mme mmọ emi etode isọñ enyuñ ebiet enye emi ekedade obu isọñ ebot; mme mmọ emi edide eke enyọñ enyuñ ebiet Enye emi okotode enyọñ edi. 49 Kpa nte ñnyin isinede mbiet owo emi ekebotde eto obu isọñ, kpa ntre ñko ke ñnyin idisine mbiet owo emi okotode enyọñ edi.

50 Se ami ññwanade nditiñ edi ntem, nditọ ete, nte se edade obuk ye iyip enam ikemeke ndinyene udeme ke Obio Ubọñ Abasi; ndien se idikpade ikemeke ndinyene se midikpaha. 51 Ekpañ utọñ ekop ndibe ikọ emi: Ñnyin kpukpru idikpaha, edi eyekpuhọde kpukpru ñnyin, 52 ke edikep enyin, ke ini ema efuri akpatre uyo obukpoñ. Koro ke ini emi obukpoñ edisiorode uyo, eyemenede mme akpaña ñkpa ndien mmọ idikpaha aba ñkpa. 53 Koro eyekpuhọde se miduhọ uwem ke nsinsi esin ke se ididude uwem ke nsinsi; eyekpuhọde se idikpade esin ke se midikpaha.

54 Kini se idibiarade ama ekesine se midibiarake, ndien se idikpade ama ekesine se midikpaha, do ke Ñwed Abasi edisu nte ekewetde ete, "Emen ñkpa emen ke edikan"! 55 "O ñkpa enye edikah fo? O ñkpa enye ifọt fo?" 56 Ifọt ñkpa edi idiọkñkpọ ndien odudu idiọkñkpọ edi ibet. 57 Edi yak ekọm enyene Abasi emi ọnọde ñnyin edikan oto ke Ọbọñ Jisọs Kraist.

58 Ke ntre, nditọ ete mi, esọñọ eda enyene iwuk. Esin ifik kpukpru ini ke utom emi mbufo enamde enọ Ọbọñ, ke emi mbufo efiọkde ete inyeneke se mbufo enamde ke utom Ọbọñ emi midinyeneke udori.