1 Nditọ Ete, ami ñyom mbufo eti se iketibede ye mme ete ete ñnyin, emi eketienede Moses. Mmọ kpukpru ekedu ke idak ukpeme obubit enyọñ kiet, ndien kpukpru mmọ ema esaña ebe ke ididuot inyañ. 2 Ke obubit enyọñ ye ke inyañ, mmọ ema ena babtisim nte mme anditiene Moses. 3 Kpukpru mmọ ekedia oruk udia spirit kiet. 4 Enyuñ enwọñ oruk mmọñ spirit kiet; koro mmọ ekeñwọñde eto itiat spirit emi eketienede mmọ, ndien itiat oro ekedi Kraist. 5 Kpa ye oro, Abasi ikenemke esit ye ediwak mmọ, ke ntre ema esuan okpo mmọ ke isọñ utatan.

6 Kemi, mme ñkpọ emi eketibe nte uwutñkpọ ọnọ ñnyin, ndiduri ñnyin utọñ mbaña edisin esit ñnyin ke mme idiọkñkpọ nte mmọ ekenamde, 7 ekudi mme okpono ndem, nte ndusuk mmọ ekedide; kpa nte ekewetde ete: "Mme mmọ oro ema esuhọde etie edia ñkpọ enyuñ enwọñ ñkpọ, ndien eduk ke etime etime ido ukpammin ye use."

8 Yak ñnyin ikunam use nte mme ubak mmọ ekenamde, ndien ke usen kiet owo tọsin edip ye ita ema ekpaña. 9 Inaha ñnyin idomo Abasi, nte mmọ ekedomode, ndien mme urukikọt ewot mmọ. 10 Ekukuni ñkuni nte ndusuk mmọ ekenamde, ndien enjel nsobo owot mmọ.

11 Kpukpru mme ñkpọ emi eketibe ye mmọ nte uwutñkpọ ọnọ mme mmọ efen, ndien ekewet mmọ enim nte ñkpọ nduri utọñ enọ ñnyin. Koro ñnyin idude uwem ke eyo emi utit ererimbot ekperede ndidi.

12 Ke ntre, edieke afo ekerede ete ke imọ imọsọñọ ida, kpeme man afo ududuọ! 13 Idomo kiet ekededi emi esimde mbufo edi oruk emi esiwakde ndisim mme owo. Edi Abasi edi anam akpanikọ, ndien Enye idiyakke mbufo eduk idomo emi edikande odudu mbufo ndiwọrọ ke esit; kpa ke idem ini idomo oro Enye eyenọ mbufo odudu ndiyọ enye, ndien Enye eyesiak usuñ ubọhọ ọnọ mbufo. 14 Ke ntre mme ndima ufan mi, esik eda ekpọñ ukpono ndem.

15 Ami ntiñ ikọ emi ye mbufo nte mme enyene ibuot owo; etim ekere kpukpru se ami ntiñde. 16 Kọb edidiọñ emi ñnyin inọde Abasi ekọm, nte oro idighe edibuana ke iyip Kraist ke ini emi ñnyin iñwọñde ito kọb oro? Ndien uyo emi ñnyin ibuñde nte ñnyin ibuanake ke ikpọkidem Kraist ke ñnyin ima ita uyo emi? 17 Ke emi edide ebok uyo kiet, owut ete okposuk edi emi ñnyin iwakde, ñnyin imakabade idi idem kiet koro kpukpru ñnyin ibuanade ebok uyo kiet emi. 18 Ekere ebaña nditọ Isrel, mme mmọ emi etade se edade ewa uwa, mmọ oro ebuana ke se enamde ke itie uwa enọ Abasi.

19 Nso ke ñyom mbufo efiọk ke se ntiñde emi? Nte ami ndọhọ nte ndem ye udia emi ewade enọ ndem ewọrọ ñkpọ ndomokiet? 20 Ih, Ih! Se ami ntiñde edi ntem, se ewade ke itie uwa mme mmọ emi mibakke Abasi ewa enọ mme ekpo, iwaha inọ Abasi. Ndien ami ñyomke mbufo enyene ebuana ye mme ekpo. 21 Mbufo ikemeke ndiñwọñ nto kọb emi otode okpokoro Ọbọñ ñnyin, ñnyuñ ntọñọ ntak ñkọñwọñ nto kọb emi otode okpokoro ndem. Mbufo ikemeke ndidia udia ke okpokoro Ọbọñ ñnyin ntọñọ ntak ñkadia ke okpokoro mme ndiọi spirit.

22 Nte ñnyin iñwana ndinam Abasi ofube ufup? Mme ñnyin inyuñ ikere ite ke ñnyin imokop odudu ikan Abasi? 23 Mmọ edọhọ ete, "Enyime ñnyin inam ñkpọ kiet ekededi". Emi edi akpanikọ, edi idighe kpukpru ñkpọ ọfọn. Enyime ñnyin inam ñkpọ ekededi, edi idighe kpukpru ñkpọ ada uwem ọsọk ñnyin. 24 Owo ndomokiet okuyom ufọn idem esie, edi yak oyom ufọn mme mmọ efen,

25 Eta kpukpru se enyamde ke urua unam, ekubup mbume ke ntak mbuọtidem mbufo. 26 Koro kpa nte ñwed Abasi etiñde ete: "Isọñ ye kpukpru ñkpọ emi edude ke esit enyene Ọbọñ."

27 Edieke owo emi minimke Abasi ke akpanikọ okotde fi udia ndien afo ebiere ndikadia, se ededi emi enimde fi ke iso kubup mbume ke ntak mbuọtidem fo. 28 Edi edieke owo ndomokiet etiñde ọnọ fi ete "Emi edi udia emi ekewade enọ ndem" kudia udia oro, ke ntak owo emi akayararede ñkpọ emi ọnọ fi ye ke ntak mbuọtidem fo ñko. 29 Ke ntak mbuọtidem owo oro, idighe okuo ke ami ntiñ. Owo ekeme ndibup ete, "Ntaha mbuọtidem owo efen ekemede ndibiọñọ unen mi ndinam nte ami mmade-e?" 30 Edieke ami ñkọñọde Abasi ekọm ke udia mi ntak emi owo ndomokiet ekpenyenede se enye etiñde abaña udia emi ñkọnọde Abasi ekọm-ọ? 31 Se afo adadia, mme ọñwọñde, ye se ededi emi afo anamde, nam kpukpru ndinọ Abasi ubọñ. 32 Edu uwem mbufo ke usuñ emi mbufo midighe ñkpọ iduọ inọ mme Ju, mme mme mmọ emi midighe mme Ju, mme ufọk Abasi Kraist. 33 Enam kpa nte ami nnamde; ami mme ñwana ndinam kpukpru owo enem esit ke se ami nnamde, ñkereke mbaña ufọn idem mi ke usuñ ndomokiet, edi ñkere mbaña ufọn kpukpru owo, man otodo ekeme ndinyaña mmọ.