1 Mbufo etiene uwutñkpọ mi kpa nte emi ami ntienede uwutñkpọ Kraist. 2 Ami motoro mbufo koro mbufo etide mi kpukpru ini enyuñ etienede mme ukpepñkpọ emi ñkeyakde nnọ mbufo. 3 Edi ami ñyom mbufo efiọk ete ke Kraist edi Ibuot ọnọ kpukpru owo, ndien ebe edi ibuot ọnọ ñwan esie, ndien Abasi edi ibuot ọnọ Kraist. 4 Ke ntre erenowo emi ọbọñde akam mme asiakde uduak Abasi, ke mbono ntuak ibuot ndien ofuk ibuot esie, enye esuene Kraist. 5 Ndien ñwan ekededi emi ọbọñde akam mme asiakde uduak Abasi ndien ifukke ibuot esie, enye esuene ebe esie, onyuñ etie ukem nte ñwan emi ekporode enye idet ke ibuot efep. 6 Edieke ñwan mifukke ñkpọ ke ibuot esie, akpana nte enye okporo idet esie. Ndien sia edide ñkpọ obut ñwan ndikporo idet esie, mme ndifat idet esie, ana nte enye ofuk ñkpọ ke ibuot esie. 7 Erenowo inyeneke ntak ndifuk ibuot esie, koro enye edide mbiet ye ubọñ Abasi. Edi ñwan edi ubọñ ebe esie;

8 Koro ikobotke erenowo ito ñwan, edi ekebot ñwan eto erenowo. 9 Ikonyuñ ibotke erenowo ke ntak añwan, edi ekebot ñwan ke ntak erenowo. 10 Ke ntak emi ye ke ntak mme enjel akpana nte ñwan ofuk ñkpọ ke ibuot esie ndiwut nte ke enye odu ke idak ukara ebe esie.

11 Ke uwem ñnyin ke idak Abasi, nte ededi, ñwan idaha ke idem esie ikpọñ erenowo, kpa ntre ñko erenowo idaha ke idem esie ikpọñ ñwan. 12 Koro kpa nte ekebotde ñwan eto erenowo, ntre ñko, edi ñwan aman erenowo ndien kpukpru ñkpọ ewọrọ eto Abasi.

13 Emen ekere ke idem mbufo, mme ọfọn ñwan ndida ke ufọk Abasi mbọñ akam ndien ifukke ñkpọ baba kiet ke ibuot esie? 14 Ntaha, nte idem obot ikpepke ñnyin ite ke anyan idet edi ñkpọ obut ọnọ erenowo? 15 Edi, edi ñkpọ uyai ye ntañidem ọnọ eyen añwan. Ekenọ ñwan anyan idet emi ndidi ufukñkpọ nnọ enye. 16 Edi edieke owo ekededi oyomde ndineni mbaña ñkpọ emi, kpukpru se ñkemede nditiñ edi ntem nte ke ñnyin, mme Ufọk Abasi inyeneke ido efen ke ini ntuakibuot.

17 Ke otu mme item emi ñyomde ndinọ mi, ke usuñ kiet ekededi ami ntoroke mbufo; koro ediboho mbufo nte ufọk Abasi ke akpanikọ akabade anam idiọkñkpọ akan eti. 18 Ke akpa itie, etiñ enọ mi ete ke ubahade odu ke ikpọkidem Kraist ke ini emi mbufo esobode ebiet kiet; ndien mmenim nte ke emi edi akpanikọ. 19 Eyighe iduhọ, ana nte ubahade odu ke otu mbufo man mme mmọ emi edude ke edinen usuñ eneñede ekut mmọ añwa añwa.

20 Ke ini emi mbufo esopde idem ọtọ kiet, oro iwutke ete ke edi udia Ọbọñ ke mbufo edi ndidia. 21 Koro kadaña emi mbufo ediade, owo kiet kiet aka iso ye udia esie, eyak mme ubak owo ekpa biọñ ke ini mme mmọ eken ekpañade mmin. 22 Nte mbufo inyeneke ufọk mbufo emi mbufo ekpediade enyuñ eñwọñde? Mme mbufo eyom ndisin Ufọk Abasi ke usuhọde ñkpọ ñnyuñ nda esuene nsọk mme mmọ emi edude ke unana? Mbufo ekere ete ami ñkpetiñ nso ye mbufo kabaña ñkpọ emi? Nte akpana ami ntoro mbufo? Ami ntoroke mbufo!

23 Koro emi edi se ñkọbọde nto Ọbọñ ñnyin ñyak nnọ mbufo: nte ke Ọbọñ Jisọs, ke okoneyo emi eketapde Enye, ama emen uyo, 24 ọnọ Abasi ekọm, onyuñ obuñ ọdọhọ, ete, "Emi edi ikpọkidem Mi emi nnọde mbufo, Enam emi ke nditi Mi." 25 Ke ukem usuñ emi, Enye ama emen kọb ke ema ekedia udia mbubreyo ema, ndien ọdọhọ, ete, "kọb emi edi kọb obufa ediomi Abasi emi edade iyip Mi esọñọ. Ini ekededi emi mbufo eñwọñde enye, enam emi ke nditi Mi." 26 Koro kpukpru ini emi mbufo etade uyo emi enyuñ eñwọñde ke kọb emi mbufo eyeka iso ndikwọrọ etop ñkpa Ọbọñ, nte Enye akakpade ọnọ mbufo. Enam emi tutu Enye afiak edi.

27 Ke ntre owo ekededi emi atade uyo emi mme ọñwọñde kọb emi edide eke Ọbọñ ke usuñ emi midotke eyenyene ubiomikpe idiọkñkpọ kabaña ikpọkidem ye iyip Ọbọñ. 28 Owo ekpenyene ndiduñọde idem esie mbemiso enye etiene abuana ke edita uyo emi ye ediñwọñ kọb emi. 29 Koro owo kiet ekededi emi atade onyuñ ọñwọñde ke enye mitimke idiọñọ ete ke edi ikpọkidem Ọbọñ, enye ata onyuñ ọñwọñ ubiomikpe ọnọ idem esie, 30 Ntak edi oro ediwak owo ke otu mbufo ekopde mmemidem enyuñ edọñọ, ndien ekese mbufo enyuñ ede.

31 Edi edieke ñnyin iduñọrede idem ñnyin kaña, ñnyin ididukke ke idak ubiomikpe Abasi. 32 Edi ke ini Ọbọñ obiomde ñnyin ikpe, Enye ọnọ ñnyin ntunọ, mbak edibiom ñnyin ikpe edian ye ererimbot. 33 Ke ntre, nditọ ete mi, ke ini mbufo ebonode ọtọ kiet man edia udia Ọbọñ, ebet kiet eken. 34 Edieke biọñ ọdọñde owo kiet ekededi, yak enye adia udia kaña ke ufọk esie, man otodo ke ini mbufo esopde idem ọtọ kiet edikabade ọwọrọ ñkpọ ubiomikpe. Ke se itukde mme ikọ mmọ eken, ami mmandi, ñyenọ item mbaña.