1 Ñwed emi oto Pọl emi ekemekde ete edi asañautom Kraist Jisọs, onyuñ oto eyen ete ñnyin Sọstenes.

2 Enọ ufọk Abasi emi odude ke Kọrint ye kpukpru mme mmọ emi ekekotde edi mme ndisana ikọt Abasi, emi enyenede Enye ke edidiana ọtọ kiet ye Kraist Jisọs, ye kpukpru owo ke kpukpru ebiet emi ekotde enyiñ Ọbọñ ñnyin Jisọs Kraist, nte Ọbọñ mmọ ye eke ñnyin nde.

3 Yak Abasi Ete ñnyin ye Ọbọñ ñnyin Jisọs Kraist ọnọ mbufo mfọn ye emem.

4 Ami ñkọkọm Abasi kpukpru ini ke ntak mbufo ke mfọn emi Enye ọnọde mbufo oto Kraist Jisọs. 5 Koro ke edidiana ọtọ kiet ye Kraist mbufo emeforo ke kpukpru ñkpọ, ye ke ikọ inua mbufo ye ke kpukpru oruk ifiọk akpanikọ. 6 Mme ikọ ntiense ñnyin emi abañade Kraist ewọñọ esu ke idem mbufo, 7 Ke ntre mbufo inanake enọ Spirit ndomokiet kadaña emi mbufo ebetde ke ofuri esit ediyarade emi ediyararede Ọbọñ ñnyin Jisọs Kraist iwut mbufo. 8 Enye eyenyuñ omum mbufo akama tutu esim utit, man otodo ekpekut mbufo nte mme anana ndo ke usen Ọbọñ ñnyin Jisọs Kraist. 9 Abasi emi okokotde mbufo esin ke ebuana ye Eyen Esie Jisọs Kraist Ọbọñ ñnyin edi anam akpanikọ.

10 Ami mekpe mbufo ubọk nditọ ete ke Enyiñ Ọbọñ ñnyin Jisọs Kraist, nte yak kpukpru mbufo edi kiet ke se mbufo etiñde, man ubahade edidu ke otu mbufo. Ediana ọtọ kiet ke ekikere kiet ye uduak kiet. 11 Koro ndusuk ikọt ufọk Kloes ema etiñ enọ mi añwaañwa nditọ ete Mi, ete ke mme utọk edu ke otu mbufo. 12 Se ñwanade nditiñ edi ntem; mbufo etiñ ikọ nsio nsio. Kiet ete, "Ami nda ye Pọl," owo efen ọdọhọ ete, "Ami nda ye Apọlọs," owo enyeken onyuñ ọdọhọ ete, "Ami nda ye Pita," ndien owo efen ete, "Ami nda ye Kraist." 13 Nte ebahade Kraist?

Ndi Pọl ke ekekọñ ke eto enọ mbufo? Ekenim mbufo babtisim esin ke enyiñ Pọl? 14 Ami mọkọm Abasi koro ami ñkenimke baba owo mbufo ndomokiet babtisim ke ebede Krispọs ye Keyọs. 15 Owo ndomokiet ikemeke ndien ndidọhọ ete ke ekenim mbufo babtisim esin ke enyiñ mi nte mbet mi. 16 Ih, edi ami ñkenim ufọk Stefanas babtisim; ke ebede oro, ami ñkemeke nditi aba mme mma nnim owo efen babtisim. 17 Koro Kraist ikọdọñke mi ndinim owo ndomokiet babtisim; edi ọkọdọñ mi ndikwọrọ Eti Mbuk Uwọrọ ufin, idighe ke idak ifiọk obukidem, mbak etoñkpa Kraist ye ñkpa Kraist edinana odudu.

18 Koro etop emi otukde ñkpa Kraist ke etoñkpa edide ndisime ñkpọ ọnọ mme mmọ emi etakde, edi, edi odudu Abasi ọnọ ñnyin emi ema ekenyaña. 19 Ikọ Abasi ọdọhọ ntem, ete, "Ami ñyebiat ifiọk mme ọfiọk ñkpọ owo, ñnyuñ nsin ọniọñ ata ukpep ke ndek."

20 Enye enye ọfiọkñkpọ owo-o? Enye enye ata ukpep-e? Enye enye andiyararede ntọtuñọ ifiọk eyo emi-e? Nte Abasi ikanamke ifiọk ererimbot emi ewọrọ ndisime? 21 Koro Abasi ke ifiọk Esie ama anam edi ọkpọsọñ ñkpọ mme owo ndidiọñọ Enye nto ifiọk idem mmọ. Edi Abasi ama akabade ebiere ndinyaña mme mmọ emi enimde ke akpanikọ eto ke "Ndisime" etop emi ñnyin ikwọrọde. 22 Mme Ju eyom mme utibe ñkpọ nte ọsọñọ ikọ, ndien mme Krik eyom ifiọk. 23 Edi ikwọrọ Kraist emi ekekọñde ke eto nte ñkpọ ntuaha nduọ ọnọ mme Ju ye ñkpọ ndisime ọnọ mmọ emi midighe mme Ju. 24 Edi kabaña mme mmọ emi Abasi ama okokot, ke otu mme Ju ye mme Krik, etop emi edi Kraist, emi edide odudu Abasi ye ifiọk Abasi. 25 Koro se ñnyin ikpekotde ite, "Ndisime" idian Abasi, ayama onyuñ okoñ akan ifiọk owo, ndien se ñnyin ikpekotde "Mmemidem" Abasi okoñ ke odudu akan odudu owo.

26 Nditọ ete, eti nte mbufo eketiede ke ini emi Abasi okokotde mbufo. Ikawakke mbufo emi ekedide mme ọfiọkñkpọ owo ke idomo ifiọk owo; ikewakke. Mbufo emi ekenyenede uteñe ke iso mme owo; ikewakke mbufo emi ekenyenede ñkoñkoñ emana.

27 Edi Abasi ekemek mme ndisime ñkpọ ererimbot man Enye esin mme ọfiọkñkpọ owo ke but, ndien Enye ekemek mme mmemmem ñkpọ ererimbot man Enye esin mme okop odudu ererimbot emi ke but. 28 Enye ekemek mme usuhọde ñkpọ ererimbot emi ye mme ñkpọ oro esinde, ye mme ñkpọ emi midighe ñkpọ ndomokiet, man Enye abiat se ererimbot ebatde ke akpan ñkpọ. 29 Man otodo owo baba kiet okubure mbure ke iso Abasi.

30 Edi Abasi amada mbufo edidian ye Kraist Jisọs, ndien Abasi ama anam Kraist edi ifiọk ñnyin. Ke Enye, ema enam ñnyin inen ke iso Abasi; ñnyin imikabade idi mme ndisana ikọt Abasi, ndien enyuñ enam ñnyin iwọrọ ufin. 31 Kpa nte ekewetde ke Ñwed Ikọ Abasi ete, "Yak owo ekededi emi oyomde ndibure mbure, yak obure mbure ke se Ọbọñ Jisọs ama akanam."