1 Idahaemi kabaña se mbufo ekewetde mi ebaña: ọfọn erenowo nditre ndidọ ndọ? 2 Edi ke ntak emi ido use awakde eti eti akpana eyen erenowo enyene ñwan esie, ndien ñwan kiet kiet ñko ye ebe esie.

3 Erenowo enyene ndinọ ñwan esie kpukpru se idide unen esiemọ ke ndọ, ndien ñwan ñko enyene ndinam kpasuk ntre ye ebe esie. 4 Idem añwan inyeneke enye ikpọñ edi enyene ebe esie. Kpasuk ntre ñko idem ebe inyeneke ebe ikpọñ edi enyene ñwan esie. 5 Ekusin kiet eken ebuana idem mbufo, ke ebede edi ke edinyime mbufo, man otodo mbufo eyak idem mbufo enọ ke edibọñ akam, emi ñko enyene ndidi ke esisit ini. Ndien mbufo etọñọ ntak eduk ebuana mbak Setan edinam mbufo eduọ oto ke unana mfarakeidem.

6 Ami nnimke emi nte mbet, edi ntiñ se ekemede ndinam edieke mbufo emade. 7 Ami ñkpama kpukpru owo etie nte ami ntiede. Edi owo kiet kiet enyene asaña asaña enọ oto Abasi, owo kiet enọ enye emi, owo efen enọ enye oko. 8 Ami ntiñ emi ye mme mmọ emi midọhọ ndọ ye mme ebeakpa nte, ke ọfọn mbufo nditie ntre idọhọ ndọ, nte emi ami ntiede. 9 Edi edieke mmọ mikemeke ndifara idem mmọ, mmọ ekeme ndidọ ndọ, koro ọfọn ndidọ ndọ akan ndikpa ye udọñitọñ.

10 Kabaña mme ọdọ ndọ, ami menyene ewuhọ emi midighe okim, edi, edi eke Ọbọñ: ñwan inyeneke ndidiañade ye ebe esie, 11 edi edieke enye adiañarede, enye enyene nditie ikpọñ idọhọ ebe efen, yak enye akanam emem ye ebe esie; ndien ebe ñko inyeneke ndisio ñwan esie ke ndọ.

12 Ke se itukde mme mmọ eken, ami ndọhọ ntem (ami ndọhọ idighe Ọbọñ): Edieke eyen Abasi kiet ekededi enyenede ñwan emi midighe andinim ke akpanikọ ndien ñwan emi enyime ndika iso ndiduñ ye enye, enye inyeneke ndisio enye ndọ. 13 Ndien edieke eyen añwan emi enimde Abasi ke akpanikọ enyenede ebe emi minimke ke akpanikọ, ndien erenowo oro osuk enyime nditie ye enye, enye inyeneke unen ndisio enye ke ndọ. 14 Koro enam ebe emi minimke ke akpanikọ asana oto ke ñwan esie emi enimde ke akpanikọ, kpa ntre ke enam ñwan emi minimke ke akpanikọ asana oto ke ebe esie emi enimde ke akpanikọ: Ke mikpedighe ntre nditọ mbufo ikpesanake, edi ke emi mmọ esana.

15 Edi, edieke ebe, mme ñwan emi minimke Abasi ke akpanikọ oyomde ndiwọrọ ke ndọ oro yak enye anam ntre. Ke ñkpọ ntem adade itie, eren mme ñwan emi enimde Abasi ke akpanikọ inyeneke se ibọpde enye. Abasi okokot ñnyin ete itie ke emem. 16 Ekeme didie ndifiọk afo eyen añwan emi abakde Abasi mme afo udunam ebe fo ọbọ ubọhọ? Mme afo eyen eren emi abakde Abasi, ekeme didie ndifiọk ete ke afo udunam ñwan fo ọbọ ubọhọ?

17 Yak owo kiet kiet aka iso ndidu uwem ntiene enọ emi Abasi ọnọde enye, ye nte enye ekedide ke ini Abasi okokotde enye. Emi edi item uwem emi ami ñkpepde ke kpukpru mme ufọk Abasi.

18 Edieke enye emi akanade mbobi eyerede ikot Abasi, yak enye okuñwana ndifuk mme idiọñọ mbobi esie; edieke enye emi mikanaha mbobi eyerede ikot Abasi yak enye okuna mbobi. 19 Koro edina mbobi ye unana edina mbobi idighe baba ñkpọ ndomokiet. Se idide akpan ñkpọ edi ndinim mme ewuhọ Abasi.

20 Yak owo kiet kiet etie nte eyen ekedide ke ini emi enye ekeyerede ikot Abasi. 21 Nte afo ekedi ofin ke ini emi Abasi okokotde fi? Ọfọn ama, kukere; edi edieke afo enyenede ifet ndiwọrọ ufin oro nam ntre. 22 Koro ofin emi Abasi ama okokot eyedi owo emi ama ọkọwọrọ ufin ke idak Abasi; ke ukem usuñ emi, owo emi mikọduhọ ke ufin emi Kraist ama okokot enye eyedi ofin Kraist: 23 Abasi ekedep mbufo ke ekọm urua; ke ntre mbufo ekukabade edi mme ifin owo ndomokiet. 24 Mme nditọ ete mi, yak owo kiet kiet osuk odu ke ebuana ye Abasi kpa nte enye ekedide ke ini emi Abasi okokotde enye.

25 Ke emi yak ise se itukde nditọ iban emi midiọñọke erenowo kaña. Ami, mbọhọ ewuhọ ndomokiet nto Ọbọñ, edi ana nnọ ekikere mi nte kiet emi mbufo ekemede ndibuọtidem ye ke ntak mbọm Abasi.

26 Ke ntak mme mfina emi edude ke emi, ami mmekere nte ke ọfọn owo nditie nte enye etiede. 27 Nte afo ọmọdọdọ ñwan? Kuyom ndisio enye ndọ. Nte afo udọhọ kaña ñwan? Kuyom ndidọ ñwan. 28 Edi edieke mbufo ema ekedọdọ ndọ, mbufo inamke idiọkñkpọ ndomokiet; onyuñ edieke eyen añwan emi midiọñọke erenowo kaña, ọdọde ndọ, enye ñko inamke idiọkñkpọ. Mme mmọ emi edọde ndọ eyesobo ye ediwak mfina ke uwem emi, emi ami mmeñkpamaha mbufo ekutde mme mfina emi.

29 Se ami ññwanade nditiñ nditọ ete, edi emi: ini ọmuhọ, ndien ọtọñọde ke emi ka iso, mme mmọ emi ema ekenyene iban ndọ ekpenyene ndidu uwem nte mmọ inyeneke ndomo iban ndomokiet; 30 Mme mmọ emi etuañade, ekpetie nte mmọ oro miduhọ ke mfuhọ, mme mmọ emi esakde imam, etie nte mmọ emi mikopke inemesit; mme mmọ emi edepde ñkpọ, etie nte mmọ emi minyeneke se mmọ ekedepde. 31 Mmọ emi enamde mbubehe ye mme inyene ererimbot, ekuyak mme ñkpọ emi esin mmọ ke ufin. Koro ererimbot emi, nte enye etiede idahaemi, idibighike ndibe mfep.

32 Ami ñkpama ndikut mbufo nte ebọhọde kpukpru mfina. Eyen eren emi midọhọ ñwan kaña esin ifik ke utom Ọbọñ, koro enye añwanade ndinem Abasi esit. 33 Edi eyen eren emi ọdọde ñwan esin ifik abaña ñkpọ uwem emi koro enye añwanade ndinem ñwan esie esit. 34 Ke ntre enye odu ke nduri edem iba. Eyen añwan emi midọhọ ebe, mme eyen añwan emi midiọñọke erenowo kaña esin ifik ke ndinam utom Abasi, koro enye oyomde ndibahade idem ye spirit esie nnim nnọ Abasi, edi ñwan emi ọdọde ebe esin idem ke abaña ñkpọ uwem emi, koro enye oyomde ndinem ebe esie esit.

35 Ami ntiñ emi koro ami ñyomde ndiñwam mbufo. Ami ññwanake ndibiọñọ mbufo. Ñkam ñyom mbufo enam se inende ye se ifọnde, man eyak idem mbufo ofuri ofuri enọ ke utom Abasi ekunyene adaña. 36 Edi edieke erenowo okobupde eyen añwan emi midiọñọke erenowo kaña ke ndọ, ndien eyen eren oro okut ete ke imọ inamke nte odotde ye eyen añwan emi, ndien udọñitọñ esie okpon, ndien enye ekere nte ke akpana mmimọ idọ ndọ, ke ntre yak mmọ enam ndọ nte enye ekerede ndinam. Idiọkñkpọ iduhọ ke edinam emi. 37 Edi eyen eren emi ebierede ke esit esie idighe ke edinyenyik, edi koro enye enyenede iwuk ke esit esie nditre ndidọ ndọ, onyuñ akarade uduak esit esie ndien ama ebiere ke esit esie se enye enyenede ndinam, enye anam ọfọn edieke enye midọhọ eyen añwan oro. 38 Ke ntre eyen eren emi ọdọde eyen añwan esie emi anam ọfọn, edi enye emi midọhọ eyen añwan esie emi anam ọfọn akan.

39 Eyen añwan emi ọdọde ndọ odu ke idak ndọ ebe esie adaña nte ebe esie odude ke uwem. Edi edieke ebe esie akpade, enye okure ke ndọ esie onyuñ ekeme ndidọ owo emi enye amade; edi ana edi owo emi abakde Abasi. 40 Ke ekikere mi, mekere nte ke enye eyekop inemesit akan edieke enye etiede ntre ke idem esie. Mekere nte ke ekikere mi emi oto Spirit Abasi.