1 Ntaha mbufo ekade ekekot kiet eken ikpe ke iso mme mmọ emi mibakke Abasi-e kini mbufo enyenede utọk ye kiet eken, edi ekpọñ ndikot ikpe ke iso ikọt Abasi? 2 Nte mbufo ifiọkke ite ke edi ikọt Abasi edikpe ererimbot ikpe? Ndien edieke edide mbufo edikpe ikpe ererimbot nte mbufo ikemeke ndikpe ñkpri utọk ke otu mbufo? 3 Nte mbufo ifiọkke ite ke ñnyin mme ikọt Abasi idikpe ikpe mme enjel? Didie ndien ke ñnyin mikpekemeke ndikpe ikpe emi otukde ñkpọ uwem emi! 4 Ndien ke ñkpri ikọ ntre odude, nte enen mbufo ndimen ñka ke iso mme mmọ emi midaha idaha ndomokiet ke ufọk Abasi ekpe ọnọ mbufo? 5 Ami ntiñ emi man but anam mbufo. Nte inyeneke owo baba kiet ke otu mbufo emi enyenede ifiọk ekem ndikpe ikpe ke ufọt mme andinim ke akpanikọ? 6 Edi utu ke oro, eyen ete kiet ada eyen ete eken aka esop ke iso mme mmọ emi mibakke Abasi.

7 Ke edikokop nte ke mbufo emekot kiet eken ikpe owut ete ke mbufo emeduọ ekpọñ usuñ ofuri ofuri. Ntaha mbufo mikemeke ndiyọ ndudue emi eduede mbufo-o? Ntaha mbufo mikemeke ndinyime etuk mbufo-o? 8 Utu koro, mbufo ke idem mbufo ekam etuk mme owo, mbufo enyuñ enam mme idiọkñkpọ, enyuñ enam emi ye mme idem nditọ ete mbufo.

9 Nte mbufo ifiọkke ite ke mme oburobut owo idinyeneke udeme ke Obio Ubọñ Abasi? Ekuyak owo abiaña mbufo: kpa ye mbio use, ye mme okpono ndem, ye mme esin efibe, mme irenowo emi enamde ñkpọ nte iban akpara ye mme irenowo emi edọde idem mmọ. 10 Ye mme mbio inọ, ye mme mbon idiọk itọñ, ye mme akpa mmin, ye mme mmọ emi esabarede owo, ye mme mbio ñwo, idinyeneke ebuana ke Obio Ubọñ Abasi. 11 Ndien oro edi se ubak mbufo ekedide. Edi ema eyet mbufo, ema enam mbufo esana, ema enọ mbufo utebe ikpe ke enyiñ Ọbọñ ñnyin Jisọs Kraist ye ke Spirit Abasi Ete ñnyin. 12 Owo ekeme ndidọhọ ete, "Enyime mi nnam kpukpru ñkpọ." Ih, edi idighe kpukpru ñkpọ emi afo anamde ada udori ọsọk fi. Ami mmekeme ñko ndidọhọ nte ke, "Enọ mi ifet ndinam ñkpọ kiet ekededi." Edi ami ndiyakke ñkpọ baba kiet esin mi ke ufin. 13 Owo efen ñko ekeme ndidọhọ ete, "Ekenam udia enọ idibi ndien idibi ñko ana ọnọ udia". Ih, edi Abasi eyebiat mbiba. Ikanaha owo ada ikpọkidem esie anam use, edi akana enye ada anam ñkpọ ọnọ Abasi, ndien Abasi onyuñ anam ñkpọ ọnọ ikpọkidem.

14 Abasi ekemenede Ọbọñ ñnyin ke ñkpa esin ke uwem ke odudu Esie, ndien Enye eyenyuñ emenede ñnyin ñko kpa ke odudu Esie. 15 Nte mbufo ifiọkke ite ke ikpọkidem mbufo ke akpanikọ edi mme mbak emi anamde ikpọkidem Kraist? Nte ami mekeme ndimen mbak ikpọkidem Kraist ñkanam edi ubak ikpọkidem añwan akpara? Nsa-o! 16 Mme nte mbufo ifiọkke ite ke owo ekededi emi adiande idem esie ye eke añwan akpara enye eyedi kiet ye ñwan akpara oro ke ikpọkidem? Koro ema edọhọ ete, "Mbiba eyekabade edi obuk kiet". 17 Edi owo ekededi emi adiande idem esie ye Ọbọñ Jisọs edi kiet ye Enye ke Spirit.

18 Efeñe ekpọñ use, koro kpukpru mme idiọkñkpọ eken emi owo anamde idaha ofuri idem esie inam, edi owo emi anamde use anam idiọkñkpọ ye ikpọkidem esie. 19 Nte mbufo ifiọkke ite ke ikpọkidem mbufo edi edisana ebiet Abasi emi Edisana Spirit oduñde ke esit, emi Abasi ọkọnọde mbufo? Mbufo idighe inyene idem mbufo, edi inyene Abasi. 20 Abasi ekedep mbufo ke ekọm urua. Ke ntre eda mbak ikpọkidem mbufo enam ñkpọ enọ Abasi ubọñ.