1 Eneñede etiñ eti eti ete ke use odu ke otu mbufo etieti, utọ use emi akananam miduhọ ke otu mme mmọ emi minimke Abasi ke akpanikọ. Etiñ enọ mi ete ke owo ke ana ye ñwan ete esie. 2 Mbufo ekeme didie nditañidem ke utọ ñkpọ emi? Kini mbufo ekpedude ke mfuhọ, ndien ebin utọ owo oro esio ke otu mbufo.

3 Okposuk edi emi ami mme nduhọ do ye mbufo ke ikpọkidem, ami do ye mbufo ke spirit. Ndien ami metetip owo emi anamde utọ ñkpọ oro ikpe, kpa nte ami ñkpodude do. 4 Ana mbufo ekot mbon ufọk Abasi, ndien odudu Ọbọñ Jisọs eyedu do ye mbufo ndien ami ñyedu ye mbufo do ke spirit, 5 emum owo oro eyak enọ Setan, man otodo ekpebiat uwem idiọkñkpọ oro ke idem esie, man enyaña spirit esie ke usen edidi Ọbọñ ñnyin.

6 Ntañidem mbufo ifọnke. Nte mbufo ifiọkke ite ke ekpri ibọk unam uyo anam ofuri ndom uyo ọtọt? 7 Mbufo enyene ndisioño ñkani ibọk umenede uyo (Yeast) idiọkñkpọ mfep man otodo mbufo esana ofuri ofuri, ndien mbufo eyebiet obufa ebok uyo emi ibọk umenede uyo miduhọ ke esit, koro ema ewa Kraist Eyen erọñ Abasi enọ ñnyin. 8 Ke ntre eyak ñnyin idia usọrọ emi ndien ke edidianade nsaña ñkpọñ kpukpru ñkani oburobut ido ye idiọkñkpọ. Eyak ñnyin ikabade ida edisana uyo ukpono ye edisana esit idia usọrọ emi.

9 Ke ñwed emi ñkewetde nnọ mbufo, ami mma ndọhọ mbufo nte yak ekunyene ebuana ye mbon use. 10 Ami ñkewetke mbaña mme mmọ emi minimke Abasi ke akpanikọ emi edide mbio use, mme mbio idiọk itọñ, mme mme inọ, mme mme okpono ndem. Ke ndiwana ndidiañade nsaña ye mmọ ọwọrọ mbufo enyene ndiwọrọ ñkpọñ ererimbot ofuri ofuri. 11 Edi se ikọ mi ọkọwọrọde edi ntem, mbufo inyeneke ndibuana ye owo ekededi emi okotde idem esie eyen ete ke Kraist, edi enye edi owo use, owo idiọk itọñ, mme okpono ndem, mme owo emi asabade owo, mme akpa mmin, mme inọ. Mbufo ekubuana ubọk udia ye utọ owo oro.

12 Nso mbubehe ke ami ñnyene ndikpe ikpe mme mmọ emi miduhọ ke Ufọk Abasi? Nte Ikpanaha mbufo ekpe ikpe mme mmọ emi edude ke esit ufọk Abasi? 13 Abasi edikpe ikpe ye mme mmọ emi miduhọ ke esit ufọk Abasi, kpa nte ikọ Abasi ọdọhọde, ete, "Ebin oburobut owo oro ke otu mbufo efep."