1 Ndima nditọ ete, ke idem akpa ini emi ñkedide ndikut mbufo, ñkedaha nneminua ikọ ye ọkpọsọñ ifiọk ibuot owo ñkwọrọ ikọ Abasi nnọ mbufo. 2 Koro ami mma mbiere nditre ndiduñọde ndiọñọ ñkpọ ndomokiet emi abañade mbufo ke ebede Kraist ye ñkpa Esie ke eto. 3 Ami ñkedi ntiene mbufo ke mmemidem ye ndik ye ọkpọsọñ ñnyekidem. 4 Ndien ukpepñkpọ mi ye ukwọrọ ikọ mi ikedighe ke nneminua ifiọk owo, edi ekedi ye nsioñwut idiọñọ odudu Spirit Abasi, 5 man otodo mbuọtidem mbufo okudoro ke ifiọk owo edi odoro ke odudu Abasi.

6 Ñnyin ke usuñ kiet ekededi, ikwọrọ etop emi asañade ye ifiọk inọ mme mmọ emi ema ekesim uyọhọ ñkọri ke ñkpọ Spirit, edi idighe ifiọk eyo emi, mme ifiọk mme akara eyo emi, emi ediwọrọde ikpuikpu. 7 Ikọ ifiọk Abasi emi ami ñkwọrọde edi ndedibe ifiọk Abasi emi edibede mme owo, emi Abasi ama ekememek kabaña ubọñ ñnyin mbemiso enam ererimbot. 8 Baba kiet ke otu mme akara ukara eyo emi ikọdiọñọke ifiọk emi, koro edieke mmọ ekpekefiọkde mmọ ikpikikọñke Ọbọñ Ubọñ ke eto.

9 Nte ededi, kpa nte ekewetde ete, "Se owo ndomokiet akananam mikwe minyuñ ikopke, se owo baba kiet akananam mikereke ete ke ekeme nditibe, edi kpa ñkpọ emi Abasi ekebeñede enim ọnọ mmọ emi emade Enye." 10 Edi Abasi ama ayarade ọnọ ñnyin oto ke Spirit Esie, Spirit ọduñọde kpukpru ñkpọ, kpa ye mme ndibe ñkpọ Abasi. 11 Anie ke otu owo ọfiọk ekikere owo nte enye ke mibọhọke spirit owo oro esinede enye ke idem? Kpa ke ukem usuñ oro owo ndomokiet idiọñọke, inyuñ ifiọkke ekikere Abasi ke ebede Spirit Abasi. 12 Ñnyin ikọbọhọ spirit ererimbot, edi spirit Enyemi otode ke Abasi, man otodo ñnyin ikeme ndifiọk kpukpru se Abasi ọnọde ñnyin ke mfọn. 13 Ke ntem, ñnyin itiñke mme ikọ emi ifiọk ibuot owo ekpepde, edi itiñ mme ikọ emi Spirit ekpepde, nte ñnyin iyararede mme akpanikọ Spirit inọ mme mmọ emi ema ekenyene Spirit. 14 Owo emi minyeneke Spirit ikemeke ndibọ mme enọ emi otode Spirit Abasi. Utọ owo oro idiọñọke se mme enọ emi ewọrọde; mmọ edi mme ñkpọ unana ifiọk ke iso esie, koro ekeme ndidiọñọ nto ndausuñ Spirit nte mme ñkpọ emi esọñde urua; 15 Owo emi enyenede Spirit ekeme ndiduñọde ndiọñọ kpukpru ñkpọ; edi owo baba kiet ikemeke ndiduñọde enye ke idem esie. 16 Kpa nte ñwed Abasi ọdọhọde, ete, "Anie ekeme ndidiọñọ esit Abasi? Anie ekeme ndinọ Enye item?" Ñnyin idi mme mmọ emi inyenede esit Abasi.